Read Sangir 1 PETRUS 3 Bible Online

1 PETRUS 3 - Sangir bible

1 PETRUS 3

¹ Kerene lai i kamene manga wawine, pakasasuměllung su kawingʼi kamene tadeạu kamagengu wọu tal᷊oaran sire e piạ u tawe měmpangimangu hengetangu Mawu Kasěllahenge, ute kakanoạ i kamene mapia e makakawal᷊uin sire kụ měmpangimang. Kụ seng tawahal᷊uasu i kamene mẹ̌berang apa-apa si sire,

²u i sire e makạsilo kakanoạ i kamene wurẹ̌si ringangu mal᷊aagimatẹ̌.

³ Karal᷊ěnggihʼi kamene e abe kawe kětạeng mělẹ̌l᷊ěnggihẹ̌ likude, mangạe pěnanal᷊apidẹ̌ utạ arau pẹ̌papakẹu ral᷊ẹ̌gahẹ̌ bul᷊aeng, arau pẹ̌papul᷊awengu pakeang maral᷊ěgadẹ̌.

⁴Kaiso, ral᷊ěgahi kamene e kěnangko pasěpụ bọu ral᷊ungu naung, kapia ringangu kasasikome naung dingangu marěmasẹ̌; ene ute kai kal᷊aholẹ ta kumakawusẹ̌ dingangu limembong kaarẹ̌gane tumuhụ silom matang Mawu Ruata.

⁵Dingangu kakakoạ kere ini ute su tempon nạung manga wawine mal᷊aagama mělẹ̌harapẹ̌ su Mawu Ruata mẹ̌těngkaholẹ u watangeng ute mẹ̌těngkasuměllung su kawingi sire.

⁶ I Sara e mal᷊aing kerene, i sie mararingihẹ̌ si Abraham dingangu makịtuang si sie. Orasẹ̌ ini e i kamene kai nakoạ anạ i Sara, kamagengu i kamene měmpẹ̌kẹ̌koạbe mapia ringangu tawe matatakụ u walạewe apa.

⁷ Dingangu kerene lai i kamene manga esẹ e, pěmpẹ̌biahẹ̌ko pakatatahuěnna su kawing i kamene, batụu i sire kawe wansa lome. Lẹ̌adate wue i sire, watụ u i kamene kawe sarung sěngkapěnarimạu tatal᷊ěntụu pẹ̌bawiahẹ̌ kakalẹ̌ bọu anun Duata. Kụ kẹ̌koạkong kamene ho ene, tadeạu tawe makapetọ pẹ̌kakal᷊iomaneng i kamene.

⁸Kasasueěnge ute: pakasasěngkanaungko i kamene. Pěmpẹ̌kakakěndagẹ̌ko i kamene sěmbaụ dingangu wal᷊ine e kerẹewe lawọ anạ u sěmbaụ. Kụ pěmpẹ̌tatal᷊ěntụ bue ringangu pakasasanạ bue naung i kamene.

⁹Kumbahangbe měmal᷊isẹ̌ dal᷊akị dingangʼu ral᷊akị arau rarohang dingangu rarohang, kaiso pěmal᷊isẹ̌kon dingangu pẹ̌dorong al᷊amatẹ̌ bọu anun Duata. U kai Ruata e nẹ̌kui si kamene hatede, tadeạu i kamene měnarimạ u al᷊amatẹ̌ bọu anun Sie.

¹⁰ Su ral᷊ungu Winohẹ Susi mạbawohẹ kere ini, ”I sain mapulu kuměndagu pẹ̌bawiahẹ̌ e ringangu mapulu makasilo ěllo mapapia e, ute pangẹ̌dahu lilane mẹ̌bisara wisara raral᷊akisẹ̌ e ringangu pěmatal᷊u wiwihe mẹ̌bisara wisara konti.

¹¹I sie harusẹ̌ mětěngkarau wọu kararal᷊akisẹ̌ e ringangu mẹ̌koạ mapia; kụ i sie pẹ̌tatuměgal᷊ẹ̌ kong kạguwạu ral᷊ungu naunge waụgu makahombang pẹ̌darame.

