Read Sangir IBRANI 12 Bible Online

IBRANI 12 - Sangir bible

IBRANI 12

¹Ho, ěndaibe i kitẹ hala e tẹ̌tal᷊iwungang u sahidi kereng kakěpal᷊e! Ual᷊ingu ene tangu i kitẹ e měměllọkong kal᷊awọu apang mẹ̌měhạ si kitẹ e, dingangu rosa e sěntiniạ měngkate mětẹ̌těnděkạ si kitẹ e. Kụ i kitẹ e pakatatoelẹ̌ bue su pẹ̌tandungang tẹ̌tatěngoěng i kitẹ.

²Kụ timonang kitẹ e pakatuntụbe sol᷊ong anun Mawu Yesus, u kai i Sie namangung pangangimang i kitẹ e dingangu nẹ̌padul᷊i wọu tětạe sol᷊ong pangěnsueěnge. Mawu Yesus mědẹ̌dararagu sigěsạ su kalu kuruisẹ̌! I Sie tawe mẹ̌dariang mate su kalu kuruisẹ̌ e kawe apạ e makamea. I Sie kětạeweng mětẹ̌tahěndung karal᷊uasẹ̌ kụ sarung kapěndangengʼE su samurine. Orasẹ̌ ini e i Sie mạiang su koanengu kal᷊aianengu Mawu Ruata, kụ mẹ̌pẹ̌parenta sěngkapẹ̌parenta ringangʼE.

³Kěnnang pěngěnna kai kereapa sigěsạ u Mawu Yesus tụtatěngo ral᷊awangu taumata waradosa kụ kereng katědụ e! Ual᷊ingu ene tangu abe pěmpẹ̌těngkal᷊omeng naung i kamene ringangu abe kěngkapěndụ.

⁴Batụu su ral᷊ungu pẹ̌kakaradiahang i kamene mẹ̌sekẹ u rosa e, bědangbe lain tawe měsẹ̌sekẹ sarang tẹ̌dokangu raha e.

⁵ Dingangu abe kiwul᷊ei sasasang Mawu Ruata e, kụ seng nionggọ si kamene kere manga anạʼE: ”Anạ-Ku, pakatitike wue pakapia-pia těntirong Mawu e, dingangu abe kěngkanawo naungʼi kamene, kamagengu i Sie lumangehẹ̌ si kamene.

⁶Batụu Mawu e mạněntiro apang taumata kụ ikẹ̌kěndagʼE, dingangu i Sie mẹ̌gěnggeserẹ̌ si sain-sain kụ niakunʼE kere anạʼE.”

⁷Kụ i kamene pěmpěnarimạ bue papahang u Ruata kere sěmbaụ těntirong sěngkatau i amang. U sude wue mạdiadi kụ anạ tawe papahangeng i amang?

⁸Kereu i kamene tawe papahangeng kere kěbị manga rariọ bal᷊ine ini e, ute i kamene wal᷊inewe anạ tutune, kaiso kawe anạ su wela.

⁹I kitẹ e kawe piạ i amang i kitẹ su dunia. I sie mạněntiro si kitẹ mase i kitẹ e mạngadatẹ̌ si sie. Kụ limembo miěbạ i Amang i kitẹ marohkẹ̌ su sorga e, nal᷊ahẹ u i kitẹ e hinong sauneng kumakoho si Sie tadeạu i kitẹ e mẹ̌biahẹ̌.

¹⁰Manga gaghurang i kitẹ su dunia e mạněntiro si kitẹ su ral᷊ungu tempo piạ kětakenge, tuhụewe su pěndangeng i sire kawe mapia. Arawe Mawu Ruata e mạněntiro si kitẹ e kawe waugu kapiang kitẹ hala, mědeạu i kitẹ e ipakasusi ringangʼE.

¹¹Kahěngang bue, su tempong i kitẹ e tẹ̌těntiroěng, papahang ene tawe nẹ̌tatal᷊ahino su naung i kitẹ e, kaiso kai makạkasusa. Kai samurine ute, waugʼi kitẹ kụ apang seng bọu nitěntiroěng tangu, papahang ene makapěbẹ̌biahẹ̌ si kitẹ e tụtuhụ kapulun Duata, kụ mapěbẹ̌buam pěndangu karal᷊unsemahẹ̌ si kitẹ e.

¹² Batụu ene tangu ěndaị hengkẹ takiahu nělome e, ringangu hatedẹ̌ko wukunu kụkende ene!

¹³ Kụ pěmpahundal᷊engko sidutu sural᷊eng matene, tadeakengu laedu kempal᷊ẹ̌ e tawe mẹ̌gaghal᷊isa, kaiso kawe sauneng mahuntinambang kapiane.

¹⁴Pěmpẹ̌tuměgal᷊ẹ̌ko pẹ̌darame ringangu kěbị taumata e. Pědeạko kasasusi samatang baugu Mawu e. Batụu tawẹu sarang sěngkatau makasilo Mawu e kereu i sie tawe měbiahẹ̌ kerene.

¹⁵ Pakatanure wue kumbahang sarang piạu sěngkatau sumẹ̌bang bọu kapiang tatal᷊ěntụ u Mawu e, tadeạu kumbahangbe piạ u makoạ kere kalu makạkilu sutal᷊oarang kamene kụ makasahaghe ringangu makagholang taumata l᷊awọ e kahian daghuse.

