Read Sangir 1 TIMOTIUS 6 Bible Online

1 TIMOTIUS 6 - Sangir bible

1 TIMOTIUS 6

¹Kal᷊awọu tau Sahani kụ nakoạ ěllange, harusẹ̌ masingkạu mawun sire adateng, tadeạu taumata e tawe mapakasamedu arengu Mawu Ruata e arau těntirong kitẹ e.

²Manga ěllang kụ mawune tau Sahani e tawe wotonge ta měndekeng mawune ual᷊ingu i sire kawe lawọ tau Sahani. Sal᷊ạ anune i sire kai harusẹ̌ mẹ̌tangkiang mawun sire lai limembong kapiane, u mawun sire tẹ̌tangkianeng limembong kapiane ene kai lawọ taumata mạngimang ikẹ̌kěndagẹ̌. Kai harusẹ̌ kerene i kau maněntirong kěbị ini ringangu měnasa.

³I saịewen maněntiro wal᷊ine wọu ene e kụ tawe sěndal᷊eng dingangu těntiron katul᷊idẹ̌ e wọu Mawung kitẹ i Yesus Kristus, kụ dingangu těntirong agamang kitẹ,

⁴kai taumata mal᷊aobotẹ̌ dingangu tawẹ kasingkạ e apa! Sakị e ute kai papuluang měmpẹ̌sasimbahẹ̌ dingangu měmpẹ̌darendehu manga wawera hakịu makakoạ pananoi, pẹ̌bawul᷊o, pẹ̌sasamedẹ̌, antang dal᷊aị,

⁵dingangu pẹ̌sasasědụ tawẹ potọe. Daral᷊engu tiněnnan sire ute seng nahěpusẹ̌ kụ seng tawẹ hinone. I sire mětẹ̌timonan makalạ baugu pangangagamane.

⁶Kerene wue u agama e makạonggọben kal᷊auntung masěllahẹ̌, kereu taumata e seng mal᷊uasu apan tẹ̌taghuanenge.

⁷U tawẹ apa-apa niwawang kitẹ e su dunia ini, dingangu tawẹ apa-apa lai isẹ̌sěbang i kitẹ bọu dunia ini!

⁸Kụ kereu piạbe kaěng dingangu pakeang ute ene e seng kapapiane.

⁹Arawe taumata kụ mapulu makalạ e, kai kẹ̌kasal᷊ukateng dingangu mạl᷊awungu haghing kapulu wodo ringangu makạsilakạ. Kal᷊awọu kapulu ene e kai makạbonohu taumata e su kaghagholọ dingangu kawawinasa.

¹⁰U kal᷊aanggang su roitẹ̌, kai makakạděntang haghing kararal᷊akisẹ̌. Piạ taumata sěnggạ e mang měmpạnahusu roitẹ̌ hakịu seng tawe tumatuhụ těntiron tau Sahani e, kụ i sire kẹ̌kahombangengken kal᷊awọu haghin sigěsạ makasunsara naung i sire marasai.

¹¹Arawe i kau e kai taumata tẹ̌taghuanengu Ruata, kụ i kau e harusẹ̌be mẹ̌teghangu kěbị ene. Pẹ̌tawakal᷊iko makoạ taumata maadilẹ̌ su silon Duata, měmunara waugu Mawu Ruata, pangimang si Kristus, kụkěndagu sěndinganeng taumata, kakakědang su susa, dingangu kasasikome naung.

¹²Pẹ̌bangkuadẹ̌ko ringangu kạguwạu naung baugu mẹ̌biahẹ̌ kere sěngkatau Sahani e tadeạu i kau makaghal᷊awe tatendenge pẹ̌bawiahẹ̌ tutune ringangu kakalẹ̌. Kai waugu ene Ruata e nẹ̌kui si kau su tempong i kau něngaku su těngon taumata l᷊awọ u i kau mangimang si Kristus.

¹³ Kụ orasẹ̌ ini e, su těngon Duata kụ puěngu patikụ pẹ̌bawiahẹ̌ e, ringangu su těngon Kristus Yesus kụ seng něngonggọu sahiding katěngadẹ̌ su těngon Pontius Pilatus, iạ e mědẹ̌dorong ini wọʼi kau:

¹⁴Sěmpike wue kěbị parenta ene pakatinalung dingangu tawẹ turạe sarangkewe ěllon Mawung kitẹ i Yesus Kristus ruměnta kapia.

¹⁵Darěntane e ute sarungbe itantu su tempone mapia-pia kahian Mawu Ruata sẹ̌sane. U kai mangangawasa mang sěmbaụ; i Sie Mawantugẹ̌. Datum patikụ Datu, ringangu Mawung kal᷊awọu Mawu.

¹⁶I Sie sẹ̌sane tawe ikawatạ u papate, tangu i Sie kai wiahẹ̌ mẹ̌bẹ̌banua su tualagẹ̌ ta kal᷊ahaungang i sai-sai. Tawẹu sarang sěngkatau taumata reng bọu nakasilo, arau makạsilo. U kai si Sie adatẹ̌ dingangu kawasa sarang kakalẹ̌ e! Aming.

¹⁷Baugu taumata apang kalạ su dunia ini e, oroi tadeạu i sire abe pěmpěngobotẹ̌ dingangu abe pěmpangumbala su kakalạ. I sire harusẹ̌be apangumbala su Mawu Ruata kụ seng něngonggọu patikụ e si kitẹ ipẹ̌dẹ̌dal᷊embo e tadeạu i kitẹ makatemang bue.

¹⁸Sasaiko i sire apẹ̌kẹ̌koạ mapia, apakakalạ su munara mapapia, mal᷊aělludẹ̌, dingangu apakạdal᷊uasẹ̌ mangonggọ.

¹⁹Dingangu ene ute apạngěmungke arẹ̌ta itẹ̌tamang i sire makoạ sasadian tempo ramahi. Tangu waugu ene i sire e sarung makahombang pẹ̌bawiahẹ̌ kakalẹ̌ e kụ kai pẹ̌bawiahẹ̌ tutune.

²⁰Kụ apạewen seng niumbala si kamene, riagatewe pakapia, Timotius! Pẹ̌teghangben pẹ̌bawawisarang apa tạ kěhase ringangu pẹ̌dararendehʼu apa makạtal᷊ubambing kai isẹ̌sẹ̌ba, ”Kasingkạ”.

²¹U kai piạ taumata měmpẹ̌bera u i sire piạ kasingkạ ene, hakịu měmpẹ̌lẹ̌lenga wọu pangangimangu tau sahani kụ pangimangeng i sire kal᷊amona. Karimakọ Mawu e měngal᷊amatẹ̌ si kamene manga anạ u sěmbaụ. Adatʼi kami, Paulus