Read Sangir IBRANI 5 Bible Online

IBRANI 5 - Sangir bible

IBRANI 5

¹Apạeweng imang mawantugẹ̌ nipile wọu tal᷊oarang taumata e, kụ nihengkẹ makoạ mẹ̌tatangkiang Duata e kai nakoạ kere tuměllang i sire. Hal᷊ẹ̌ e ute kai měnẹ̌narakangu manga ghaghěllị dingangkewen manga sasěmba e waugu kal᷊aampung u rosa e su Mawu Ruata e.

²Imang mawantugẹ̌ ene e měngkatewe napenẹ u karal᷊ome kụ ual᷊ingu ene ute wotonge mẹ̌těngkasikome su těngon sai-sai apạeweng běgang apa-apa ringangu kinapal᷊idangu ral᷊enge.

³ Kụ ual᷊ingu i sie hala e kawe lome, ute i sie hinong měnarakangu sasěmba ringangu manga ghaghěllị, bal᷊inewe kětạeng ual᷊ingu rosan taumata e, kaiso kawe ual᷊ingu rosane hala.

⁴ Tawẹ apa sarang sěngkatau kụ mẹ̌těngkaruị u watangenge hala makoạ imang mawantugẹ̌ e. Taumata makoạ imang mawantugẹ̌ e, kamagengu Ruata e mẹ̌kui si sie waugu ene e — mẹ̌sul᷊ungkewe i Harun.

⁵ Kerene lai i Kristus. I Sie tawe něnduị u watangenge hala nakoạ Imang Mawantugẹ̌. Mawu Ruata e sẹ̌sane něnduị i Sie. Duata e něhengetang si Sie, ”I Kau e Ahusẹ̌-Ku; sahěllo ini, Iạ makoạ i AmangʼU.”

⁶ Su tampạ bal᷊ine e Mawu Ruata e mal᷊aing něhengetang, ”I Kau e kai Imang sarang kakalẹ̌, mẹ̌sul᷊ungu Imang Melkisedek.”[4]

⁷ Su tempong pẹ̌bawiahʼi Yesus su dunia ini e, i Sie nẹ̌kal᷊iomaneng dingangu kụkakindoạ piạ tingihe maihạ dingangu kạsangị e su Mawu Ruata, kawasa měngambang si Sie wọu papate. Kụ ual᷊ingu i Sie kawe sụsasimpěllọ su Mawu Ruata ringangu kal᷊awọu adatẹ̌ e, tangu i Sie rẹ̌daringihang.

⁸Mawu Yesus e kai Ahusʼu Ruata, kai manilaing kerene, i Sie kawe něngěndung nẹ̌těngkasatia wọu kasasigěsạ e.

⁹Tangú samurin Sie nipakariadi mananal᷊amatẹ̌ nasukụ, i Sie nakoạ pungu kasasal᷊amatẹ̌ kakalẹ̌ baugu patikụ taumata kụ matuhụ si Sie,

¹⁰dingangu Mawu Ruata e mal᷊aing nělahẹ u i Sie kai sěngkatau Imang Mawantugẹ̌, mẹ̌sul᷊ungu Imang Melkisedek![5]

¹¹Su hal᷊ẹ̌ u kal᷊aianeng i Yesus nakoạ Imang Mawantugẹ̌ e kai mal᷊awọ hinong i habarʼi kami si kamene, kaiso kawe masusa pěnualagenge, watụ u i kamene kai marěngụ makaěnna.

¹² Tuhụ hinone kai seng tempone i kamene makoạ mananěntiro, kutẹu i kamene kawe nạung deng bědang měngěndung bọu wal᷊ine su hal᷊ẹ̌ u wal᷊ohu těntirong Mawu Ruata e humotong. I kamene reng bědang tawe makatarimạ u kaěng makakětị; u i kamene kai hinong bědang manginung susu samatang.

¹³I sain bědang manginung susu e ute, mělẹ̌lahẹu i sie wědang tal᷊awuọ; deng tawẹ ěbạ e su kasingkạu mạpatiral᷊ang apang nihino ringangu apang nẹ̌sal᷊a.

¹⁴Kaěng makětị e kai waugu taumata matěllang e ual᷊ingkewen karal᷊embong ěbạ i sire, kụ seng makakoạ mapẹ̌dal᷊ahaen sude mapia ringangu sude ral᷊akị e.