Read Sangir IBRANI 3 Bible Online

IBRANI 3 - Sangir bible

IBRANI 3

¹Manga anạ u sěmbaụ tamba pangangimang kụ seng kinakuiangu Ruata e lai! Kěnangko pẹ̌tiněnna pakaral᷊ung-dal᷊ung mạanun Mawu Yesus ini e! Mawu Ruata e rimolohʼi Sie samatang tadeạu makoạ Imang Mawantugẹ̌ su ral᷊ungu agama kụ tẹ̌tol᷊eěng i kitẹ.

² I Sie masatia su Ruata kụ seng němile si Sie waugu munara ene, mẹ̌sul᷊ungkewen nạung i Musa e kal᷊amona e satia měndal᷊engu munarane su wal᷊en Mawu e.

³Arawe Mawu Yesus e hinone wue adateng limembong kasěllahe woʼi Musa. Batụu i saing kụ nělanging bal᷊e e hinong makahombang laadatẹ̌ limembong kasariane wọu wal᷊e ene.

⁴Těngadẹ̌ apạeweng bal᷊e e piạbem měndal᷊anginge, kaiso měndal᷊anging patikụ sabarange ute kai Ruata.

⁵I Musa e kai taumata masatia mẹ̌tangkiang su ral᷊ungu wal᷊en Mawu e ringangu maněpaseweng kal᷊awọu apang ipaul᷊ị u Mawu Ruata e su tempo sarung duměnta e.

⁶Kai arawe i Kristus ute kawe satia kere sěngkatau Ahusẹ̌ mẹ̌tatal᷊ung Bal᷊em Mawu e. Dingangu kai seng i kitẹ ini e Wal᷊em Mawu, kereu i kitẹ e těbewe mal᷊aigasẹ̌ dingangu těbewe mạngiaking u makahombangbe apang kụ lẹ̌harapeng i kitẹ e.

⁷ Ual᷊ingu ene, mẹ̌sul᷊ungkewen niwerang Rohkẹ̌ u Ruata e, ”Kereu su ěllo ini e i kamene nakaringihẹ̌be tingihʼu Mawu,

⁸ute kumbahang měmpẹ̌tungkětị u naung i kamene kere manga i upung i kamene, piạ i sire rụdendehẹ̌ su těngon Mawu, dingangu mạmanikạ Duata e su wanua l᷊inggi.

⁹’Sene, manga i upung i kamene měmpẹ̌nẹ̌nal᷊ukạ si Siạ dingangu měmpẹ̌mẹ̌manikạ Siạ,’ angkuěng u Mawu Ruata, ’sěmbal᷊iau i sire seng nakasilo kakanoạ-Ku ěpạ u pul᷊o su taunge karěngụ e.’

¹⁰Hakịu ene Iạ limangehẹ̌ si sire kụ Iạ něhengetang, ’I sire měngkate sěntiniạ tawẹ satiane, ringangu masạgaěng tumuhụ kal᷊awọu tita-Ku e.’

¹¹Iạ e limangehẹ̌ dingangu nẹ̌salu, ’I sire tawe sarung makapahunsuẹ̌ su wanua ene kụ makapěngirul᷊e sěngkapěngirul᷊e ringang-Ku.’ ”

¹²Manga anạ u sěmbaụ, pakapia wue kumbahangbe su tal᷊oarang kamene piạ u sěngkatau kụ naunge kereng karal᷊akise ringangu tawẹ pangangimange, hakịu i sie tumal᷊ikudẹ̌ kụ mẹ̌těngkarau wọu anun Duata kụ biahẹ̌!

¹³Kụ tadeạu tawẹu sarang sěngkatau wọu tal᷊oarang kamene kaakal᷊eng u rosa kụ lumawang Duata, ute karimạko i kamene měmpẹ̌sẹ̌sasasa l᷊awọ i kamene apang kal᷊aěllo e karěngụeweng i kitẹ deng biahẹ̌ su tempo isẹ̌sẹ̌ba ”Ěllo Ini” su ral᷊ungu Winohẹ Susi.

¹⁴I kitẹ kěbị e kai sěhapikang su ral᷊ungu karadiahang dingangʼi Kristus, asal᷊eweng sarang pěngěnsueěnge i kitẹ e mẹ̌tẹ̌tumpaedẹ̌be masěgadẹ̌ su pangangimang kụ tẹ̌taghuaneng i kitẹ dokeng su tětạ e.

¹⁵ Kụ kai ini e kạbawohẹ su ral᷊ungu Bukẹ̌ Susi, ”Kereu su ěllo ini i kamene makạdingihẹ̌ tingihʼu Ruata e, kumbahang i kamene mẹ̌tungketị u těmbọ i kamene kerẹewe manga i upung i kamene, piạ i sire rụdendehẹ̌ su těngon Mawu Ruata.”

¹⁶ Ho, kai i sai-sai tangu nakaringihẹ̌ tingihʼu Mawu Ruata e kụ dimendehẹ̌ si Sie? Bal᷊inewe i sire kěbị apang niahạ i Musa niapasěbang bọu Misirẹ̌ e tangu?

¹⁷Kụ kai waugʼi sai tangu, Mawu Ruata e limangehẹ̌ gěnnangu ěpạ u pul᷊o su taunge karěngụ e? Kụ kai seng baugʼi sire apang mararosa e, apang něngkapate su wanua l᷊inggi, arau ěng?

¹⁸Piạ Mawu Ruata e nẹ̌salu kere ini, ”I sire sarung tawe mahunsuẹ̌ su wanua ene mědeạu makapěngirul᷊e sěngkapěngirul᷊e ringang-Ku” — i sai wue tangu tẹ̌timonaěngu Mawu Ruata ěng? TimonaʼE ute kai waugu i sai-sain dụdendehẹ̌ Mawu Ruata e arau ěng?

¹⁹Kụ ini e nakaěnnạ e i kitẹ e u i sire tawe makapahunsuẹ̌, batụu i sire kawe tawe nangimang su Mawu Ruata.