Read Sangir IBRANI 11 Bible Online

IBRANI 11 - Sangir bible

IBRANI 11

¹Pangangimang mangal᷊ene e kai tatialang mạnaghuang kal᷊aiaking matoghasẹ̌ suapang lẹ̌harapeng, mangal᷊ene ute kai piạ karal᷊ahẹ u apan sarung tawe ikasasilo e.

²Ual᷊ingu pangangimang, tangu taumatang kal᷊imonane e makạl᷊uasẹ̌ naungu Mawu Ruata e.

³ Ual᷊ingu pangangimang, tangu i kitẹ e nakaěnna u dunia e kai niriading hengetangu Mawu; kụ apang ikẹ̌kasilo e, mạdiadi wọu apang ta ikasasilo e.

⁴ Ual᷊ingu pangangimang, tangu i Habel nangěntudu sasěmbane limembong kapiane wọu sasěmbang Kain. Ual᷊ingu pangangimange ene, i Habel nitarimạ u Mawu Ruata kere taumata mapia, batụu sembeng nal᷊ahẹ u Mawu Ruata e něnarimạ u sasěmbane. I Habel seng nate kaiso kahian pangangimange ene, tangu i sie wẹ̌dang měbẹ̌bisara sarang orasẹ̌ ini.

⁵ Ual᷊ingu pangangimang, tangu i Henokh e tawe nate, kaiso kawe niapakasapuạ dingangu niapakakoạ sol᷊ong anung Mawu Ruata e. Tawẹu sarang sěngkatau nakapẹ̌sombang i sie, watụ u i sie seng niapakasapuạ u Ruata e. Su ral᷊ungu Bukẹ̌ Susi e mạbawohẹ u těntal᷊ang i Henokh e reng tawe nipakasapuạ e, i sie kai makạl᷊uasẹ̌ naungu Mawu Ruata e.

⁶Kereu tạ pangangimang, ute tawẹ u sarang sěngkatau makal᷊uasẹ̌ naungu Ruata e. Batụu i sain duměnta su anun Duata e harusẹ̌ mangimangu Mawu Ruata e ene, dingangu Mawu Ruata e mangonggọu wawal᷊ise su taumata kụ apang měmpědẹ̌deạ si Sie.

⁷ Ual᷊ingu pangangimang, tangu i Noakẹ̌ nipaul᷊ikangu Mawu Ruata e mạanung kal᷊awọu apa sarung mariadi, kụ tawe ikasilon sie. I Noakẹ̌ e rụdaringihẹ̌ Mawu hakịu i sie nělanging kapal᷊ẹ̌ sěnggěsa kụ samurine nạung kawe nakaambang si sie ringangu ral᷊ohon bal᷊ene. Ual᷊ingu kawe kerene ute dunia nihukung, arawe i Noakẹ̌ hala e ute kahian pangangimange tangú narekeng taumata mapia.

⁸ Ual᷊ingu pangangimang tangu i Abraham dụdaringihẹ̌ Mawu kụ piạ e Mawu kụkui si sie ringangu rimolohʼi sie apạkakoạ sol᷊ong banua kụ nikědon Mawu e si sie. Bọu e i Abraham nẹ̌buạ kụ běga wue měnsang makoạ sol᷊ong apa.

⁹ Ual᷊ingu pangangimang, i Abraham nẹ̌tanạ kere taumata raghị su wanua nikědon Mawu e si sie. I Abraham nẹ̌tanạ sene su ral᷊ungu selo. Kerene lai i Ishak dẹ̌duan Yakub, kụ seng nakatarimạ u kědo mẹ̌sul᷊ung bọu anun Mawu e.

¹⁰Batụu i Abraham kai kạpẹ̌ngẹ̌ngampal᷊e soa kẹ̌karakiang dingangu nilangingu Mawu Ruata e kụ piạ bawěntane matoghasẹ̌ e.

¹¹ Ual᷊ingu pangangimang, tangu i Abraham nakahombang hitene woʼi Sara, maning kutẹu i Abraham kawe seng tumanịu maghurang, dingangu i Sara e sẹ̌sane wantọ. I Abraham[9] mạngiaking u Mawu Ruata e sarung mapakasěhụ u kẹ̌donʼE.

