Read Sangir 1 YOHANES 1 Bible Online

1 YOHANES 1 - Sangir bible

1 YOHANES 1

¹ Lohon suratẹ̌ ini kai mạanung Hengetang makạgěllịu pẹ̌bawiahẹ̌, kụ kai Hengetang nạung seng tẹ̌be ene rokeng bọu tẹ̌tạe. Sembeng kinaringihi kami ringangu sembeng kinasilom matang kami hala. I kami e seng nakasahidi, ringangu sem bọu nikahẹ̌gong limang kami.

² Piạ pẹ̌bawiahẹ̌ e niapakal᷊ahẹ, ute i kami mamben nakasilo. Hakịu ene i kami makasahiding ene. I kami e měhabarẹ̌ si kamene habaru pẹ̌bawiahẹ̌ tutune ringangu kakalẹ̌, kụ pẹ̌bawiahẹ̌ e kai nạung dingangi Amang, kụ sembem bọu nipakal᷊ahẹ si kami.

³Apang kụ seng kinasilong kami ringangu kinaringihi kami e, ene mal᷊aing ilẹ̌habari kami e si kamene, tadeạu i kamene ringangi kami e makahěngang mangal᷊en mẹ̌biahẹ̌ masěmbaụ dingangʼi Amang dingangu AhusʼE i Yesus Kristus.

⁴I kami e namohẹ u ini e mědeạu i kitẹ[1] e kahěnga-hěngang masukụ u ral᷊uasẹ̌.

⁵Kai ini e habarẹ̌ kinaringihʼi kami wọu AhusʼE ringangu ilẹ̌habari kami e si kamene: Duata e kai tualagẹ̌, kụ mang tawẹ marěndunge sarang kạdidị-didị si Sie.

⁶Kereu i kitẹ mẹ̌berau i kitẹ mẹ̌biahẹ̌ masěmbaụ dingange, kutẹu i kitẹ kawe mẹ̌biahẹ̌ su ral᷊ungu kararěndunge ute i kitẹ e kawe měkẹ̌konti su wawera ore lai su kakanoạ.

⁷Arawe kereu i kitẹ mẹ̌bẹ̌biahẹ̌ su ral᷊ungu tualagẹ̌ kerẹewe Mawu Ruata e kawe su ral᷊ungu tualagẹ̌, ute i kitẹ e měbẹ̌biahẹ̌be mạkakauhẹ̌ maghaghighilẹ̌ sěmbaụ su wal᷊ine mase rahan[2] Yesus Ahuse e namurẹ̌siwe si kitẹ bọu rosa e.

⁸Mageng i kitẹ měberau i kitẹ tawẹ dosang kitẹ e, ute i kitẹ kai mạngakal᷊ẹ̌ batangeng i kitẹ. Kụ Mawu e tawẹ dịe su ral᷊ungu naungi kitẹ.

⁹Arawe kereu i kitẹ měngakuwen dosang kitẹ su těngon Duata e, ute i Sie sarung mapakasěhụ u kẹ̌donʼE ringangu mẹ̌koạbe apang kụ adilẹ̌. I Sie sarungbe měngampung dosang kitẹ dingangu mamurẹ̌si si kitẹ bọu patikụ kakanoạ i kitẹ nẹ̌sal᷊a.

¹⁰Kamageng i kitẹ mẹ̌berau i kitẹ tawe němpẹ̌dosa, ute i kitẹ kai tabidạu mạnompol᷊u Mawu e kai makonti ringangu i kitẹ e tawe měndaresọ u hengetangu Mawu e su ral᷊ungu naung i kitẹ.