Read Sangir TITUS 1 Bible Online

TITUS 1 - Sangir bible

TITUS 1

¹Anạku i Titus! Iạ e i Paulus, němohẹ u suratẹ̌ ini ual᷊ingu sěngkatau ěllangu Mawu Ruata ringangu rarolohang i Yesus Kristus. Iạ nịpapile ringangu nịdarolohẹ̌ pẹ̌tẹ̌tul᷊ung taumata apam pinilen Duata e tadeạu matoghasẹ̌ su ral᷊ungu pěngangimang i sire tadeạu makakiral᷊a těntirong agamang kitẹ.

²Těntiro ene pinamanggilange kai su pělaharapẹ̌ u i kitẹ e kai sarung makatarimạu pẹ̌bawiahẹ̌ tutune ringangu kakalẹ̌. Duata e seng napẹ̌kẹ̌dom pẹ̌bawiahẹ̌ ene kal᷊amonam pěnanětạu tempo mase lai Ruata e apawe wẹ̌ga mẹ̌konti.

³Su tempone mapia-pia, Mawu Ruata e mạpakal᷊ahẹu kẹ̌donʼE su ral᷊ungu hengetangʼE. HengetangʼE seng nisarakang si siạ, kụ iạ hẹ̌dowe mapẹ̌dal᷊ahabaru ene ual᷊ingken laorom Mawu Ruata Měngangambang si kitẹ.

⁴ Titus, i kau e mambeng anạku kahěngang, u i kau ringangu iạ e lawọ be mạngimang si Kristus. Mal᷊owọko Mawu Ruata i Amang dingangi Kristus Yesus Datun Sal᷊amati kitẹ e mangonggọu al᷊amatẹ̌ dingangu karal᷊unsemahẹ̌ e si kamene.

⁵Iạ naněntang i kau su Kreta e tadeạu i kau ipẹ̌lẹ̌hundugẹ̌ apan bẹ̌dang tawe nạhundugẹ̌. Kerene lai tadeạu i kau makapěnduị u penatua suapan soa ipěngahạ jamaatẹ̌. Mase tahěndunge wue sasal᷊ěntihọku ini e:

⁶ Sěngkatau pangahạ u jamaatẹ̌ e kai tạ sěngkul᷊e, kawinge mang sěngkatau,[1] anạ e harusẹ̌ seng mạngimang si Kristus dingangu wal᷊inewe anạ tawe dusule ringangu ta kasasěngkul᷊ang.

⁷U mananahimata jamaatẹ̌ e kai taumata mẹ̌tẹ̌tangkiang munaran Mawu, i sie tawe wotonge piạ sungkal᷊ene. I sie tawe wotonge maobotẹ̌ arau maotohẹ̌ dingangu maanggang su roitẹ̌.

⁸I sie harusẹ̌be mal᷊uasẹ̌ měnarimạ u taumata su wal᷊ene, makěhagẹ̌ mẹ̌koạ mapia, makẹ̌dang, adilẹ̌, susi ringangu maudupẹ̌.

⁹I sie harusẹ̌ měngumpaedẹ̌ masěgadẹ̌ su těntiro pạngimangeng, kerẹewe seng nitěntiro si sie. Suwụe ute i sie wotonge maněntiro taumata wọu těntiro kahěngang dingangu mapasilong pẹ̌sasal᷊ang sire rumarendehẹ̌ e.

¹⁰Batụu kai lawọ taumata mapulu rumokạ něngalembọ e i sire apan nạung tụtol᷊e agamang Yahudi; i sire měngakal᷊ẹ̌ taumata wal᷊ine ringangu wisaran sire tạ lohone.

¹¹Mohongi sire harusẹ̌ sěnsingang, u i sire kai makạkoạ sidarạ sutal᷊oaran l᷊awọ anạ u sěmbaụ ual᷊ingu manga těntiro ta mẹ̌tatahino. Měkẹ̌koạ kerene e ute kai kẹ̌tạu mědẹ̌deạ kal᷊auntung makạsamedẹ̌.

¹²Piạko nabin sire hala mal᷊aing bọu Kreta e nẹ̌bera, ”Tau Kreta e měngkate hanesẹ̌ mẹ̌kẹ̌konti, dingangu mẹ̌sul᷊ungu binatang dul᷊u makakombang tahapěhaghu malasẹ̌.”

¹³Apan niweran nabi e mamben těngadẹ̌. Kụ ene hakịu i kau e harusẹ̌ měnẹ̌gu si sire pakahěgisẹ̌; tadeạu i sire e tatapẹ̌ měngumpaedẹ̌ těntiro kahěngang

¹⁴masene semben tawe měngumbala su manga wion tau Yahudi arau kal᷊awọu tita nikoạ u taumata tumatal᷊ikudu těntirong katěngadẹ̌ e.

¹⁵Patikụ sạbarang e mang burẹ̌si su taumata naunge wurẹ̌si. Arawe su taumata naunge kotorẹ̌ dingangu tawẹ pěngangimange, tawẹu sarang sěmbaụ burẹ̌si e watụ u tiněnna ringangu ral᷊ungu naung i sire e kai seng nal᷊amuhụ!

¹⁶I sire měmpạngakuwen sire u masingkạbem Mawu e, kai arawe su kakanoạ i sire kawe mẹ̌sẹ̌sunial᷊ẹ̌. I sire kai makạdarěnting dingangu tawe mapulu tumuhụ; i sire ute kai taumata tawe makaraumal᷊ẹ̌ mẹ̌koạ mapia, walạewe kerea.