Read Sangir MANGA MĚLAHUKUNG 1 Bible Online

MANGA MĚLAHUKUNG 1 - Sangir bible

MANGA MĚLAHUKUNG 1

¹Samuring Yosua e naněntangu dunia e, umatʼu Israelẹ̌ e nakiwal᷊o su MAWU, ”MAWU, kai hěnto sude wọu i kami e hinong kahumotongange tamai měngalo tau Kanaan?”

²MAWU e simimbang, ”Hěnton Yehuda. I sire seng Takụ nionggotang u kawasa waugu měmul᷊aho wanua ene.”

³Bọu e angkuěng u hěntong Yehuda su hěnton Simeon, ”Ontol᷊e wue i kami mẹ̌sekẹ u tau Kanaan dingangu mangaho wanua kụ nitantum MAWU waugʼi kami. Hědong i kami lai sarung maontol᷊ẹ̌ si kamene měngaho wanua kụ seng nitilakehu MAWU waugʼi kamene.” Tangu hěnton Simeon,

⁴dingangu Yehuda tamai nẹ̌sekẹ sěngkapẹ̌sekẹ. Kụ MAWU e něngonggọu watạ su tau Kanaan si sire ringangu tau Feris. Mapul᷊o hiwu su kataune sordadong sekẹ e něngkapate su Bezek.

⁵I sire nakapẹ̌sombang i Adoni-Bezek, datum banua ene, kụ něngalo si sie.

⁶I sie timal᷊ang, kaiso i sire něnahusu ringangu něnamẹ si sie mase namotọ iněngen limane ringangu laede.

⁷Angkuěng i Adoni-Bezek, ”Nạung kal᷊amona e pitum pul᷊o su kataune ratu e seng takụ nipotọ su iněngen limane ringangu manga l᷊aede, mase takụ niwala i sire niapakaěng manga lěmbeng kaěng apang mạhondosẹ̌ bọu medaku. Orasẹ̌ ini e Mawu Ruata e miěbạ si siạ mẹ̌sul᷊ungu iạ e mẹ̌koạ si sire.” I Adoni-Bezek bọu ene nihengkẹ e sol᷊ong Yerusalem, kụ sene i sie napul᷊ẹ asal᷊ẹ̌.

⁸Tau Yehuda něngalo Yerusalem, bọu e něngaho ringangu nanutung soa ene ringangu němate taumatane.

⁹Bọu ene i sire saụko l᷊ai tamai něngalo tau Kanaan kụ mạtanạ su wawul᷊urange ringangu su manga wěntihe; kerene lai apang měmpẹ̌tẹ̌tanạ su wanua mamara su sěmběkang timuhẹ̌,

¹⁰dingangu su soan Hebron, kụ kai soa nạung kal᷊imona nisěbạ Kiryat-Arba. Sene tau Yehuda němatạ ghal᷊ipohong Sesai, Ahiman dingangu Talmai.

¹¹Bọu Hebron, tau Yehuda e tamai něngalo soan Debir, kụ nạung su tempo ene isẹ̌sẹ̌bạ Kiryat-Sefer.

¹²Sěngkatau wọu hěnton Yehuda ene, kụ isẹ̌sẹ̌bạ si Kaleb, nẹ̌berạ u, ”I saing kụ měmul᷊aho Kiryat-Sefer, i sie wotonge mẹ̌kawingu anạku wawine i Akhsa.”

¹³I Otniel anạu tuaring Kaleb kụ isẹ̌sẹ̌bạ si Kenas e tangu němul᷊aho soa ene. Tangú i Kaleb něngonggọ i Akhsa, anạ e, nakoạ kawingʼi Otniel.

¹⁴Su ěllong pẹ̌kakawing i sire, i Otniel něnahěsẹ si Akhsa[1] tadeạu apẹ̌dẹ̌dorong ěntana sěngkamonaěng bọu i amange. Tangú limintụ e i Akhsa wọu wowong kalidene, bọu e i Kaleb nakiwal᷊o si sie měnsang apạe ilẹ̌ěninge.

¹⁵I Akhsa simimbahẹ̌, ”Iạ e kai mẹ̌měningu simbul᷊u akẹ pira-pira, batụu ěntana nạung nionggọ i amangku e si siạ ene e kai napěllọ su wanua mamara.” Tangú i Kaleb něngonggọ u simbul᷊u akẹ si sie su piạ ul᷊une ringangu simbul᷊u akẹ su piạ tol᷊ene.

¹⁶Hěntong empong i Musa, kụ nạung kai taumatang Keni, tụtol᷊e tau Yehuda sụsěbang bọu Yerikho, soang kurma, ringangu nakoạ sol᷊ong banua něhangu su sěmběkan timuhẹ̌ bọu Arad su Yehuda. Sene i sire nẹ̌banua sutal᷊oaran tau Amalek.[2]

¹⁷Bọu ene sěngkaral᷊eng u hěnton Simeon, hěnton Yehuda e tamai něngalo ringangu němatạ tau Kanaan kụ mẹ̌tẹ̌tanạ su soang Zefat. I sire něngane soa ene, bọu ene nipakaupune kụ bọu ene nisěbạ e Horma.[3]

¹⁸MAWU e nẹ̌tul᷊ung u tau Yehuda hakịu i sire nakapul᷊aho wawul᷊urange. Kaiso i sire tawe makapul᷊aho[4] Gasa, Askelon arau Ekron dingangu manga wanua mạngělikụ, batụu manga wansa kụ mạtanạ su kanandung duruhange mạnaghuang karetang sekