Read Sangir 2 TIMOTIUS 4 Bible Online

2 TIMOTIUS 4 - Sangir bible

2 TIMOTIUS 4

¹I Kristus Yesus sarung duměnta kapia su dunia ini waugu měhukung taumata wiahẹ̌ dingangu nate; ringangu i Sie sarung duměnta mẹ̌parenta kere sěngkatau Ratu. Ual᷊ingu ene iạ mẹ̌kẹ̌kal᷊iomaneng i kau sěngapam botonge su těngon Duata ringangu i Kristus Yesus:

²Kụ i kau pěhabarẹ̌ko hengetangu Mawu e, kụ sěntiniạ i kau měngkai pěmẹ̌mahansang tadeạu i sire měmpẹ̌daringihẹ̌. Kụ i kau e pěngurihẹ̌ko taumata, pělahẹkom pẹ̌sasal᷊an sire, ringangu pěmahansangko si sire. Těntiroiko i sire ringangu pẹ̌sasasabarẹ̌ e sěngapam botonge.

³Batụu sarung midatingu tempone taumata e selaing tawẹ u mapulu měnarimạ u těntirong katěngadẹ̌ e. Kaiso i sire kawe masịtol᷊e kapulun sire hala, ringangu měnampungu manga mananěntiro mạněntirọewe ipạhimatụ děndengelu tul᷊in sire e.

⁴I sire e kai sarung měhěping tul᷊in sire su katul᷊idẹ̌ e kụ katewe mẹ̌bihu rumaringihẹ̌ manga wio.

⁵Maningbe kerene, i kau e harusẹ̌ pěngědal᷊u watangeng manilaing kakakoạ e kereapa. Pakakẹ̌dang su ral᷊ungu sigěsạ, pẹ̌koạko munaranu e kere mělahabaru Injilẹ̌ e kụ pẹ̌karadiahangko munaranue sěngapang kapiane tuhụ ewe sěngkatau mẹ̌tatangkiang Duata.

⁶Mạanum batangengku e, seng nịdating tempone iạ e mairị makoạ sasěmba su Ruata. U kate kadodọ tempo iạ e sarung maněntangu dunia ini.

⁷Iạ e seng timol᷊e mapia su pẹ̌tanungang kụ semben nidatingu pinẹ̌kětakenge. Kụ iạ e mamben tatapẹ̌ satia[3] si Kristus sarang pěngěnsueěnge.

⁸Kụ ini e seng kạdariahi poroseěngu i sain nakauntung. Su Ěllong Kiamatẹ̌ e, Mawu, Mělahukung adilẹ̌ e sarung měnarakangu poroseěng ene si siạ e, ual᷊ingu iạ e něbiahẹ̌be nẹ̌sěngkapian Duata. Dingangu wal᷊inewe tumbạu iạ makatarimạ u poroseěng ene, kaiso kawe kěbịewe taumata apang mẹ̌kẹ̌karimangu rarěntan Mawu e.

⁹Pakarol᷊ạko ruměnta su anuku e,

¹⁰ u i Demasẹ̌ e kai seng naněntangu iạ batụu kai kiměndagu dunia ini. I sie kai nakoạ sol᷊ong Tesalonika. I Kreskes seng nakoạ sol᷊ong Galatia, ringangu, i Titus kai nakoạ sol᷊ong Dalmatia.

¹¹ Kětạeng i Lukas mẹ̌tẹ̌tanạ dingangku e. Pěněnsomahẹ̌ko si Markusẹ̌ e kụ paringangko i sie ramahi, u i sie kai makasumbala hal᷊ẹ̌ku e.

¹²Iạ seng něndolohi Tikhikus niapakakoạ sol᷊ong Efesus.

¹³ Kereu i kau e marěnta, ute apidẹ̌ko ramahi mantelẹ̌ku e takụ nitěntang su Troas su wal᷊en Karpus. Bawako l᷊ai manga bukẹ̌ku, napal᷊iụ e katewe manga bukẹ̌ nikoạ bọu manga pising binatang.

¹⁴ I Aleksander, kipungu witụ e seng nẹ̌koạ hal᷊ẹ̌ daral᷊aki-lakisẹ̌ niěbạ siạ e. Mawu e sarung měmal᷊isẹ̌ si sie tuhụewe kakanoạ e.

¹⁵I kau sẹ̌sanu e harusẹ̌be lai pẹ̌teghang i sie, u i sie kai tumanị e rumokạ matědụ suhal᷊ẹ̌u pělahabari kitẹ e.

¹⁶Su tempong iạ humotong-motong mělẹ̌habarẹ̌ pẹ̌tatahutěndạem batangengku e, tawẹu sarang sěngkatau tụtaking si siạ, u kěbị kai sen naněntangu iạ e. Mal᷊owọko Mawu Ruata e tawe mapẹ̌sal᷊an sire su hal᷊ẹ̌ ini e!

¹⁷Kaiso Mawu e tụtaking bue si siạ. I Sie nangonggọu kuatẹ̌ hakịu iạ e wotonge makapěhabaru kěbị lohong Injilẹ̌ e, tadeạu ikaringihẹ̌beng kěbị apam bal᷊ine tau Yahudi. Mase iạ e mal᷊iwirẹ̌ bue wọu hombangu papate.

¹⁸Kahěngang bue Mawu e sarung mělliung iạ bọu apang karaki raral᷊akisẹ̌ waugu iạ e. I Sie kai sarungbe mẹ̌bawa si siạ iapakasal᷊amatẹ̌ su ral᷊ungu Kararatuangu Sorga. Bantugeko i Sie sarang karěngụ e! Aming.

¹⁹ Tabeạku si Priskila rẹ̌duan Akwila ringangu su ral᷊ohon bal᷊en Onesiforus.

²⁰ I Erastus e kai mạtanạ su Korintus, dingangu i Trofimus takụ nitěntang masakị su Miletus.

²¹Pẹ̌tawakal᷊iko sěngapam botonge mẹ̌deạu makakarěnta kal᷊amonang musungu ral᷊ěnding. Tabeạ bọi Ebulus, i Pudes, i Linus, ringangi Klaudia si kau; ringangu wọu kěbị manga anạ u sěmbaụ mạngimang.

²²Mal᷊owọko Mawu e mahundingang i kau. Mal᷊owọko Mawu e měngal᷊amatẹ̌ si kamene! Adatʼi kami, Paulus