Read Sangir 1 YOHANES 2 Bible Online

1 YOHANES 2 - Sangir bible

1 YOHANES 2

¹Manga anạku ikẹ̌kěndagẹ̌! Iạ e namohẹ u ini si kamene, tadeạu i kamene kumbahangbe měmpẹ̌dosa. Arawe kamageng piạ u němpẹ̌dosa e, ute i kitẹ kai piạ tumatatawange sěngkatau, i Sie kai i Yesus Kristus kụ adilẹ̌ e, i Sie sarung mẹ̌kal᷊iomaneng baụgi kitẹ su těngon Amang.

²Bọu anung Mawu Yesus Kristus ene e rosang kitẹ ampungang. Dingangu wal᷊inewe kẹ̌tạu rosang kitẹ ampungang. Dingangu wal᷊inewe kětạu rosang kitẹ hala, kaiso kawe mal᷊aing rosam patikụ umatẹ̌.

³Kereu i kitẹ e matuhụ su titam Mawu Ruata e kai tatialang i kitẹ makạkiral᷊a Ruata.

⁴Taumata kụ mẹ̌bera u, ”Iạ makạkiral᷊awe Ruata,” kutẹu ral᷊iune kawe ta tumatuhụ manga titanʼE ute tau ene kai kontiang, kụ Duata e tạdịe su ral᷊ungu naunge.

⁵Arawe taumata kụ matuhụ su hengetangu Mawu Ruata, tau ene ute kụkěndagu Mawu e ringangu masukụ. Kai ene tatialang i kitẹ e nẹ̌biahẹ̌ su pẹ̌kakauhen dingangu Ruata.

⁶I sain mẹ̌berau i sie kai nẹ̌biahẹ̌ nasěmbaụ dingangu Ruata e, i sie harusẹ̌be tumol᷊e pakeli Kristus.

⁷ Manga anạ u sěmbaụ ikẹ̌kěndagẹ̌! Iạ nanurantung ini e wal᷊inewe sěmbaụ tita wuhu si kamene. Ini kai tita sen těbe nihabarẹ̌ si kamene, buhụ e i kamene nanětạ nangimang si Kristus; kụ kai hengetang u Mawu e kụ seng kinaringihʼi kamene.

⁸Manịeng kerene, hengetang kụ takụ niwohẹ ini e mal᷊aing buhu. Batụu katul᷊ide ikasilo su watangeng i Kristus, arau sukakakoạ i kamene. U kararěndunge seng kakạpaghohe ringangu tualagẹ̌ kahěngang seng sụsěnnang.

⁹I sain měbẹ̌berau i sie su ral᷊ungu tualagẹ̌ kutẹu kai wědang měbẹ̌binsị u anạ u sěmbaụ e, ute taumata ene kai su ral᷊ungu kararěndung sarang orasẹ̌ ini.

¹⁰I saing kụkěndagu anạ u sěmbaụ e, ute měbẹ̌biahẹ̌ su ral᷊ungu tualagẹ̌ hakịu si sie tawẹ apa makawodaị taumata wal᷊ine[3] kụ manawo su ral᷊ungu rosa.

¹¹Arawe i sain měmpẹ̌bẹ̌binsịu anạ u sěmbaụ e, tau ene kai wědang su ral᷊ungu kararěndung. I sie rụdal᷊eng su marěndung, bẹ̌ga wue měnsang sol᷊ong apa, u kararěndunge kai makạkoạ si sie tamakasasilo.

¹²Iạ e manuratẹ̌ si kamene, manga anạ, u rosanu e seng niampungang ual᷊ingu i Kristus.

¹³Iạ e manuratẹ̌ si kamene, manga esẹ (i amang), u i kamene seng masingkạ i Sie kụ seng ene rokeng tětạe. Iạ mạmohẹ si kamene manga anạ mangangudạ, u i kamene seng nakawatạ si ral᷊aị.

¹⁴Iạ měnuratẹ̌ si kamene manga anạ, u i kamene masingkạben Duata i Amang. Iạ něnuratẹ̌ si kamene manga i amang, u i kamene masingkạ u Hengetange seng těbe ene rokeng bọu tětạe. Iạ měmohẹ si kamene manga anạ mangangudạ batụu i kamene kai matatoghasẹ̌. Hengetangu Mawu e ene su ral᷊ungu naung i kamene, ringangu i kamene seng nakawatạ si ral᷊aị.

¹⁵Abe kěndagu dunia ini, arau walạewe měnsang apa su dunia ini. Kereu i kamene kụkěndagu dunia e, ute i kamene tawe kuměndagi Amang.

