Read Sangir FILEMON 1 Bible Online

FILEMON 1 - Sangir bible

FILEMON 1

¹Anạ u sěmbaụ kụ i Filemon, hapị ore lai ringang i kami! Iạ i Paulus, sěngkatau taumatan tahungkụ ual᷊ing i Kristus Yesus, dingangu anạ u sěmbaụ i kitẹ i Timotius, němohẹ u surate ini si kau,

² ringangu su jamaatẹ̌ kụ mẹ̌tẹ̌tampung su wal᷊enu, ringangu l᷊ai su wawineng kitẹ, i Apfia ringangu hapị i kitẹ sěngkapẹ̌tawakal᷊i i Arkhipus.

³I kami mělẹ̌harapẹ̌ mal᷊owọko Ruata i Amang i kitẹ e ringangu Mawu Yesus Kristus měngonggọu al᷊amatẹ̌ dingangu karal᷊unsemahẹ̌ si kau.

⁴Balạewe apang iạ mẹ̌doa e iạ e mẹ̌sẹ̌sẹ̌bạ arengu ringangu makịtarimakasẹ su Ruata.

⁵U iạ e nakaringihẹ̌ u i kau e kahěnga-hěngang mạngimang su Mawu Yesus dingangu kụkěndagu kal᷊awọu kawanuan Duata e.

⁶Iạ e mẹ̌kal᷊iomaneng u mal᷊owọko pẹ̌dal᷊ahapị i kitẹ lawọ taumata mạngimang sarung makaual᷊i katatahuěnna limembong kasariane waugu kal᷊awọu al᷊amatẹ̌ kụ tẹ̌taghuaneng i kitẹ e ual᷊ingu nasěmbaụ dingang i Kristus.

⁷Anạ u sěmbaụ kụ i Filemon e, kakěndagu patikụ kawanuan Duata e, makal᷊uasẹ̌ si siạ dingangu mạngonggọu wawahansang si siạ e! Kal᷊awọu kawanuan Duata e seng němpahul᷊uasẹ̌ ual᷊ingu i kau e.

⁸Ual᷊ingu ene, kere sěngkatau anạ u sěmbaụ tamba pangangimang, iạ e wotonge wue měngoro si kau pẹ̌koạ apang hinong koatengu e.

⁹Kaiso ual᷊ingu iạ e kụkěndagi kau, iạ e samatang mědẹ̌dorong. Iạ ini e sěngkatau seng maghurang[1] dingangu su orasẹ̌ ini e iạ kạl᷊aaresẹ̌ su ral᷊ungu tahungkụ ual᷊ing i Kristus Yesus.

¹⁰ Iạ i Paulus měhumpạu rorongku sěmbaụ si kau, mạanung Onesimus, anạku su ral᷊ung i Kristus. Batụu su ral᷊ungu tahungkụ ini e iạ seng nakoạ i amang su marohkẹ̌.

¹¹Humotong i sie tawẹ gunane waugʼi kau e, arawe orasẹ̌ ini e i sie piạ gunane, bal᷊inewe tumbạeng baugʼi kau, kaiso waugu iạ e lai.

¹²Orasẹ̌ ini taumata takụ ikẹ̌kěndagẹ̌ ene e takụ i ringọ si kau e kapia.

¹³Tumuhụ hinone iạ e mapulu měmaedẹ̌ si sie ringangku e kere pěngaweng si kau, tadeạu wotonge i sie paontol᷊ẹ̌ si siạ, karěngụeweng iạ e mạtatahang su ral᷊ungu tahungkụ ini ual᷊ingu mělẹ̌habaru Hengetang u Mawu e.

¹⁴Arawe iạ e mạdiri mẹ̌koạ manga apa kereu i kau wẹ̌dang tawe kimẹ̌kire. Iạ e limembong mapulu kereu i kau e mẹ̌koạbe ringangu naungu e mal᷊uasẹ̌; u iạ e mạdiri měnihasa si kau.

¹⁵Aramanung i Onesimus kawe nẹ̌tal᷊ei wọʼi kau e pạněntal᷊ang, tadeạu i kau e wotonge makareạ si sie kapia sol᷊ong karěngụe.

¹⁶Orasẹ̌ ini e i sie wal᷊inewe kětạeng sěngkatau makoạ ěllangu; kaiso kawe něngalembo wọu ene. I sie e kai sěndinganengu tau sahani ikẹ̌kěndagẹ̌. I sie kai ghẹ̌guwạ gunane si siạ, něngalembọete si kau! Nal᷊ahẹ u i sie masaria gunane baẹbe i sie kere sěngkatau ěllang arau katewe sěngkatau anạ u sěmbaụ su ral᷊ungu Mawu e!

¹⁷Ual᷊ingu ene, i kau e mạngěnnau iạ kawe hapị lawọ taumatan Sahani e, ute tarimạko kapia i Onesimus mẹ̌sul᷊ungkeweng i kau e něnarimạ u iạ.

¹⁸Kereu i sie piạ sal᷊ane arau piạ utange si kau e, ute walạ e iạ e měnal᷊udẹ̌ kěbị ene e.

¹⁹Kụ, mapiawe iạ e měmohẹ hala sini: Iạ i Paulus sarung měmaehẹ̌ pakasue-sue. (Nal᷊ahẹu tawahal᷊uasu iạ e mapẹ̌tahěndung u i kau sẹ̌sanu e piạ utangu e si siạ, kụ kai pẹ̌bawiahu wuhu e kere taumatan Sahani.)

²⁰Ual᷊ingu ene, su arengu Mawu e kěnangko tul᷊ung iạ e, luase wue naungku e kere sěhapikang su ral᷊ung i Kristus.

²¹Iạ e měmohẹ u suratẹ̌ ini ual᷊ingu iạ maiaking u i kau e sarung mẹ̌koạ apang kụ nighausangku. Ore lai iạ masingkạ u i kau e sarung mẹ̌koạ něngalembo wọu ene.

²²Těntal᷊ang ene, tul᷊ungko sadiai kamarẹ̌ baugu iạ e su wal᷊enu, u iạ e mělẹ̌harapẹ̌ Duata e rumaringihẹ̌ bue kakal᷊iomaneng i kamene manga anạ u sěmbaụ patikụ e ringangu mẹ̌bawa siạ kapia sol᷊ong anung kamene.

²³ I Epafras, kụ ene ringangku e su ral᷊ungu tahungkụ ual᷊ing i Kristus Yesus, něndingọ u adate si kau e.

²⁴ Tarimạko lai laadatʼu manga ringangku: i Markus, i Aristarkhus, i Demas dingangu i Lukas.

²⁵Mal᷊owọko Mawu Yesus Kristus měngal᷊amatẹ̌ si kamene. Adatʼi kami, Paulus