Read Sangir 2 TIMOTIUS 2 Bible Online

2 TIMOTIUS 2 - Sangir bible

2 TIMOTIUS 2

¹Anạku i Timotius! Pẹ̌těngkakuatẹ̌kon tatal᷊ěntụ nionggọ si kitẹ e, ual᷊ingkeng kasasěmbaụ i kitẹ dingangʼi Kristus Yesus.

²Těntirọ e nạung seng kinaringihʼu wọu iạ su těngọen lawọ e, sarakangko su taumata kapěngumbalaěng dingangu pelesa maněntiro taumata wal᷊ine.

³I kau e pẹ̌tatahangko l᷊ain sigěsạ dingang, kerẹ e sordadong Kristus Yesus masatia.

⁴Sěngkatau sordado kapẹ̌lẹ̌hal᷊ẹ̌ e, apawe tawe mẹ̌tatasibung hal᷊ẹ̌ u wiahẹ̌ e, u i sie měngkai mědẹ̌deạ u makapẹ̌tatahinong naungu těmbonangu mẹ̌sasekẹ.

⁵Sěngkatau mẹ̌tatanding tawẹu kapiange su ral᷊ungu tanding, kereu i sie tawe tumuhụ manga atorange.

⁶Tahapěngěntana kụ seng něhal᷊ẹ̌ masěgadẹ̌ e, seng i sie kahumotong-motongange makaual᷊i wuane.

⁷Sipireko apan takụ nibawera ene, batụu Mawu e sarung mangonggọ si kau katatahuěnnang kěbị ene.

⁸Tahěndungeko ini: Injilẹ̌ takụ ilẹ̌habarẹ̌ ene kai habarẹ̌ mạanun Yesus Kristus, hěnton Daud, kai i Sie i Kristus kụ seng nẹ̌biahẹ̌ kapia wọu kapapohonge.

⁹Ual᷊ingu mělẹ̌habarẹ̌ Injilẹ̌ e, iạ tangu nakapẹ̌tatahangu sigẹ̌sạ sarang l᷊ai nihapusẹ̌ kere taumata ral᷊aị. Kai arawe hengetangu Mawu e tawe ikahapusẹ̌.

¹⁰Kai ene hakịu iạ e makědang měnal᷊udẹ̌ kěbị ene baugu patikụ taumata kụ seng pinilen Duata, tadeạu i sire mal᷊aing makahombang kasasal᷊amatẹ̌ nionggọ su ral᷊ung i Kristus Yesus, rẹ̌děndinganengu kawawantugẹ̌ kakalẹ̌.

¹¹Mamben těngadẹ̌ bawera ini, ”Kereu i kitẹ e seng nate ringange, ute i kitẹ sarung mẹ̌biahẹ̌ l᷊ai ringangʼE.

¹² Kereu i kitẹ e makẹ̌dang, i kitẹ e mal᷊aing sarung mẹ̌parenta ringangʼE. Kereu i kitẹ e mẹ̌sunial᷊ʼi Sie, i Sie lai sarung mẹ̌sunial᷊ʼi kitẹ.

¹³Kereu i kitẹ e tawe mẹ̌těngkasatia, i Sie tatapẹ̌ satia, u tawe mariadi kụ i Sie mẹ̌darokạ dingangu watangengʼE sẹ̌sane.”

¹⁴Kěnangko i kau e pẹ̌gěllịu ingate su apan taumata mạanun patikụ ini. Su těngon Duata e, sasaiko i sire tadeạu abe pěmpẹ̌bul᷊on hal᷊ẹ̌ u manga wisara. Ene tawẹ gunane, sal᷊ạanune kai makạkal᷊emboghang si sai-sain dumaringihẹ̌.

¹⁵Kěnangko i kau pěhaghu sěngapan botonge, makoạ taumata kahěnga-hěngang pangumbalaěngu Ruata e. Pẹ̌bangkuadẹ̌ko tadeạu i kau e tawe mamean hal᷊ẹ̌ u e kaiso kawe maněntiro pakatumang mangạ e těntirong katul᷊idẹ̌ e wọu anun Duata.

¹⁶Pẹ̌teghangkon manga wisara tạ gunane ringangu makahina Ruata. Kal᷊awọu wisara tamai ene tumbạeng makạkoạ taumata mangkeng kapạhuntinamban kararal᷊akise.

¹⁷Těntirong manga taumata ene nẹ̌darěkẹ kere sakị kangker nẹ̌tondaisẹ̌. Bọu tal᷊oaran sire piạko i Himeneus rẹ̌duan Filetus.

¹⁸I sire seng němpělenga wọu těntirong katěngadẹ̌ dingangu nakapẹ̌golang pěngangimangu sěnggạ. Ungkuěng i sire u pẹ̌bawangungu taumata nate e seng bọu nariadi.

¹⁹ Kai laěmpahẹ̌ matoghasẹ̌ niěmpahu Ruata e tawe ikaghoghahẹ̌ baharia. Su wowone e kạbawohẹ kere ini, ”Mawu e makạkiral᷊a tataghuanenge”, dingangu ”Taumata mẹ̌bera u i sie kai tataghuanengu Mawu, taumata ene harusẹ̌be mangědo wọu pẹ̌kakakoạ pẹ̌sasal᷊a”.

²⁰Su ral᷊ungu wal᷊e masasaria e kẹ̌kaěbakeng manga apal᷊iwụ mẹ̌dẹ̌dal᷊ahaghi. Piạben nikoạ bọu sal᷊aka arau wul᷊aeng, kaiso piạbe lai wọu kalu arau ěntana. Piạben ipẹ̌pakẹ baugu pandungangu wẹ̌bantugang, dingangu piạbe lai waụgu pandungang sen tiasane.

²¹Taumata kụ mẹ̌tẹ̌těngkawurẹ̌sim batangenge wọu patikụ kararal᷊akisẹ̌ e, i sie sarungbe paketang baugu apam munara mapapia. I sie nakoạbe tataghuaneng těntani ringangu mẹ̌baraguna su mawune. I sie měngkai rẹ̌diahiang baugu apam munara mapapia e.

²²Pẹ̌teghangkon haghing ěnning u apan mangangudạ e. Pěhaghuko pẹ̌bawiahẹ̌ tụtuhụ kapulun Duata, satia su apan těntirone ringangu kụkěndagu sěndinganeng taumata ringangu mạnaghuang lenehẹ̌ dingangu ramenaung. Pẹ̌biahe kerene ringangi sire apang kụkui makịtul᷊ung su Mawu e ringangu naunge wurẹ̌si.

²³Abe tẹ̌tol᷊e su ral᷊ungu pẹ̌dararendehu apang longong bẹ̌gaweng apa-apa. I kau masingkạu kěbị ene tumbạeng makapẹ̌bẹ̌bul᷊o.

²⁴I saim mẹ̌munara waugu Mawu e tawe hinone mẹ̌bul᷊o; i sie harusẹ̌be mahimumu su kěbị taumata, ringangu pelesa maněntiro ringangu masabarẹ̌.

²⁵I sie harusẹ̌be ringangu masikome naunge maněntiro apam puluang dumokạ; mal᷊owọko Mawu e mangonggọ u l᷊oahe si sire ene mẹ̌deạu měmpẹ̌tobatẹ̌ bọu kal᷊awọu rosan sire ringangu makakiral᷊a těntiro kahěngang.

²⁶Kụ kerene i sire němpẹ̌sasěsilẹ̌ kapia, ringangu nẹ̌těngkapěllọ bọu sasaungu setang kụ měnaweng si sire ringangu měnihasa si sire apạtol᷊e kapulune.