Read Sangir IBRANI 6 Bible Online

IBRANI 6 - Sangir bible

IBRANI 6

¹Ual᷊ingu ene, tangú i kitẹ e měngal᷊ingko su manga těntiro tuhụ e mạanụeng kal᷊ahuntimadu pẹ̌bawiahu taumatan Sahani, kụ abe kawe kětạeng měngindunụ su těntirong agamang kitẹ humotonge. Kumbahang i kitẹ e saụ mělukạ u těntiro kụ seng pinamal᷊ohẹ̌ e, u taumata e hinong mẹ̌tobatẹ̌ bọu mẹ̌koạ kal᷊awọu sạbarang haghi tạ kěhase, kụ hinong mangimang su Mawu Ruata e,

²arau su wanggilu těntirong hal᷊ẹ̌ u pananahani[6] arau mạanung pěnaněllidu l᷊ima su taumata, arau mạanun pẹ̌bawangung u taumata nate e arau hukumang kakalẹ̌.

³Kereu Mawu e mapakawalang kitẹ e ute mahịe i kitẹ dumakịkowe sol᷊ong manga těntiro tuhụ e!

⁴Batụu i sai-saing kụ seng timal᷊ikudẹ̌ e, semben tawe ikawihing kapia. Nạung kal᷊imona e i sire seng su ral᷊ungu tualagʼu Mawu Ruata kụ sembeng nakateěng laonggọ e. I sire e sembelaing balạewe kawasang Rohkẹ̌ u Ruata e.

⁵I sire nasingkạ bọu kinapěndangeng i sire u hengetangu Mawu Ruata e kai mapia, kụ i sire seng nakatemang kal᷊awọu tatal᷊ěntụ napenẹ u kawasa su tempo kạděntane.

⁶Arawe samuring ene i sire kawe tumatal᷊ikudẹ̌! Kụ kawe makoạ kereapa měmihing si sire kapia tadeạu saụ kapia mẹ̌tobatẹ̌ bọu kal᷊awọu rosan sire. Batụu i sire kai kapẹ̌ngẹ̌nguruise Ahusʼu Ruata e lai ringangu mạpakasamedʼi Sie su těngon lawọ.

⁷U ěntana kụ měnẹ̌něsụ akẹ u tahiti e masau mahondosẹ̌ su wowone, kụ bọu ene mapatendangu manga sasuang piạ ual᷊ine waugʼi sai-sain mělẹ̌hěnsinuang e, ěntana ene al᷊amatengu Ruata.

⁸ Kai kereu ěntana ene kawe mapatuwong ěhe ringangu sumpinị, ute ěntana ene tawẹ gunane, kụ sarung aneěngu Ruata kụ samurine ketewe pakasue ipakatutung.

⁹Kai manga anạ u sěmbaụ ikẹ̌kěndagẹ̌, manimbe waweraku kerene, kaiso i kami e mang mạngiaking i kamene. I kami e mạngiaking u i kamene seng nakatarimạ u limembong kapiane, kụ kai kal᷊awọu al᷊amatẹ̌ kere nakoạ buạ u kasasal᷊amatʼi kamene.

¹⁰Mawu Ruata e wal᷊inewe Ruata tạ kaadile. I Sie tawe miwawul᷊eng munara kẹ̌koateng i kamene waugʼi Sie, ringangu kakěndagʼi kamene kụ seng nịtatodẹ i kamene si Sie su tempong nẹ̌tul᷊ungu manga anạ u sěmbaụ tamba pangangimang, nạung kal᷊amona ringangu sarang orasẹ̌ ini.

¹¹I kami e měkẹ̌kahumang u mal᷊owọko i kamene sěngkatau-sěngkatau e měngkai sěntiniạ mal᷊aigasẹ̌ sarang pangěnsueěnge, sarangkewe i kamene makahombang apạeweng lẹ̌harapeng i kamene ene.

¹²I kami e tawe mapulu i kamene kawe tawẹ agise. Kai i kami e kawe mapulu tadeạu i kamene měbiahẹ̌ kere taumata makạtarimạ u apang nikědon Duata e, kahiangkewen pangangimang si Sie ringangu kahiang kakakědangu pěngangampal᷊i kamene.

¹³Piạ e Mawu Ruata nẹ̌kědo si Abraham, i Sie kai nẹ̌salu u i Sie sarung mapakasěhụ u apang nikědonʼE. Mase ual᷊ingu kawe tawẹu limembong karangẹ e wọu Mawu Ruata, tangu i Sie nẹ̌salu su arengʼE sẹ̌sane.

¹⁴ I Sie něhengetang ungkuěng, ”Iạ e nẹ̌kědo sarung měngal᷊amatẹ̌ si kau ringangu mapakal᷊awọu hěntonu.”

¹⁵I Abraham něngampal᷊ẹ̌ dingangu kakakědang, tangu i sie nakatarimạ u apang nikědon Duata e si sie.

¹⁶Kamageng u taumata e mẹ̌salu, ute kawe mẹ̌salu su arengu taumata wal᷊ine kụ limembong karangẹ e wọʼi sie, ute pẹ̌sasalu ene kai mapakasueng kal᷊awọu pẹ̌dararendehẹ̌.

¹⁷Mawu Ruata e kai mapakasahẹ suapang taumata kụ měnẹ̌narimạ u kědonʼE, u i Sie tawe sarang měmal᷊ui karakinʼE. Kai ual᷊ingu ene hakịu i Sie napakasěgadu pẹ̌sasalunʼE su pẹ̌kakakědonʼE.

¹⁸Hal᷊ẹ̌ darua ene tawe mawal᷊ui: Mawu Ruata e apawe tawẹ běke měkẹ̌konti e su hal᷊ẹ̌ u pẹ̌kakědonʼE ringangu salunʼE. Ual᷊ingu ene, i kitẹ apang seng mạkakěllung su Mawu Ruata e, ghẹ̌gěllirangu wawahansang masěgadẹ̌ baugu mangumpaedẹ̌ pakasěgadẹ̌ su pělaharapẹ̌ kụ seng mạl᷊aěmpahẹ̌ su těngong kitẹ e.

¹⁹ Pělaharapʼi kitẹ e kai kere wal᷊ango nakaị maral᷊ung-dal᷊ung dingangu nakoạ pěngangumbelekang matoghasẹ̌ dingangu tawẹ konsange apa su pẹ̌bawiahʼi kitẹ e. Pělaharapẹ̌ ene nẹ̌tahatěpasu ral᷊anse su ral᷊ungu Huang Kasusiange su Wanalan Duata su sorga.

²⁰ Mawu Yesus seng něnul᷊ěntang dal᷊eng sol᷊ong tampạ ene waugu i kitẹ, ringangu selaing nasuẹ̌ sene nakoạ Imang i kitẹ Mawantugẹ̌ e sarang marěngụ-děngụ mẹ̌sul᷊ungu i Melkisedek.