Read Sangir 1 PETRUS 2 Bible Online

1 PETRUS 2 - Sangir bible

1 PETRUS 2

¹Batụu ene, ute hipẹ e kal᷊awọu kararal᷊aị bọu watangengu; kumbahang měngkai mělinga; ringangu kal᷊awọu haghin pěmamělle. Kumbahang sumingking dingangu kumbahang měhinakang bal᷊ine.

²Kěnangko i kamene kěngkakoạ kere manga rariọ buhu piněhanạ, měngkai hanesẹ̌ mạdoun susu marohkẹ̌ tạl᷊aụe. Dingangu kerene i kamene sarung tumendang dingangu iapakasal᷊amatẹ̌.

³ Su ral᷊ungu Winohẹ Susi mạbawohẹ kere ini, ”I kamene seng nakapěndang hala kereapa kapian Mawu e.”

⁴Batụu ene, děntạ e su anun Mawu, i Sie kai tabidạu watu wiahẹ̌, batu kụ nirěmmẹu taumata ual᷊ingu tawẹ gunane, kaiso pinilen Duata e kai kere watu maarẹ̌ga.

⁵I kamene e kai mẹ̌sul᷊ungu manga watu wiahẹ̌. Tangu i kamene kěngkapuluko ipělanging Banalan Duata kụ paněmbaěngu sasěmba marohkẹ̌. Kamageng kerene ute i kamene měngkakoạbe manga imang, měbẹ̌biahẹ̌ sěmatang baugu Ruata ringangu wọu anun Yesus Kristus e maněmban sasěmba mararohkẹ̌ e makạl᷊ahimpulu Mawu Ruata e.

⁶ Ual᷊ingu su ral᷊ungu Winohẹ Susi mạbawohẹ kere ini, ”Iạ e kai seng němile batu sěmbaụ maarẹ̌gae, Takụ nipěllọ su Sion kere watu pinẹ̌bukuange; kụ i sain mangimang si Sie e semben tawe ipakamea.”

⁷ Batu ene kai mamben maarẹ̌ga e waụgʼi kamene apan měmpạngimang e. Kaiso si sain tawe měmpạngimang e, kinahinoěngu manga ayetʼu Winohẹ Susi kere ini, ”Batu kụ kinạdiring manga mẹ̌kakoạ bal᷊e e, samurine kawe nakoạ batu pinẹ̌bukuange,”

⁸ dingangu ”Kai watu nakoạ kinatanggaěng, dingangu nikasangkonang kụ nakakanawo si sire.” I sire něngkasangkong u i sire kai tawe měmpěngangimang hengetangu Mawu Kasěllahenge. Kerene seng nisahẹu Ruata i sire.

⁹ Arawe i kamene kai wansa pinile, manga imang kụ němpẹ̌tangkiang datu e, wansa susi, nitěntani waugu Ruata, kinaual᷊i tataghuanenge sẹ̌sane. Mawu Ruata e němile si kamene ringangu nẹ̌kui si kamene nipasẹ̌bang bọu kararěndung mase ipasuẹ̌ su tualage makạnaniange, tadeạu iapạmombengu habaru kapapianʼE tawẹ sihinge.

¹⁰ Nạung deng kal᷊amona, i kamene e wal᷊inewe kawanuane, arawe orasẹ̌ ini e ute i kamene seng nakoạ kawanuan Mawu Ruata, nạung deng tawe itatal᷊ěntụ ini e semben tẹ̌tal᷊ěntukang.

¹¹Manga anạ u sěmbaụ ikẹ̌kěndagẹ̌! I kamene kai taumata raghị dingangu měnananumpang su dunia ini. Ual᷊ingu ene iạ mẹ̌dẹ̌dorong sěngapam botonge tadeạu i kamene kumbahang měngkai tụtol᷊e abul᷊ing taumata kụ měngkai masau mẹ̌sekẹ u himukudẹ̌.

¹²Pakal᷊audupẹ̌ko měmpẹ̌biahẹ̌ sutal᷊oaran taumata kapirẹ̌ kụ harusẹ̌be limembong kapiaěnge, hakịu kamageng i sire měmpěngantangu i kamene kai taumata ral᷊aị, pěngěnsueěnge ute i sire kawe makahěngangbe kapiang kamene, kụ sarung mẹ̌dalo Mawu Ruata e su ěllọen darěntanʼE.

¹³Baugu Mawu e tangu, i kamene ute pakasasuměllungko su apan těmbonangu kawanua; walạewe měnsang su kaisarẹ̌ nakoạ těmbonange kasariaěnge,

¹⁴arau walạewe su manga guběrnurẹ̌ kụ nitẹ̌bọu Kaisar ipěhukung taumata měkẹ̌koạ dal᷊akisẹ̌ dingangu waụgu ipẹ̌dalọewe apang kakanoạ e mapapia e.

¹⁵Batụu Mawu Ruata e mapulu tadeạu ual᷊ingkeng kakanoạu mapapia e tangu i kamene makaghěmming pal᷊ahumbisaran taumata longong.

¹⁶I kamene pěmpẹ̌biahẹ̌ko kere taumata wal᷊ine ěllang, kai kumbahangbe makoạ l᷊ahěmbungu kakanoạ i kamene ral᷊akisẹ̌, kaiso kakoạko kere sěngkatau ěllangu Mawu Ruata e.

¹⁷Pěngarẹ̌gawem patikụ taumata e, kěndagẹ̌ben manga anạ u sěmbaụ lawọ taumatan Sahani. Katakụben Mawu Ruata e, ringangu pěngadatẹ̌ kaisarẹ̌.

¹⁸Manga anạ u sěmbaụ apan nakoạ mẹ̌tatangkiang, pakasasuměllungko su manga mawung kamene, wal᷊inewe kětạu su apam mapapia ringangu mal᷊ahimumu e, kaiso su apạewen lai maral᷊ahẹgisẹ̌.

¹⁹Mawu Ruata e sarungbe měngal᷊amatẹ̌ si kamene, kamageng i kamene makahěngangbe kapulun Duata, makakẹ̌dang mẹ̌tatahangu pẹ̌kakakoạu tawẹ katul᷊ide.

²⁰U kai apawue lembone kamagengu i kamene makẹ̌dang mẹ̌tatahangu ral᷊imadẹ̌ tẹ̌tagheěng i kamene ual᷊ingu pẹ̌sasal᷊a tangu? Kai arawe kereu i kamene makẹ̌dang měnal᷊udẹ̌ sigẹ̌sạ lụhombang si kamene ual᷊ingu pẹ̌kakakoạ apan matul᷊idẹ̌ e, tangu Mawu Ruata e měngal᷊amatẹ̌ si kamene.

²¹Kai waugu ene ho, Mawu Ruata e hakịu nẹ̌kui si kamene. U i Kristus sẹ̌sane seng nẹ̌tatahang baugʼi kamene, dingangu ual᷊ingu ene tangu i Sie nangonggọu sěmbaụ kakakěllaěng tadeạu i kamene tumol᷊e ěnnạu laedʼE.

²² I Sie tawe nẹ̌koạ dosa, ringangu tawẹ sarang sěngkatau l᷊ai makạdingihẹ̌ i Sie měkẹ̌konti.

²³ Piạ e i Sie rẹ̌dohangeng, i Sie tawe němal᷊isẹ̌ dingangu rarohang. Su tempon i Sie nisigẹ̌sạ, i Sie tawe manga něngindorẹ; i Sie kětạewen něnarakangu pěngangumbalane su Mawu Ruata, Měnggaghuta kụ adilẹ̌ e.

²⁴ I Kristus sẹ̌sane e němasaěng kakěpal᷊u rosang kitẹ e su watangengʼE su wowong kalu kuruisẹ̌ tadeạu i kitẹ e mal᷊iu wọu kawasan dosa e ringangu mẹ̌biahẹ̌ tumuhụ kapulun Duata. Kai ual᷊ingu manga lesẹ i Kristus e nakakapia si kamene.

²⁵Nạung i kamene e kere domba něngkapal᷊idẹ̌ e, kai arawe su orasẹ̌ ini e i kamene seng niapẹ̌bal᷊ị kapia pạtol᷊e Měndal᷊ukadẹ̌ e ringangu Měnanahimata himukudʼi kamene e.