Read Sangir TITUS 2 Bible Online

TITUS 2 - Sangir bible

TITUS 2

¹Arawe i kau, Titus, i kau e paněntirongkon těntiro mạtumang.

²Pěnasako si sire manga esẹ maghagurang e tadeạu i sire mẹ̌biahẹ̌ mẹ̌ngẹ̌dal᷊u watangeng, pelesa, dingangu tadeạu i sire mangimangbe su Mawu Ruata kere hinone, nasukụ u kakěndagẹ̌ dingangu masabarẹ̌ su sigẹ̌sạ.

³Kerene lai sasai manga wawine maghaghurange tadeạu kalakuang i sire e mẹ̌tẹ̌tatal᷊ahino wue kere su hinone waugu taumata měbẹ̌biahẹ̌ nahae waugu Ruata. I sire tawe wotonge měhinakang taumata wal᷊ine, ringangu tawe wotonge měngkai mạhimatụ měnginung inumang makạbukang. I sire kai harusẹ̌ měněntirong hal᷊ẹ̌ mapapia,

⁴tadeạu i sire mal᷊aing makapaněntiro manga wawine mangangudạ e kuměndagu kawinge ringangu anạ i sire,

⁵mạpelesa, mẹ̌biahẹ̌ susi, mạkoạ i ninangu ral᷊ungu wal᷊e mapia marariringihẹ̌ su kawinge. Kamageng kerene tangu tawẹ apa taumata kụ makạtongkeang habarẹ̌ bọu anun Duata.

⁶Kerene lai sasaiko i sire mangangudạ tadeạu i sire měngkapelesa.

⁷Kụ i kau e pěnodẹkong kakanoạ mapia su patikụ munara e makoạ kakakěllaěng. Kereu i kau maněntiro harusẹ̌be pakatatul᷊idẹ̌ dingangu kạsěllahu ral᷊ungu naungu.

⁸Pẹ̌pakẹkom bawera maral᷊uegha; kụ tawe kasěngkul᷊ang i sai-sai, tadeạu apan lụl᷊awang si kau ene e měngkamea ual᷊ingu tawẹ apa we kareakeng apa raral᷊akị ikapaul᷊ị i sire mạanung kitẹ.

⁹Mẹ̌tatangkiange kai harusẹ̌ pakasasuměllung su mawune ringangu makạdal᷊uasẹ̌ naunge su patikụ munara. I sire kumbahang měngkai ruměndehẹ̌, arau mẹ̌tako.

¹⁰Kaiso kawe manodẹ u kapia ringangu satia, takadeạu taumata e mẹ̌mantugẹ̌ injilu Mawu Ruata Měngangambang si kitẹ e.

¹¹U Ruata e seng něnodẹ u tatal᷊ěntụ e waụgu měngambang patikụ taumata.

¹²Tatal᷊ěntụu Ruata e mạněntiro si kitẹ e tadeạu i kitẹ e semben tawe mẹ̌biahẹ̌ lumawang kapulun Duata e ringangu tawe tumatuhụ ěnning mạdunia e. I kitẹ tẹ̌těntiroěng měbiahẹ̌ su dunia ini tadeạu mẹ̌biahẹ̌ maamumang, adilẹ̌, dingangu satia su Ruata.

¹³Kụ ini e i kitẹ kạpẹ̌ngẹ̌ngampal᷊e Ěllo lẹ̌antiwang i kitẹ e; su Ěllo ene dunia sarung makatingang kawantugʼi Yesus Kristus, kụ kai Ruata KasěllahengʼE Ratuʼn Sal᷊amatʼi kitẹ e.[2]

¹⁴ I Sie seng něnarakangu watangengʼE waụgi kitẹ tadeạu měngambang si kitẹ bọu patikụ kararal᷊akisẹ̌ kụ něliung kitẹ bọu rosa ringangu sěmatang makoạ tataghuanengʼE sẹ̌sane, mase makěhagẹ̌ měkoạ mapia.

¹⁵Těntiroko patikụ ene, ringangu pěnasako arau pěngurihẹ̌ko rumararingihẹ̌ si kamene ringangu piạ pěhěngkinge. Piawe piạu pẹ̌sěngkatau ta měndekeng i kau e.