¹⁶ Pakatanure wue u kumbahang piạu mawuang arau piạ u tawẹ pandungange su pẹ̌bawiahẹ̌ marohkẹ̌ e, kere nạung kẹ̌koateng i Esau. I sie nẹ̌bal᷊ụ u kal᷊aiakange, tumbạeng ual᷊ingu kaěng sělamạ.

¹⁷ I kamene masingkạu wọu ene i Esau mapulu makahombang al᷊amatẹ̌ ene wọʼi amange, kutẹu i sie kai nisuhudẹ̌. Batụu manilaing dingangu kakiạ i sie mědẹ̌deạ dal᷊engu měmal᷊ui pẹ̌sasal᷊ane,[10] kai i sie seng tawe nakareạ loahe waugu ene.

¹⁸ Manga anạ u sěmbaụ tawe riměnta tumatěngo munara sěmbaụ e kere tẹ̌tatěngoěng u tau Israelẹ̌ e nạung. I sire tụtatěngowe apang hinong ikẹ̌kasaghipo, kụ kai Wul᷊udʼu Sinai ringangu putunge kụ kararamasage ruděllị e; i sire tụtatěngo kararěndung, kasasunaubẹ̌, dingangu rěllang;

¹⁹i sire rụděndengelu wal᷊ěmbengu slompretẹ̌, dingangu tingihẹ̌ měbẹ̌bera maihạ. Ene piạ e tau Israel nakaringihẹ̌ tingihẹ̌ ene, i sire mědẹ̌dorong sěngapang botonge tadeạu tingihẹ̌ ene kuhạ e relaing saụ mẹ̌bisarang sire.

²⁰ Batụu i sire seng tawe makatahang dumaringihẹ̌ laorong tingihẹ̌ ene. Batụu tingihẹ̌ ene kai měbẹ̌bera u, ”Kěbị apang kụ měnẹ̌nenggehẹ̌ bul᷊ude ini e tawẹ tiahane měnsang i sie binatang arau walạewe měnsang i sai lai, harusẹ̌ ěntungeng batu sarang pakapate.”

²¹ Apang kụ kinasilon tau Israelẹ̌ e mambeng makạtatakụ sarang i Musa e nakawera u, ”Iạ e natakụ dingangu simal᷊ungkende!”

²²Kaiso ral᷊iune, i kamene seng diměnta su wongkoʼn Sion dingangu su soan Mawu Ruata wiahẹ̌ e, kụ kai i Yerusalem su sorga e ringangkewen manga malạekatẹ̌ e hiwune kal᷊awọe.

²³I kamene němpẹ̌tol᷊e komol᷊ang u ral᷊uasẹ̌ — pẹ̌sasombangengu manga anạ u Ruata mal᷊aiakang e, kụ areng i sire e mạdarol᷊ẹ̌ su ral᷊ungu sorga e. I kamene riměnta mẹ̌těngon Duata e mělahukungu patikụ taumata e. I kamene tụtatěngong kal᷊awọu rohkẹ̌ u taumata mapia e, kụ seng niapakasukụ.

²⁴ I kamene riměnta mẹ̌těngon Mawu Yesus, Měnanal᷊oara waugu pẹ̌dariandi wuhu ene; i kamene mẹ̌těngon daha nipakatědọ kụ makaual᷊i apạeweng něngalembong kapiane i kaual᷊i wọu rahan Habel.

²⁵ Ual᷊ingu ene pakapapia wue i kamene, kumbahangbe sarang i kamene tawe mapulu rumaringihẹ̌ si Sie kapělẹ̌hengetange. I sire kụ apan tawe mapulu rumaringihẹ̌ si Sie riměnta su dunia ringangu měhabaru hengetang u Mawu e, tawe makakatal᷊angu watangenge. Dumakeleng kate i kitẹ ini kụ dụdaringihẹ̌ si Sie měbẹ̌bera wọu sorga! Kereu i kitẹ tawe mapulu rumaringihẹ̌ e, ute mal᷊iwirẹ̌be kereapa i kitẹ e!

²⁶ Su tempo ene tangu tingihʼE nakapẹ̌gẹ̌gahẹ̌ dunia e. Kai orasẹ̌ ini e i Sie nẹ̌kědo, ”Sěnsul᷊ẹko l᷊ai, Iạ e sarung mapẹ̌gẹ̌gahẹ̌ e wal᷊inewe kětạu runia e, kaiso kawe lai langị e.”

²⁷Bawera, ”sěnsul᷊ẹko l᷊ai e” mělẹ̌lahẹ u kaguwạu dunia seng nariadi sarung kakiokang dingangu al᷊ingang, tadeạu mal᷊ěmbe kate apang tawe makiọ.

²⁸Ual᷊ingu ene tangu, i kitẹ pakitarimakasẹ bue su Mawu Ruata ringangu ual᷊ingu i kitẹ e nakatarimạ bọi Sie kararatuang sěmbaụ kụ tawe ghuminuẹ̌. I kitẹ e pakitarimakasẹ bue pẹ̌kal᷊iomaneng su Mawu Ruata, pakasasuměllung dingangu piạ takụ e, tuhụewe mẹ̌tatal᷊ahino su kapulunʼE.

²⁹ Batụu Ruatang kitẹ e kai mẹ̌sul᷊ungu putung makạhěngisẹ̌.