Read Sangir 1 PETRUS 5 Bible Online

1 PETRUS 5 - Sangir bible

1 PETRUS 5

¹Iạ e měgẹ̌gausẹ̌ dal᷊ungu naung i kamene matatimadu jamaatẹ̌ e. Iạ němohẹ u ini e, wọu sěngkatau matatatimadu jamaatẹ̌ sěngkapěmunara e ringangu kere sěngkatau taumata kụ seng nakasahidi hala sunsarang Kristus, dingangu apan sarung l᷊ai iapakawantugẹ̌, kereu kawawantugʼi Kristus iapakatodẹ su taumata. Iạ e mẹ̌dẹ̌dorong sěngapam botonge,

² tadeạu i kamene rembem měmpělukadẹ̌ gapaěngu domba e kụ seng nisarakangu Mawu Ruata e si kamene. Pěmpělukadẹ̌ si sire e ringangu karal᷊uasu naung kerẹewe ikẹ̌kaěnningu Mawu Ruata e wal᷊inewe ual᷊ingu nasihasa. Kumbahangbe lai měmpẹ̌koạ munarang kamene waugu mědeạ kal᷊auntung, kaiso kawe ual᷊ingu i kamene kahěnga-hěngang mapulu měmpẹ̌tangkiang.

³Abe kěngkakoạ kere mangangawasa si sire apan seng nisarakang si kamene e, kaiso kariadiko kakakěllaěng baugʼi sire.

⁴Dingangu su tempom Mělal᷊ukadẹ̌ Mawantugẹ̌ e sarung duměnta e, i kamene sarungbe makatarimạ u paporongu kawantugẹ̌ e, kụ tawe maral᷊ubesẹ̌.

⁵ Kerene lai apam mangangudạ. Pakasasuměllungko su matatimadẹ̌ e. I kamene manga anạ u sěmbaụ kěbị e harusẹ̌ mẹ̌těngkasanạ u watangeng dingangu l᷊awọ mẹ̌tatangkiang dingangu kasasanạu naung. Batụu su ral᷊ungu Winohẹ Susi e kạbawohẹ kere ini, ”Mawu Ruata e rụdokạ taumata mal᷊aobotẹ̌, dingangu kụkěndagu taumata naunge masanạ e.”

⁶ Batụu ene ute, pẹ̌těngkasanạkong batangengu su al᷊ungu l᷊iman Mawu Ruata makuatẹ̌ e tadeạu mapakarangẹ i kamene kamageng semben tempone.

⁷Lěngkangko kal᷊awọu kaghaghěnggang i kamene su Mawu Ruata, u kai i Sie mẹ̌sasěmpị si kamene.

⁸Pakarariagạ, pakaral᷊ukadẹ̌! U setange kai rokạ i kamene. I sie kai mẹ̌sul᷊ungu singa mědẹ̌daral᷊eng tama-ramahi kạpẹ̌munggal᷊ọe mẹ̌dẹ̌deạ měnsang i saị e ikakinạe.

⁹Pakatoelẹ̌ bue rumokạ si sie e ringangu pangangimang masěgadẹ̌, batụu i kamene masingkạu manga anạ u sěmbaụ taumatan Sahani wal᷊ine e su kaguwạu dunia e mal᷊aing masigěsạ kere i kamene.

¹⁰Arawe su l᷊ikudu i kamene masunsara pẹ̌sěngkatempo e, Mawu Ruata e sẹ̌sane e sarung mapakariadin kamene masukụ. I Sie sarung mapakatei ringangu mapakatoghasʼi kamene ringangu mapakasẹ̌gadi kamene. U i Sie e kai Mawu Ruata puěngu tatal᷊ěntụ kụ seng nẹ̌kui si kamene mẹ̌deạu l᷊ai makapěndang kawawantuge kakalẹ̌ boʼi Kristus.

¹¹I Sie e kai taghuangu kawasa e sarang kakalẹ̌. Aming.

¹² Suratẹ̌ku manimbụ ini e, takụ nipanuratẹ̌ si kamene ringangu tul᷊umang i Silas, kụ takụ kinapěndangeng u i sie kai anạ u sěmbaụ Sahani masatia. Iạ e kai mapulu mẹ̌gěllịu wawahansang si kamene ringangu manahuntěngadẹ̌ si kamene u ini e kai mamben tatal᷊ěntụu Mawu Ruata e kahěngang. Kụ i kamene e pěmpangumbelẹbe pakasasẹ̌gadẹ̌ su tatal᷊ěntụ ene.

¹³ Manga hapị kụ jamaatẹ̌ sěmbaụ su Babilon,[4] kụ mal᷊aing pinilen Mawu Ruata e, něndohon tabeạ si kamene; kerene lai su anạku i Markus ikẹ̌kěndagẹ̌.

¹⁴Pěmpẹ̌papangadatẹ̌ko sěmbaụ dingangu wal᷊ine napenẹu kakěndagẹ̌ e lawọ anạ u sěmbaụ Sahani e. Mal᷊owọko Mawu e měngonggọu karal᷊unsemahẹ̌ si kamene manga anạ u sěmbaụ patikụ e nakoạ tataghuaneng i Kristus. Adatʼi kami, Petrus