Read Sangir IBRANI 7 Bible Online

IBRANI 7 - Sangir bible

IBRANI 7

¹ I Melkisedek ini e kai ratung Salem dingangu imang u Mawu Karangetange. Piạ e i Abraham nạung nawal᷊ị bọu pẹ̌seketang kụ nakawatạ e manga ratu e, i Melkisedek diměnta naněnsomahẹ̌ dingangu něngal᷊amatẹ̌ si sie.

²Tangu i Abraham nẹ̌gěllịu sěngkapul᷊ong kapahiakengu kal᷊awọu arětạ kinauntungange. (Areng Melkisedek mangal᷊ene kahumotong-motongange ute kai, ”Ratung Kaadilẹ̌”; kụ ual᷊ingu i sie kai ratun Salem, tangu arenge piạ l᷊ai mangal᷊ene, ”Ratung Karal᷊unsemahẹ̌”.)

³Mạanung Melkisedek ini e tawẹ tatualage waebe su apa u i sie piạ i amange arau i ninange arau i upunge; tawẹ apa lai wẹ̌ken sie mạanung kal᷊aiwantele arau kapapohonge. I sie kai mẹ̌sul᷊ungu Ahusu Ruata; i sie kai imang sarang karěngụ e.

⁴Kụ i kitẹ nakasilọ e sini u kai nạung apạ e kasěllahe i Melkisedek ini e; hakịu i Abraham i upung i kitẹ e, něngonggọu sěngkapul᷊ong kapahiakengu arětạ kinaěbakenge wọu pẹ̌seketang ene.

⁵ Su ral᷊ungu toratu agamang Yahudi e seng nipato u, manga imang hěnton Lewi e hinong makaěbạ sěngkapul᷊ong kapahiakeng bọu ěbạu kawanuan Israel, bọu anạ u sěmbaụ i sire hala maningbe i sire mẹ̌sul᷊ung lawọ pal᷊ahiteng Abraham.

⁶I Melkisedek bal᷊inewe hěnton Lewi, kaiso i sie mal᷊aing měnẹ̌narimạ u sěngkatahạpul᷊ong kapahiakeng bọu patikụ apan nikauntungang i Abraham dingangu něngal᷊amatẹ̌ lai si Abraham ual᷊ingu i sie kawe seng kinawuakeng u manga pẹ̌kakědon Mawu Ruata e.

⁷Mamben tawe karendehang, u taumata kụ nial᷊amateng e kai limembong kasanạ e wọu taumata kụ něngal᷊amatẹ̌ si sie.

⁸Manga imang kụ apan nikawuakengu pẹ̌sěngkatahạpul᷊ong kapahiakeng e kai taumata kụ botonge mate. Arawe tumuhụ Bukẹ̌ Susi e; i Melkisedek kụ seng něnarimạ gaghěllị sěngkatahạpul᷊ong kapahiakeng e ene ute, kai taumata těbe wiahẹ̌.

⁹Botonge i kawera u, i Lewi — e kai hěntone kụ manarimạ u sěngkatahạpul᷊ong kapahiakeng e wọu kawanuang Israel — kụ mal᷊aing měmaehẹ̌ buạ e ene limiung Abraham su tempong i Abraham měmaehẹ̌ ene si Melkisedek.

¹⁰Manilaing i Lewi wodang ta nilẹ̌hanạ, kaiso wotonge i kawera u i sie seng ene su kal᷊uwaeng i upunge i Abraham, su tempong i Melkisedek nẹ̌sombang i Abraham.

¹¹Su l᷊imang pěmamihingu manga imangu hiten Lewi e, toratʼu agamang Yahudi e nionggọ su kawanuang Israel. Ual᷊ingu manga imang hiten Lewi nạung kal᷊amona e tawe makakakoạ sěngapa wọu apang hinong koateng i sire e, hakịu ene kai hinong piạ imang bal᷊ine, kụ mẹ̌sul᷊ungu Imang i Melkisedek, kụ sembeng bal᷊inewe lai niruị bọu ghal᷊ipohong hiten Harun!

¹²Ho, kamageng u pangkatʼu manga imange mẹ̌bal᷊ui, ute toratʼu agamang Yahudi e mal᷊aing hinong mẹ̌bal᷊ui.

¹³Kụ timonane sini ute kai Mawung kitẹ: i Sie kai wọu hěnto wal᷊ine, kụ bọu hěnto ene tawẹu sarang sěngkatau měmẹ̌munara munarang sěngkatau imang.

