Read Sangir YAKOBUS 2 Bible Online

YAKOBUS 2 - Sangir bible

YAKOBUS 2

¹Manga anạ u sěmbaụku! I sain mạngimang su Mawu Yesus Kristus, Mawu Kawantugange, kumbahangbe i kamene mapẹ̌dal᷊ahaen taumata kụ kai měmẹ̌mile ghati.

²U kereu piạ sěngkatau kalạ mělẹ̌luhen sinsing bul᷊aeng dingangu pakeange mal᷊ěnggihẹ̌ kụ diměnta su komol᷊ang i kamene, bọu ene riměntako l᷊ai sěngkatau kasiang něluhen pakeange naghaghonaị,

³tangu i kamene kawe limembong kaadate su tau pakeange mal᷊ěnggihẹ̌ e. I kamene kai manga mẹ̌bera si sie, ”Tuang! Kaiangko su kadera mal᷊ěnggihẹ̌ ini e.” Arawe su tau kasiang ute i kamene kawe měmpẹ̌berau, ”Darisịko paise,” arau ”Kaiangko wawa su masanạ e.”

⁴Ual᷊ingu pẹ̌kakoạ kerene tangu, i kamene seng nẹ̌koạ pẹ̌dal᷊ahaedẹ̌ sutal᷊oarang kamene ringangu měngẹ̌ngarěgan taumata e tụtuhụ tiněnnang kamene mal᷊amuhụ.

⁵Pěmpẹ̌tahěndungko, i kamene manga anạ u sěmbaụ ikẹ̌kěndagẹ̌! Tau kasiang su dunia ini e, nipilen Duata apakạkalạ su pěngangimang. Taumata ene sarung makoạ dal᷊ohong kawanuan Duata mẹ̌sul᷊ungu nikědon Duata su taumata apang kụkěndagʼi Sie.

⁶Kai i kamene maal᷊ạ be měmpạnamedẹ̌ taumata kasiang e, sěmbal᷊iau kawe makakalạ e měmpạnědạ i kamene ringangu mạnuhudi kamene sol᷊ong pěnggaghutaěnge.

⁷Seng i sire ene měmpělẹ̌hodatẹ̌ areng mawantugẹ̌ e niraekang i kamene wọu anun Duata!

⁸ I kamene měmpẹ̌kẹ̌koạbe katul᷊idẹ̌ e kereu i kamene mẹ̌děndal᷊engben toratʼu kararatuang kụ kẹ̌kaẹ̌bakeng su ral᷊ungu Bukẹ̌ Susi ini: ”Kěndagu sěndinganengu taumata e kerẹewe lai kuměndagu watangengu e.”

⁹Kai kereu i kamene kawe mạmile ghati ute, i kamene kai měmpědẹ̌dosa, kụ toratʼu Mawu e mělẹ̌lahẹu i kamene kai lụlampa tita.

¹⁰I sain lumampa piạu sěmbaụ bọu patikụ titang Mawu e ute limampa kěbị.

¹¹ U i sain něhengetang, ”Kumbahang mawuang,” i Sie lai něhengetang u, ”Kumbahang mamate.” Kụ kamagengu i kamene tawe nawuang, o kawe namate, tangu i kamene mal᷊aing rumal᷊ampa titang Mawu e.

¹²Pěmpẹ̌berạe ringangu pěmpẹ̌koạ e kere taumata kụ sarung gutaěng tuhụ titang Mawu e kụ makal᷊iwirẹ̌ taumata.

¹³U Mawu Ruata e tawe manodẹu tatal᷊ěntụ e si sain běgang tatal᷊ěntụ. Kaiso tatal᷊ěntụ e limemboweng katoghase wọu pělahukunge!

¹⁴Manga anạ u sěmbaụ! Apa wue gunane taumata mẹ̌berau, ”Iạ e taumata mạngimang,” kereu i sie tawe manodẹu kakanoạ e? Botonge pangangimang kerene makaambang si sie?

¹⁵Kereu sěngkatau wọu manga anạ u sěmbaụ tamba pangangimang měgẹ̌gausẹ̌ pakeang arau nikakawusangu laidopẹ̌ měllo-měllo e.

¹⁶Apạ e gunane kụ i kamene mẹ̌bera si sie: ”Pěmpěluhẹ e pakeang i kamene pakatukusẹ̌ dingangu pěmpẹ̌kaěngke pakaral᷊aedẹ̌!” — kereu i kamene tawe měmpěngonggọu apang gẹ̌gausange gunang ipẹ̌biahẹ̌ e?

¹⁷Kerene lai taumata mạngimang, kereu tawe ilahẹ su kakanoạ tangu, pangangimang ene e tawẹ gunane.

¹⁸Aramanung piạ u mẹ̌bera, ”Piạben taumata mạngumbala su pangangimange ringangu piạu l᷊ai mạngumbala su kakanoạ e.” Iạ e sarung sumimbang u, ”Todẹko si siạ kereapa taumata makapěnaghuang pangangimang tawẹ kakanoạ e ringangu iạ e sarung mapakal᷊ahẹ dingangu kakanoạ u iạ e kai mạnaghuang pangangimang.”

¹⁹I kamene mạngimang u Ruata e kětạbeng sěmbaụ arau ěng? Kụ, manga setang e mal᷊aing mạngimang hakịu i sire kụkendeng takụ!

²⁰I kamene mambeng bodokẹ̌! Kụ apa měnsang hinong ipakal᷊ahẹ si kamene u tawẹ gunane piạ pangangimang kụ tawẹ kakanoạ e?[1]

²¹ Kakěllạewe si Abraham i upung i kitẹ. I sie nitarimạbe mapia kahian Duata ual᷊ingu kakanoạ e kụ su tempong i sie něnarakang i Ishak, anạ e, su Mawu Ruata su pananěmbaěng.

²²Sini e nal᷊ahẹ u pangangimange harusẹ̌ ilahẹ dingangu kakanoạ tadeạu masukụ.

²³ Ene ute sěndal᷊engu ayetu Bukẹ̌ Susi e, ”I Abraham mạngimang su Mawu Ruata, kụ ual᷊ingu pangangimange tangu Ruata e něnarimạ i sie mẹ̌sul᷊ungu taumata měkẹ̌koạ kapulun Duata.” Kai ual᷊ingu ene hakịu i Abraham nisěbạ, ”Hapịu Mawu Ruata”.

²⁴Kụ nal᷊ahẹ e ini, u taumata kụ nitarimạ u Ruata mapia ual᷊ingu apan nikoạ e, kụ bal᷊inewe kětạeng ual᷊ingu pangangimange samatang.

²⁵ Kakěllạe lai si Rahab, bawine tahapẹ̌sundal᷊ẹ̌ ene. I sie nitarimạ u Mawu Ruata e mapia ual᷊ingu kakanoạ e, kụ piạ i sie něnarimạ u mẹ̌kakakoto tau Israelẹ̌ e, su wal᷊ene ringangu nẹ̌tul᷊ung i sire nipatal᷊ang u watangeng i sire e wọu ral᷊eng bal᷊ine.

²⁶Kụ kerẹewe wadang kụ tawẹ rohkẹ̌ e ute kai wadang nate, kerene lai pangangimang tawẹ kakanoạ e ute kai pangangimang nate.