¹² Manilaing i Abraham su tempo ene kere taumata wadange seng nipatene, kaiso i sie nakahombangke hitene mal᷊awọ, hakịu kahiang kal᷊awọe tangu seng ta kinarekenang — kere kal᷊awọu wituing su l᷊angị dingangu ěnne su apeng.

¹³ Patikụ taumata ene těbewe měmpangimang sarang nate e. I sire tawe nakahombang kasasěhụu pẹ̌kakědon Duata e, kaiso kětạeweng měmpạmanda ringangu měmpạněnsomahẹ̌ bọu maraune. Kụ ual᷊ingu ene ute i sire mạul᷊ịu i sire kětạeweng taumata raghị dingangu mananumpang su dunia ini.

¹⁴Taumata kụ měbẹ̌bera kerene ute mạul᷊ị mal᷊ahẹ u i sire kai kạpědẹ̌deạ e soa kụ sarung makoạ banuan sire tutune.

¹⁵Bal᷊inewe soa kụ seng tiněntang i sire e tẹ̌tiněnnaěng. Batụu kamageng kawe kerene ute, nal᷊ahẹ u seng lawọ loahe si sire kụ makapẹ̌sul᷊e kapia sol᷊ong banua ene.

¹⁶Kal᷊ahẹ e tangu, i sire kai měkẹ̌karimangu soa sěmbaụ limembong kapiane, kụ kai soa su sorga. Kai ene hakịu Mawu Ruata e tawe mamea kereu i sire mẹ̌sěbạ i Sie Ruatan sire e, batụu Ruata e seng něndiahing soa sěmbaụ baugu i sire e.

¹⁷ Ual᷊ingu pangangimang lai, tangu i Abraham něnarakang i Ishak nakoạ kere sasěmba piạ i sie wẹ̌banikateng u Ruata. Seng si Abraham sẹ̌sane Mawu Ruata e nangonggọu pẹ̌kakědonʼE, kaiso i Abraham mambeng napakawalang manarakangu anạ e mang tumbạu sěmbaụ ene.

¹⁸ Mawu Ruata seng něhengetang si Abraham, ”U kai wọu i Ishak ini e i kau sarung makahombang pal᷊ahite nạung Takụ nikědo si kamene.”

¹⁹I Abraham mạngiaking u Ruata e kawasa mapẹ̌biahʼi Ishak kapia wọu papatene e — kụ botonge i kawera u i Abraham seng nakaul᷊e si Ishak kapia wọu papate.

²⁰ Ual᷊ingu pangangimang, tangu i Ishak měkẹ̌kědong al᷊amatẹ̌ e si Yakub dẹ̌duang Esau waugu tempo ramahi.

²¹ Ual᷊ingu pangangimang, tangu těntal᷊ang deng i Yakub bẹ̌dang biahẹ̌ i sie něngal᷊amatẹ̌ anạ i Yusup — dingangu mẹ̌numěking su těking e kụ nẹ̌kal᷊iomaneng su Mawu.

²² Ual᷊ingu pangangimang, tangu i Yusup — piạ e nạung maraning mairị — měbẹ̌berang hal᷊ẹ̌ u sasěbangu tau Israel bọu Misirẹ̌, apidu timanatang hal᷊ẹ̌ u pěnanampạ u maietʼi sie.

²³ Ual᷊ingu pangangimang, tangu gaghurang i Musa namuning sie těllu wul᷊ang karěngụ e bọuten sie piněhěnding. I sire nakasilo u i sie kai rariọ maholẹ, dingangu i sire tawe matakụ u parentan datu e.

²⁴ Ual᷊ingu pangangimang, tangu i Musa sarangke nasaria e, tawe mapulu isěbạ ahusʼu sangiangu ratung Misirẹ̌ e.

²⁵I sie ěndokangbe sěngkapẹ̌tatahangu sigěsạ dingangu kawanuan Mawu Ruata e sul᷊ungu makauntung dal᷊uasu rosa ghěnnangu sěngkatempo.

²⁶I Musa nakapěndang u něngalembong kaarěgane marau kụ makaěbạ sasamedẹ̌ baugu Ratu Měnanal᷊amatẹ̌ nikědong Duata sul᷊ungu makaěbạ kal᷊awọu arětạ u wanuan Misirẹ̌ e, watụ u i Musa kai mělẹ̌harapẹ̌ bawal᷊ise su tempo ramahi.