¹⁴Kěbị taumata e masingkạ u Mawung kitẹ e kai wọu hěntong Yehuda; ringangu i Musa e tawe něsẹ̌sěbạ u hěnto ene su tempong i sie mạhumbisarang hal᷊ẹ̌ u manga imang.

¹⁵Hal᷊ẹ̌ ipạhumbisara ini e mangkeng něngalembong katualage lai, kahian sasasěpụ u sěngkatau imang bal᷊ine kere i Melkisedek.

¹⁶I sie niruị nakoạ imang, bal᷊inewe ual᷊ingu pinẹ̌buakenge wọu kal᷊awọu parentang taumata e, kaiso kawe nẹ̌bua bọu pẹ̌bawiahe kawe kawasa e ringangu tawẹ pěhẹ̌pusange.

¹⁷ Batụu su ral᷊ungu Bukẹ̌ Susi e niwera u, ”I Kau e kai imang sarang karěngụ e, mẹ̌sul᷊ungu Imang Melkisedek.”

¹⁸Kụ orasẹ̌ ini e atorang těbe e seng nipakal᷊iu, batụu seng mal᷊ongkọ dingangu seng tawẹ gunane.

¹⁹Toratʼu agamang Yahudi e tawe makakoạ sarang manga apa kụ masukụ. Ual᷊ingu ene hakịu i kitẹ orasẹ̌ ini e nighěllirangu sěmbaụ pělaharapẹ̌ něngalembong kapiane; kụ kai ual᷊ingu ene hakịu i kitẹ e makạkaraning Duata e.

²⁰Kutẹu l᷊ai patikụ ene rẹ̌děndinganengu l᷊ai sasalu wọu anun Duata e. Tawẹ apa pẹ̌sasalu kerene su tempong manga imang bal᷊ine e niruị.

²¹ Arawe Mawu Yesus e niruị nakoạ imange kai piạ salune, su tempong Mawu Ruata e něhengetang si Sie, ”Mawu e seng nẹ̌salu, kụ i Sie seng tawe měmal᷊ui kapulunʼE, ’I Kau e kai imang sarang karěngụ e.’ ”

²²Dingangu ene lai Mawu Yesus e nakoạ tatal᷊ung baugu sěmbaụ pẹ̌kakakědo kụ limembong kapiane.

²³Piạko l᷊ai hal᷊ẹ̌ sěmbaụ: kụ manga imang bal᷊ine e kai mal᷊awọ, batụu i sire sěngkatau-sěngkatau e něngkairị, hakịu tawe makapěněpasu pangkatʼi sire.

²⁴Kai arawe i Yesus e wiahẹ̌ sarang karěngụ e, kụ pangkatʼE kawe sěngkatau imange tawe nailasẹ̌ su taumata wal᷊ine.

²⁵Ual᷊ingu ene sarang karěngụ e Mawu Yesus e makạsal᷊amatẹ̌ si sai-sai ruměnta su anun Mawu Ruata lumiun Sie, batụu i Sie e wiahẹ̌ sarang karěngụ e mědeạu mapẹ̌darumatingu kakindoạ su Mawu Ruata e waugʼi sire.

²⁶Kụ i Yesus e tangu kai Imang Mawantugẹ̌ gẹ̌gausang i kitẹ e. I Sie kai susi; kụ si Sie tawe kaěbakeng pẹ̌sasal᷊a, arau rosa měnsang a. I Sie nitěntani wọu taumata waradosa e, ringangu nihengkẹ sol᷊ong tampạ kụ něngalembong karangẹ e wọu manga l᷊angị e.

²⁷ I Sie wal᷊inewe kere manga imang mawantugẹ̌ bal᷊ine e, kụ apang kal᷊aěllo e měngkai mạnarakangu sasěmbae ual᷊ingken dosang sire hala nạung kal᷊amona e, bọu e wuhụewe ual᷊ingu kal᷊awọu rosang sěngkawanuaěnge. Mawu Yesus e kětạengbeng sěnsul᷊e něnarakang u sasěmbane waugu sarang marěngụ-děngụ, piạ e i Sie něnarakang u watangengʼE hala nakoạ sasěmba.

²⁸Toratʼu agamang Yahudi e kai mělẹ̌hengkẹ u taumata apang tawe masasukụ ipakakoạ imang mawantugẹ̌. Kaiso samuring toratẹ̌ ene, Mawu Ruata e nẹ̌taingu pẹ̌kakědone apidu nẹ̌salu u i Sie kai měhengkẹ u Ahuse makoạ Imang Mawantugẹ̌, e kụ seng nikoạ Měnanal᷊amatẹ̌ kụ nasukụ baugu sarang karěngụ e.