Read Sangir 2 PETRUS 2 Bible Online

2 PETRUS 2 - Sangir bible

2 PETRUS 2

¹Su tempo napaghohẹ̌ e sutal᷊oarang umatʼu Ruata e piạ ko nahunsěpụ manga mahang nabi. Kerene lai sutal᷊oarang kamene manga anạ u sěmbaụ sarung piạ u suměpụ manga mahang měnaněntiro. I sire kai sarung mapasuẹ̌ u manga těntiro nẹ̌sal᷊a, makawinasa taumata. Mase i sire e sarung mẹ̌sunial᷊u Měngangawasa kụ seng něliwirʼi sire. Kụ ual᷊ingʼu ene i sire e makakarěntang kawawinasa su watangeng i sire hala e, kụ sarung mihombang si sire e mal᷊ighạ.

²Maningbe kerene, kai sarung mal᷊awọ taumata mahuntol᷊e měmpẹ̌těno kakakoạ u pẹ̌bawiahu mahang mananěntiro wẹ̌bawaěngu abul᷊ing sire. Kụ kakakoạ u mahang mananěntiro e makariadin taumata l᷊awọ e měmpěhodatẹ̌ Dal᷊engu Katěngadẹ̌ makakahumpạ u anun Duata.

³Ual᷊ingu anggang i sire tangú, manga mahang mananěntiro e sarung měmpẹ̌bẹ̌kem běke lẹ̌langinang i sire hala tadeạu makaěbạ untung i sire wọʼi kamene. Arawe kawe putusangu hukumang si sire semben těbe marěngụ kạdariahi ringangu kawawinasan sire e seng tinantu e měmpangampal᷊ẹ̌ si sire.

⁴Manga malaekatẹ̌ baradosa e mal᷊aing tawe ipakawalam Mawu Ruata ipakal᷊iwirẹ̌ bọu hukumange kaiso kawe irěmmẹ su ral᷊ungu naraka. I sire iwunsal᷊ẹ̌ su ral᷊ungu tịgal᷊ụ u kararěndung[3] ipanguntang sene sarang Ěllon Pělahukung.

⁵ Kerene lai nạung dunia e su tempo kal᷊amona, Mawu Ruata e tawe napakal᷊iwirẹ̌ bọu hukumang. Mawu Ruata e naparěntan dalulung su wanuan taumata ral᷊akisẹ̌ e su tempo ene. Kětạeng i Noakẹ̌ dingangu ringange i sire pitung katau niapakasal᷊amatẹ̌, baugu i Noakẹ̌ mělẹ̌habaru hengetange mạanun pẹ̌bawiahẹ̌ mẹ̌tẹ̌tal᷊ahino su kapulun Duata.

⁶ Kerẹewe lai kakakoạ e soan Sodom dingangu Gomora: Mawu Ruata e napakawinasan manga soa ene ringangu putung tadeạu makoạ tul᷊adang apa sarung mariadi su taumata ral᷊akisẹ̌.

⁷ Kai arawe i Lotẹ̌ e naambang, baugu i sie e nakal᷊ahimpulu Mawu Ruata; i sie nasunsara ual᷊ingu kakanoạ u taumata ta mẹ̌tatal᷊ahino e kereng kal᷊amuhụ e.

⁸Sutal᷊oarang kakakoạ u taumata kerene e i Lotẹ̌ taumata mapia ene e měbẹ̌biahẹ̌ su ral᷊ungu tědụ u naung, batụu měllo-měllo e i sie makạsilo ringangu makạdingihẹ̌ kakanoạ i sire ral᷊akisẹ̌ e.

⁹Kụ, Mawu e masingkạ u kereapa měngambang taumata kụ měngkai tụtuhụ kapulun naungʼE kereu i sire kawe tụtatěngo kal᷊awọu sasal᷊ukạ e. Dingangu Mawu e masingkạ u kereapa měndesọ u taumata ral᷊akisẹ̌ e mẹ̌deạ u sigěsakeng su Ěllon Pělahukunge,

¹⁰lembọete taumata kụ tụtol᷊e abul᷊in sire maral᷊amuhụ e ringangu měnẹ̌namedẹ̌ kawasan Mawu Ruata. Kerẹeng kawahanine ringangu kaobote manga mahang mananěntiro e hakịu i sire e tawẹ goẹ̌ e měmpěnamedẹ̌ diadikang mawawantugẹ̌ e sarangkewe lai su sorga e!

¹¹Arawe manga malaekatẹ̌ kụ limembom matatoghasẹ̌ dingangu kawasa wọu manga mahang, mananěntiro e tawe měmpěnanoke riạdikang mawawantugẹ̌ e ringangu manga waweran sasamedẹ̌ e su těngon Mawu.

