Read Sangir YAKOBUS 1 Bible Online

YAKOBUS 1 - Sangir bible

YAKOBUS 1

¹ Manga anạ u sěmbaụ patikụ dal᷊ohon jamạatʼu Mawu nakeke su kaguwạu dunia! Tabeạ bọu iạ i Yakobus ěllangu Mawu Ruata, ringangu ěllangu Mawu Yesus Kristus.

²Manga anạ u sěmbaụ! Kereu i kamene makạhombang haghi-haghin sasal᷊ukạ, ute měngkai lẹ̌ěnnaweng kamene e ral᷊uasẹ̌.

³Batụu i kamene masingkạ, u kamagengu i kamene kạtatanabẹ mạngimang su Mawu e su tempong i kamene kẹ̌kahombangeng u sasal᷊ukạ, kụ ual᷊ine ute: i kamene makẹ̌dang.

⁴Pakarariagạ bue tadeạu kakakědangu naung i kamene e měngkai mạhuntinamba sarangkewe i kamene těnga-těngadẹ̌ měngkasukụ mase tawe kakawusangu apa.

⁵Kereu piạu sěngkatau wọu tal᷊oarang kamene e kawe riọ longong, ute pẹ̌gausẹ̌ko su Mawu Ruata e i sie, kụ Duata e sarungbe měngonggọu kapapelesa si sie; batụu su taumata pẹ̌sěngkatau e Mawu Ruata seng nangonggọ dingangu naunge mal᷊uasẹ̌ nẹ̌papinunụ u kakěndagẹ̌ e.

⁶Kaiso i sain měgẹ̌gausẹ̌ e, harusẹ̌be mangimang; u i sie tawe wotonge ria-ria. Batụu taumata ria-ria e kai mẹ̌sul᷊ungu wělladẹ̌ tẹ̌tiukang u anging tamai-ramahi.

⁷Taumata kerene tangu tiněnnane tawe matatuntụ; i sie tawe makaěbạ ual᷊ine apa wọu kěbị apang kinoạ e. Ual᷊ingu ene tangu abe pangiral᷊ingu kai makaěbạ apa-apa wọu anun Mawu e.

⁹Tau Sahani apang kasiang e pakaral᷊uasẹ̌ bue kereu Mawu Ruata e měhengkẹ i sie.

¹⁰ Dingangu tau Sahani apang kalạ e pakaral᷊uasẹ̌be lai kereu Mawu Ruata e mapakasanạ i sie. U taumata kalạ e sarung mapuạ kere wurạu pěpạ.

¹¹Su tempong matangěllọ e siměbangke ringangu pědise maihạ e, tangu pěpạ e sarung malolang, kụ burạ e mahondosẹ̌, mase kal᷊aholẹ e sarung matadise. Kerene lai taumata kalạ e sarung maghạgol᷊ẹ̌ su tempong i sie kạpěmunarane.

¹²Kariangkamang i sain makědang su tempom makạhombang bawodaị. U sarạeng i sie nakararagẹ̌ nẹ̌tatahang su ral᷊ungu wawodaị ene tangu, i sie sarung makatarimạu tatendenge, kụ kai pẹ̌bawiahẹ̌ nạung seng nikědom Mawu Ruata e si sai-saing kụkěndagu Ruata e.

¹³Kereu pẹ̌sěngkatau e kẹ̌kasal᷊ukatengu wawodaị kerene ute, abe pẹ̌berau, ”Sasal᷊ukạ ini e asal᷊e kai wọu anun Mawu,” batụu Mawu e tawe kasasal᷊ukatengu ral᷊aị, dingangu l᷊ai tawe měnal᷊ukạ si sai-sai.

¹⁴Kaiso taumata e kẹ̌kasal᷊ukateng kereu i sie wẹ̌bol᷊engang dingangu wẹ̌bitaugangu ěnning e ral᷊akị.

¹⁵Bọu ene, kamagengu ěnninge ral᷊akị ene tuhukang, ute měhanạ u rosa; kụ kamageng u rosa e naghurangke, ute katewe papate aị e.

¹⁶I kamene piawe kaakal᷊eng, ei manga anạ u sěmbaụku ikẹ̌kěndagẹ̌!

¹⁷Apang gaghěllị mapapia ringangu paporoseěng masasukụ e darěntane kai wọu sorga, nipakatěntungu Ruata, Něndiadi patikụ tualagẹ̌ su l᷊angị. I Sie kai Ruata ta mẹ̌bawal᷊ui, ringangu tawe lai makakarěntang kararěndung.

¹⁸Kai ual᷊ingu kapulunʼE hala i Sie napakariading kitẹ manga anạʼE ual᷊ingu katěngadu hengetangʼE. I Sie měkẹ̌koạ kerene tadeạu i kitẹ e makahombang tampạ kal᷊ěnggihange wọu patikụ diadikangʼE.

¹⁹Pakakakěllai wue ini e pakapia manga anạ u sěmbaụ ikẹ̌kěndagẹ̌! Sěngkatau-sěngkatau e měngkai pakasasahawụ dumaringihẹ̌, kaiso pakatěmudẹ̌ mẹ̌bera ringangu pẹ̌tingkědang bue mẹ̌pědu.

²⁰U taumata pědu e tawe makakoạ munara mapia, kụ makal᷊uasẹ̌ naungu Mawu e.

²¹Ual᷊ingu ene tangu, hipeko kal᷊awọu apang lulu maral᷊amuhụ dingangu ral᷊akisẹ̌ e. Daekengkong kasasanạu naung, bawera nisuangu Ruata e su naung i kamene, batụu wawera ene kai makạtoghasẹ̌ pěngangambang si kamene.

²²I kamene kěngkakoạko tumatuhụ apang hengetangu Ruata, kumbahang kětạeng dumararingihe, batụu kai makạakal᷊ẹ̌ batangeng i kamene.

²³I saing makạdingihẹ̌be hengetang u Mawu kaiso tawe mẹ̌kakoạ ene, ute kai mẹ̌sul᷊ungu taumata kapẹ̌mẹ̌mandane ghatine su kasěnaěng.

²⁴Sarạeng i sie nakasilọ e mapia-pia watangenge, mase rimal᷊engke kụ apidu niwul᷊eng gatine měnsang kai kerea nạung kakakoạ e.

²⁵Toratʼu Mawu e nasukụ dingangu piạ kuate mapakal᷊iwiru taumata. Kụ i sain měnẹ̌naněsui ringangu měnẹ̌naungbe mapia ringangu mẹ̌děndal᷊engben toratẹ̌ e, kụ bal᷊inewe kětạeng dumararingihe kụ bọu ene kawe niwul᷊eng ene, ute i sie sarung al᷊amateng u Mawu sural᷊ungken patikụ munara kẹ̌koateng e.

²⁶Kereu pẹ̌sěngkatau makạpěndang batangenge maagama, kaiso wěgawe mangědahẹ̌ lilane e, ute i sie mạngakal᷊ẹ̌ batangenge; pěngangagaman tau ene e tawẹ kěhase.

²⁷Pěngangagama wurěsi ringangu tutune tumuhụ tingirangʼu Mawu Ruata, ute kai: mẹ̌tul᷊ungu manga rariọ kasisi ringangu manga wawine wal᷊u su sigěsạ i sire, ringangu mědẹ̌dariagạewelain batangeng tadeạu kumbahangbe ipakagholọu dunia ini.