Read Sangir 1 YOHANES 4 Bible Online

1 YOHANES 4 - Sangir bible

1 YOHANES 4

¹Manga anạ u sěmbaụ ikẹ̌kěndagẹ̌! Kumbahang mangimang su patikụ taumata apang mạngaku u mạnaghuang Rohkẹ̌ u Ruata e, kaiso wẹ̌banikatewe kal᷊amona i sire tadeạu makakasingkạbe měnsang rohkẹ̌ si sire e asal᷊e wọu Ruata wue arau kai tala. U kai mal᷊awọ nabi konti seng nẹ̌sal᷊iawuhẹ̌ su apan tampạ.

²Kai kere ini e tadeạu i kamene makakiral᷊a wue měnsang ene Rohkẹ̌be u Ruata arau wal᷊ine? Taumata kụ měngakuwen Yesus Kristus e riměnta su dunia kere sěngkatau taumata, tau ene e mạnaghuangbe Rohkẹ̌ e wọu anun Duata.

³Arawe i saing kụ tawe měngakung hal᷊ẹ̌ ini mạanung Yesus e, tawe měnaghuang Rohkẹ̌ u Ruata e. Tau ene mạnaghuang rohkẹ̌ bọu Sekẹ i Kristus. I kau sen nakaringihẹ̌ u rohkẹ̌ ene sarung duměnta, kụ orasẹ̌ ini i sie seng su ral᷊ungu dunia ini.

⁴Arawe manga anạku, i kamene kai tataghuanengu Ruata. I kamene seng nakawatạ manga nabi kontiang, batụu Rohkẹ̌ su ral᷊ungʼi kamene limembo kawasa wọu rohkẹ̌ u apan taumata tataghuanengu dunia ini.

⁵Manga nabi kontiange mạhumbisaram manga hal᷊ẹ̌ u mạdunia ringangu dunia e nakaringihẹ̌be waweran sire, batụu i sire e kai tataghuanengu dunia.

⁶Arawe i kitẹ e kai manga anạ u Mawu Ruata; ringangu taumata kụ masingkạ u Ruata e rụdaringihẹ̌ bue wawerang kitẹ. Arawe kụ taumata wal᷊inewe tataghuanengu Ruata e, tawe rumararingihẹ̌ si kitẹ. Kerene pẹ̌kiral᷊aěngu Rohkẹ̌ mạněntiron těntiro kahěngang, dingangu rohkẹ̌ makạpal᷊idẹ̌.

⁷Manga anạ u sěmbaụ ikẹ̌kěndagẹ̌! I kitẹ e mẹ̌kakěndagẹ̌ko sěmbaụ dingangu wal᷊ine, batụu kakěndagẹ̌ e asal᷊e kai wọu Mawu Ruata. Taumata masingkạ kuměndagẹ̌ e ute kai anạ u Ruata.

⁸I sai-sain tawe kuměndagẹ̌ e, tawe makakiral᷊a Ruata; batụu Mawu Ruata e kai makěndagẹ̌.

⁹Mawu Ruata e niapakal᷊ahẹu i Sie kụkěndagʼi kitẹ dingangu něndolohu AhusʼE mang sěmbaụ sol᷊ong dunia e, tadeạu i kitẹ makahombang pẹ̌bawiahẹ̌ bọu AhusʼE ene.

¹⁰Ini ute kai kakěndagẹ̌: Bal᷊inewe i kitẹ seng kiměndagu Mawu Ruata e, kaiso kawe Mawu Ruata e kiměndagi kitẹ dingangu něndolohu Ahuse tadeạu wọi Sie i kitẹ makahombang kal᷊aampung u rosang kitẹ e.

¹¹Manga anạ u sěmbaụ ikẹ̌kěndagẹ̌, kamageng Mawu Ruata e seng kerẹeng kakěndage si kitẹ e, ute i kitẹ mal᷊aing harusẹ̌ mẹ̌kakakěndagẹ̌ sěmbaụ dingangu wal᷊ine.

¹² Tawẹ u sarang sěngkatau reng bọu nakasilo Mawu Ruata, kai kereu i kitẹ e mẹ̌kakakěndagẹ̌ e, ute Ruata e nasěmbaụ dingangi kitẹ e kụ kakěndage nasukụ su ral᷊ungu watangeng i kitẹ.

¹³Ual᷊ingu Mawu Ruata e seng něngonggọ u Rohkẹ̌ʼE e si kitẹ, ute i kitẹ masingkạ u i kitẹ seng nẹ̌biahẹ̌ nasěmbaụ dingangu Mawu Ruata, ringangu Mawu Ruata e nẹ̌biahẹ̌ nasěmbaụ dingangi kitẹ.

¹⁴I kami hala e seng nakapanda Ahusu Ruata, ringangu i kami e mẹ̌lẹ̌habaru i Sie seng nirolohʼi Amang e makoạ Datu Měnanal᷊amatʼu dunia ini.

¹⁵I sai-sain mạngakun Yesus e kai Ahusu Ruata e, ute Ruata e nẹ̌biahẹ̌ nasěmbaụ dingangu tau ene mase tau ene mal᷊aing nẹ̌biahẹ̌ nasěmbaụ dingangu Mawu Ruata.

¹⁶I kitẹ hala masingkạ dingangu mạngimang u kakěndagu Mawu Ruata e si kitẹ. Mawu Ruata e kai makěndagẹ̌. I sain pẹ̌bawiahe kai su kawasang kakěndagẹ̌ e, i sie kai nakauhẹ̌ dingangu Mawu Ruata, mase Mawu Ruata e nasěmbaụ dingangi sie.

¹⁷Kakěndagẹ̌ e kai niapakariadi nasukụ si kitẹ, tadeạu i kitẹ e piạ karal᷊oahu naung su Ěllon Pělahukung. I kitẹ e kai sarung piạ karal᷊oahu naung, watụu pẹ̌bawiahʼi kitẹ su dunia ini e kai mẹ̌sul᷊ungu pẹ̌bawiahʼi Kristus.

¹⁸I sain nakapěndang kakěndagu Mawu Ruata e, wẹ̌gawen takụ, u kakěndagẹ̌ nasukụ e kai makạtokol᷊ẹ̌ kal᷊awọu haghin takụ. Kụ mal᷊ahẹ mạeng i saing kụ bẹ̌dang tawe nakạpěndang kakěndagu Mawu Ruata nasukụ e kereu i sie mạtakụ mẹ̌těngong Ěllom Pělahukunge.

¹⁹I kitẹ kiměndagẹ̌ e, watụu Mawu Ruata e seng kiměndagʼi kitẹ kal᷊amona.

²⁰Kereu piạu nẹ̌berau, ”Iạ kụkěndagu Mawu Ruata,” kai i sie wẹ̌ga kuměndagu anạ u sěmbaụ e, ute i sie kai taumata kontiang. Batụu taumata kụ ta kumakěndagu anạ u sěmbaụ e ikẹ̌kasilo, mamben tawe makakoạ kuměndagu Mawu Ruata tai kasasilone.

²¹Kutẹu i kitẹ kai nakahombang tita ini wọi Sie: U i saing kụkěndagu Mawu Ruata e, harusẹ̌be lai kuměndagu anạ u sěmbaụ e.