Read Sangir 1 PETRUS 4 Bible Online

1 PETRUS 4 - Sangir bible

1 PETRUS 4

¹Ual᷊ingu i Kristus seng nasunsara tuhụ mawadange, ute i kamene pěmpěnoghasẹ̌ben batangeng i kamene su karaki kerene. Batụu taumata masunsara tuhụ mawadange semben tawe mẹ̌koạ pẹ̌sasal᷊a.

²Ual᷊ingu ene ute i kamene pěněpasẹ̌kom pẹ̌bawiahi kamene su dunia ini e tuhụ kapulun Duata e ringangu wal᷊inewe tụtuhụ ěnningu taumata.

³Su tempo nal᷊iu, i kamene nạungbe riọ marěngụ mẹ̌kẹ̌koạ apang kẹ̌koatengu taumata apam běgawe mẹ̌kiral᷊a Mawu. Mamben dal᷊akisẹ̌ pẹ̌bawiahʼi kamene. I kamene nạung měngkate mạhimatụ sahigẹ̌, mẹ̌těngkiwukang, pẹ̌bawawusang kakaěng, dingangu pěnganginung dingangu lai měmpạněmba mahan duata e makạdarěnting.

⁴Orasẹ̌ ini e taumata apam bẹ̌gan Mawu e, mạherangu i kamene e tawe tumatol᷊e mẹ̌biahẹ̌ kere i sire, mẹ̌barạdosa tawẹ ědone. Kai ene hakịu i sire měmpẹ̌numea si kamene.

⁵Kai tangu i sire e hẹ̌dowen hinong mẹ̌habaru sasimbahʼi sire su Mawu Ruata kụ seng sadia měhukungu taumata wiahẹ̌ dingangu nate.

⁶Kai ene hakịu Injilẹ̌ e seng bọu nihabarẹ̌ lai su taumata apan seng nate. Timonane ute tadeạu i sire kụ seng nịlahukung tuhụ mawadang — kerene lai patikụ taumata e sarung ihukung — makapẹ̌biahẹ̌ tuhụ marohkẹ̌, sěndal᷊engu kapulun Mawu Kasěllahenge.

⁷Patikụ sạbarange semben maraning pangěnsueěnge, ual᷊ingu ene ute i kamene kěnangko masingkạ mangěnna watangeng dingangu pakal᷊aingatẹ̌, takadeạu i kamene makapẹ̌kal᷊iomaneng.

⁸ Kasariange ute: i kamene mamben pakaghaghughul᷊ẹ̌ měmpẹ̌kakěndagẹ̌ sěmbaụ dingangu wal᷊ine, u kahiạen pẹ̌kakakěndagʼi kamene e ute makahěmbungbe kal᷊awọu rosa.

⁹Mal᷊owọko mạhandangenang bọu wal᷊e sěmbaụ sol᷊ong bal᷊e wal᷊ine e tawẹ ěnggụe.

¹⁰I kamene sěngkatau-sěngkatau e seng nakahombang gaghěllị mẹ̌tẹ̌tatěntang bọu Mawu Ruata e. Batụu ene, kere matataghul᷊imane mapapia su apang gaghěllị u Ruata e, ute kěnangko i kamene pěmpẹ̌tatinggụkon kapapelesa gaghěllị ene waugu makapia l᷊awọ.

¹¹Taumata apam mělahabaru injilẹ̌ e, ute harusẹ̌be pěhabaru injilu Mawu Ruata; i sain mẹ̌tangkiang taumata wal᷊ine e, harusẹ̌be pẹ̌tangkiangu kuatẹ̌ bọu anun Mawu Ruata, tadeạu su ral᷊ungu patikụ sạbarange, Mawu Ruata e ipakawantugẹ̌ ual᷊ingu i Yesus Kristus. Kai i Sie piạ kawasane, ringangu hinong bantugang sarang marěngụ-děngụ. Aming.

¹²Manga anạ u sěmbaụ ikẹ̌kěndagẹ̌! I kamene e orasẹ̌ ini e tumanịu masunsara watụ u kai wẹ̌banikateng. Kaiso arịebe kěngkaherang, tabidạu piạ hombang nariadi nakananiang sutal᷊oarang kamene.

¹³Sal᷊ạanune, kai pěmpahul᷊uasẹ̌ i kamene watụ u kawe nẹ̌těngkapẹ̌tatahang dingangʼi Kristus. Tangu hědon sarung kawawantugʼi Kristus e semben ilahẹ ute i kamene sarungbe měmpahul᷊uasẹ̌.

¹⁴Barạuntu i kamene kereu heghesang ual᷊ingu i kamene nakoạ tumatol᷊e si Kristus. Ene e kai tandane Rohkẹ̌ u Ruata mawantugẹ̌ e kai ene ringangi kamene.

¹⁵Kumbahangbe piạu sěngkatau sutal᷊oarang kamene e nasunsara kahiam pěmamate, arau tahatako, arau tahapẹ̌koạ dal᷊aị, arau kinahiang i sie měngkai rụl᷊aụ urusangu wal᷊ine.

¹⁶Kaiso kamagengu i kamene nasunsara ual᷊ingu i kamene kawe tau Sahani e ute kumbahangbue měngkameang ene. Pakitarimakasẹko su Mawu Ruata e, watụ u i kamene kawe měbẹ̌bawa arengi Kristus.

¹⁷Seng nịdatingu tempone Ruata měhukungu dunia e. Dingangu kai tẹ̌tạ bọu ral᷊ohon jamạatʼu Mawu e ihukung kal᷊imona. Kụ kereu Mawu Ruata e kai měhukung itětạ bọi kitẹ e, ute kereapa wue kakakoạ i sire taumata apan tawe měmpangimang Injilu Mawu Ruata e sarung?

¹⁸ Su ral᷊ungu Bukẹ̌ Susi e kạbawohẹ kere ini, ”Kereu taumata mapapia e sembeng tětehẹ̌ maambang, ute kereapa wue sarung mariadi su taumata warạdosa e wẹ̌gam Mawu!”

¹⁹Ual᷊ingu ene, kereu piạ taumata nasunsara ual᷊ingu kapulun Mawu e kerene, ute kěnangko i sire ene pěmpẹ̌biahẹ̌ pakatatul᷊idẹ̌ dingangu měmpěnarakangu watangengʼi sire e su Mawu Měndariadi si sire. I Sie sarung masaun sul᷊ene měngganapẹ̌ kẹ̌donʼE.