¹²Arawe manga mananěntiro ene e wal᷊inewe kal᷊oa! I sire e kai tabidạu binatang piněhanạ kětạu waugu samekang dingangu pateěng. I sire tawe nẹ̌tiněnna, kaiso kětạeng něngal᷊ạ kakakoạ ual᷊ingu samatang tumbạu tụtuhụ kal᷊oko, hakịu i sire měngkate kạdokạ e kal᷊awọu sạbarang tawe kal᷊aěnnaěngʼi sire e ringangu haghim baweraʼn tatungkeang. Ual᷊ingu ene kahian kakanoạ i sire hala e i sire sarung mawinasa kere manga binatang dul᷊u.

¹³Kai kere wawal᷊isu sunsara kinoạ i sire e, ute i sire mal᷊aing mẹ̌tatahangu sunsara. Sunaung i sire ute apan makạl᷊ahimpulu si sire ute mẹ̌koạ balạewe apa kụ hinong makakasahe kapuluʼm badang i sire e. Kereu i sire makakaiang sěngkakaěng dingangi kamene su ral᷊ungu sal᷊iwange, ute lulun sire e kai makạmamuta batụu i sire kai mẹ̌bẹ̌biwukangu abul᷊ing sire.

¹⁴I sire tawe měngkawawui měmpẹ̌koạ dal᷊akị e, ringangu puluang i sire měngkai měmpěmanda wawine ral᷊akisẹ̌. Ringangu taumata apan němpangimange ringangu wẹ̌dan tawe tumanị u maiaking ute mang lẹ̌lokeěng i sire. Dal᷊ungu naung i sire sen dimẹ̌kạ u anggang. I sire e kai taumata kinawontogang!

¹⁵ Batụu i sire tawe tumol᷊e ral᷊eng matul᷊idẹ̌ e, hakịu i sire kawe něngkapal᷊idẹ̌. I sire kai němpẹ̌tol᷊e ral᷊eng tẹ̌tol᷊eěng i Bileam anạ i Beor nạung. I Bileam ini e puluang kahěngang makareạ doitẹ̌ bọu munaran sire su tawẹ adile.

¹⁶Kaiso i sie nakahombang tatengko matědụ kahian kararal᷊akise, piạ e kalidene nakaweran tingihu taumata. Tangu nabi ene nisihasa takadeạu měngẹ̌do wọu kakanoạ e pulu ene.

¹⁷Manga mahang mananěntiro e kai tabidạu matang akẹ kinamaraěng dingangu kere hiwụ nitiukangu anging maihạ. Mawu Ruata e seng něnạdian tampạ i sire wasagiạ.

¹⁸I sire e němpẹ̌koạ pẹ̌kakakẹ̌don sire mal᷊aatahẹ̌ tawẹ gẹ̌sine; abul᷊ing sire ipẹ̌pakẹ i sire apakạnawong taumata wuhu-wuhu karal᷊iwirẹ̌ bọu ghal᷊ipohong apang něngkapal᷊idẹ̌ e.

¹⁹Manga mahang mananěntiro ene měmpẹ̌kẹ̌kědong karal᷊iwirẹ̌ si sire, sěmbal᷊iu i sire hala e pinẹ̌tahuěllangu kawawinasa, u i saing ikẹ̌kawatạu apa-apa e, ute kai ěllangu apan nakawatạ e.

²⁰Taumata makakiral᷊a Mawu ringangu Mananal᷊amatẹ̌ si kitẹ i Yesus Kristus seng nal᷊iwirẹ̌ bọu manga kawasan dunia kụ makạdal᷊akisẹ̌ taumata. Kai kereu samurine i sie masangkong kapia hakịu ikawatạu manga kawasa ene, tangu kakakoạu taumata ene sarungbe něngalembong karal᷊akise wọu kal᷊amona.

²¹Limembong kapiane taumata kerene e ta nakakasingkạ u ral᷊engu katul᷊idẹ̌ e wọu Ruata, sul᷊ungu i sire e masingkạ, kutẹu samurine kawe tawe mapulu tumol᷊e titang Mawu Kasěllahenge si sire.

²² Apan nikoạ i sire e mẹ̌lẹ̌lahẹ u hinong papasihing ini, ”Asu e sarung mẹ̌sul᷊e kumaěng mutane,” dingangu ”Wawi wọu nirenọ e, mẹ̌sul᷊e mẹ̌těngkal᷊usị su pẹ̌tatonaěnge.”