¹⁶U apạewen su dunia ini e — ikẹ̌kapulung gẹ̌si arau ěnningu taumata warạdosa e, ikẹ̌kasilo mase ilẹ̌ěnning dingangu ilẹ̌lesạe — patikụ ene e wal᷊inewe asal᷊e wọu anung Amange kaiso kawe wọu dunia.

¹⁷Dunia e ringangu patikụ dal᷊ohone ikẹ̌kaěnningu taumata e seng kakạpaghohe. Kai taumata tutuhụ kapulun Duata e, tatapẹ̌ ipẹ̌bẹ̌biahẹ̌ sarang karěngụe.

¹⁸Manga anạku, ěllong kiamatẹ̌ e seng masandigẹ̌! Seng nipaul᷊i si kamene kal᷊imona u Sekẹ i Kristus sarung duměnta, kụ orasẹ̌ ini e ute seng lawọ nahunsěpụ taumata apang sumekẹ si Kristus. Ene e tandan seng marani ěllong kiamatẹ̌.

¹⁹Manga rumarokạ si Kristus e ute kai taumata apan seng němpaněntang i kitẹ e, u i sire tuhụ hinone kai sembem bal᷊inewe taumatang kitẹ. Kereu i sire kai taumatam beng kitẹ e ute i sire mang tatapẹ̌ dingangi kitẹ. Kutẹu i sire kai seng něněntang i kitẹ, tadeạu mal᷊ahẹ u tawẹu sarang sěngkatau wọi sire kụ kahěnga-hěngang nasowa ringangi kitẹ.

²⁰Kai arawe i kamene ute seng něnarimạ u Rohkẹ̌ u Ruata wọuten niwěmbing i Yesus Kristus. Kai ene hakịu i kamene kěbị e masingkạben těntiron Duata e kahěngang.

²¹Kụ iạ namohẹ u ini si kamene wal᷊inewe ual᷊ingu i kamene wẹ̌gawen těntiro kahěngang, kaiso kawe seng ual᷊ingu masingkạ dingangu i kamene mal᷊aing masingkạ u tawẹ apa konti su ral᷊ungu těntiro kahěngang.

²²Nẹ̌konti e ute kai taumata kụ seng nẹ̌bera si Yesus bal᷊inewe Ratu Měnanal᷊amatẹ̌ kụ seng nikẹ̌don Duata e. Taumata ene e kai Sekẹ i Kristus; i sie tawe mapulu mangakun Duata i Amang dingangu Ahusẹ̌.

²³I sain tawe měngakung Ahusẹ̌ e, ute tawe měnarimạ i Amange lai. Arawe i saim měngakung Ahusẹ̌ e, ute mal᷊aing měnarimạ i Amang.

²⁴U kai ene, hakịu habarẹ̌ dingihʼi kamene rokeng tětạe i kamene nangimang, ute harusẹ̌be riagate pakapia su ral᷊ungu naung i kamene. Kereu i kamene mẹ̌sipirẹ̌ pakapia habaru hengetang ene e, ute i kamene měngkate sěntiniạ měbẹ̌biahẹ̌ nasěmbaụ dingangu Ahusẹ̌ e ringangu i Amang.

²⁵Kụ kai ini e nikẹ̌dong Kristus sẹ̌sane si kitẹ e ute kai pẹ̌bawiahẹ̌ tutune ringangu kakalẹ̌.

²⁶Iạ namohẹ u ini kěbị si kamene mạanung i sire apang mẹ̌deạu měngakal᷊ẹ̌ si kamene.

²⁷Kai waugi kamene hala e, i Kristus seng naměmbingu Rohkẹ̌ʼE si kamene. Karěngụewen Rohkẹ̌ʼE ene ringangi kamene, ute seng tawahal᷊uasu piạ taumata wal᷊ine maněntiro si kamene. U Rohkẹ̌ʼE e maněntiro kěbị si kamene, mase kěbị apan nitěntiro e kahěngang bal᷊inewe konti. Kụ i kamene kěbị e pakatatuhụ bue su patikụ těntiron Rohkẹ̌ʼE, ringangu pakatanạko i kamene mẹ̌biahẹ̌ masěmbaụ dingangi Kristus.

²⁸Kụ manga anạku, kěngkatanạko mẹ̌biahẹ̌ su pẹ̌kakauhẹ̌ dingangi Kristus, kụ su tempọen darěntanʼE, i kitẹ e mẹ̌tumbahani mẹ̌těngon Sie ringangu manịeng ta mẹ̌kěmbuni, ual᷊ingu mea.

²⁹I kamene seng masingkạ u i Kristus měbẹ̌biahẹ̌ tụtuhụ kapulun Duata. Ual᷊ingu ene ute i kamene harusẹ̌be masingkạ u i saim měbẹ̌biahẹ̌ tutuhụ kapulun Duata e kai anạ u Mawu Ruata.