¹²Batụu Mawu e mang hanesẹ̌ mạnitị si sai-sain tụtuhụ kapulunʼE dingangu Mawu e měngkate hanesẹ̌ dudaringihẹ̌ kakal᷊iomaneng i sire, kai arawe Mawu e rudokạ si sai-sain měkẹ̌koạ dal᷊akisẹ̌ e.”

¹³I sai tangu mẹ̌koạ dal᷊akị si kamene, kereu i kamene makěhagẹ̌ měmpẹ̌koạ mapia?

¹⁴ Kaiso manilaing i kamene harusẹ̌ mẹ̌tatahangu sunsara ual᷊ingu pẹ̌kakoạ mapia, kai i kamene mang masal᷊amatẹ̌! Abe kěngkatakụ i sai-sai, ringangu abe ghěnggang.

¹⁵Arawe su ral᷊ungu naung i kamene, ute kěnangko i kamene lụlohon sili su wowon adatẹ̌ su Mawu i Kristus sěntarangkeng kawantugu kararatuangu Mawu. Dingangu i kamene měngkai sěntiniạ sadia sumimbahẹ̌ kěbị apang kakiwal᷊on taumata mạanụen pělaharapʼi kamene.

¹⁶Kai mapiawe koạ i kamene ringangu kasasikome naung dingangu maadatẹ̌. Dingangu kěngkatilangko ral᷊ungu naung i kamene e tadeạu kereu i kamene měngkai tẹ̌telorang ual᷊ingu i kamene měmpẹ̌bẹ̌biahẹ̌ mapia tụtol᷊e si Kristus e, tangu i sire apan měmpạnelorẹ̌ si kamene e měngkasamedu kakakoạ i sire hala.

¹⁷Mạěndokangbe masunsaram pẹ̌kakoạ mapia — kereu ene kai kapulun Duata — sul᷊ungʼu masunsaram pẹ̌kakoạ dal᷊akisẹ̌ e.

¹⁸Batụu i Kristus sẹ̌sane mang kětạeng sěnsul᷊e nairị[3] baugu sarang karěngụe ual᷊ingken dosan taumata — u sěngkatau tawẹ sal᷊ane, nairị baugu taumata apan nẹ̌sal᷊a. I Kristus nẹ̌koạ kerene tadeạu i Sie makapamihing si kamene sol᷊ong anun Mawu. I Sie nipate tuhụ mawadang, kaiso kawe niapẹ̌bangung kapia tuhụ marohkẹ̌.

¹⁹Su ral᷊ungu kakakoạ u rohkẹ̌ e i Sie rimal᷊eng něhabaru hengetangu Mawu e su rohkẹ̌ mạtatahungkụ:

²⁰ kụ kai rohkẹ̌ u taumata apan tawe tumatuhụ su Ruata e nạung su tempon Noakẹ̌. Su tempo ene Ruata e měngẹ̌ngampal᷊ẹ̌ dingangu kasasabarẹ̌ karěngụeweng i Noakẹ̌ kạkoạe kapal᷊e. Kětạewen taumata apang su kapal᷊ẹ̌ e samatang — kěbịe ual᷊ung katau — kụ nipakasal᷊amatẹ̌ bọu ralulung masaria ene.

²¹Kụ, kakakoạ ene tangu makoạ kere tabidạu papinintung sasahani kụ orasẹ̌ ini e makaambang si kamene. Sasahani ini e wal᷊inewe tumbạu ipạnguhasẹ̌ lěngkụ u awạ u apan tamararenọ e, kaiso kawe makoạ kere pẹ̌kakědong kamene su Ruata e wọu ral᷊ungu naung i kamene mapia e. Pěnanahani ene makaambang si kamene ual᷊ingu i Yesus Kristus seng nẹ̌bangung kapia wọu kapapohonge,

²²ringangu seng nakoạ sol᷊ong sorga e. Kụ orasẹ̌ ini i Sie kawasa, mạiang su koanengu Mawu Ruata ringangu mẹ̌pẹ̌parenta patikụ malạekatẹ̌ e ringangu patikụ mangangawasa ringangu patikụ kuatu mararohkẹ̌.