²⁷ Ual᷊ingu pangangimang, tangu i Musa naněntangu Misirẹ̌ tawẹ kadiongeng takụ e su ral᷊angehu ratu. I Musa e měngkai mal᷊intoị měnẹ̌nuntụewe tẹ̌timonaěnge, mẹ̌sul᷊ungu i sie seng nakasilo Mawu Ruata kụ ta ikasasilo.

²⁸ Ual᷊ingu pangangimang, tangu i Musa nakapẹ̌koạ Paskah e ringangu něngoro tadeạu pakịtambuseng daha su tukadu wal᷊en tau Israel, mạdiringu Malạekatʼu Papate maminasa manga anạʼi sire laiakang.

²⁹ Ual᷊ingu pangangimang, tangu tau Israel nakal᷊iu Laudẹ̌ Mahamụ, kụ i sire al᷊ingkai rụdal᷊eng su ěntana mamara, arawe tau Misirẹ̌ e kawe niselohu l᷊audẹ̌ ene, piạ i sire měnẹ̌nal᷊ukạ lumiu.

³⁰ Ual᷊ingu pangangimang, tangú tau Israelẹ̌ nakakahaka meselu Yerikho sarangke wọu taghal᷊ẹ̌ lẹ̌likutang i sire pitu ěllo karěngụ e.

³¹ Ual᷊ingu lai pangangimang tangú i Rahab bawine tahapẹ̌sundal᷊ẹ̌ ene tawe nikapate sěngkakapate ringangu taumata apang dụdokạ Mawu Ruata e; batụu i sie něnarimạbeng dingangu naung mal᷊uasẹ̌ si sire mẹ̌papahimang tau Israelẹ̌ e.

³² Ho, iạ e wotonge lai měngkate hanesẹ̌ měbẹ̌bera, kutẹu tempoku e kawe tawe makaiangẹ. Batụu iạ bědang lai tawe něsẹ̌sěbạ i Gideon, i Barak, i Simeon, i Yefta, i Daud, i Samuelẹ̌, ringangu mangạewe nabi.

³³ Ual᷊ingu pangangimang, tangu i sire seng nakawatạ manga kararatuange. I sire měmpẹ̌kẹ̌koạbe apang matul᷊idẹ̌ e hakịu i sire mambeng nakatarimạ u apang nikědon Mawu Ruata e. I sire napẹ̌kěmming u kal᷊awọu mohongu singa,

³⁴ mạněbu putung masasaria, makạtihọ bọu horong peda. I sire e kai lome, kutẹu kawe matoghasẹ̌ supěseketange, hakịu makạbatạ manga wuntuangu tau raghị.

³⁵ Ual᷊ingu pangangimang, tangu manga wawine saụ kapia nakahombang taumatan sire kụ seng bọu nate. Piạben lai mapulu sunsaraěng sarang mate, ringangu madiri ipakal᷊iu, ual᷊ingu mapulu ipẹ̌bangung kapia mědeạu makaul᷊ị pẹ̌bawiahẹ̌ sěmbaụ kụ l᷊imembong kapiane.

³⁶ Piạbeng lẹ̌heghesang, lẹ̌limadeng, lẹ̌hanteěng, dingangu piạ l᷊ai tẹ̌tahungkutang.

³⁷ I sire nạung lẹ̌ěntungangu watu sarang pakạpate, piạben lai pẹ̌pentehangu l᷊ahaghari, ringangu pẹ̌patengu peda. I sire měpẹ̌papalilị měmpẹ̌papedetu pising domba arau pising kambing; i sire kai taumata kasiang, tẹ̌tingkaitang dingangu sẹ̌sigěsakeng.

³⁸Dunia ini e wal᷊inewe hinong pěmamanuaěng i sire. I sire kai měmpẹ̌papalilị su kěhu l᷊inggi ringangu su manga wawul᷊urange, arau měmpẹ̌tẹ̌tanạ su ral᷊ungu liang dingangu su ral᷊ungu manga lohangu ěntana.

³⁹Enẹ e kasariane watạ i sire kěbị ual᷊ingu pangangimang i sire! Kaiso i sire tawe němpanarimạ u apang nikědon Duata e,

⁴⁰batụu Mawu Ruata e kai piạ hingide limembong kapiane waugʼi kitẹ e. Hingide ute kětạeng dingang i kitẹ e, kụ i sire sarung ipakasukụ.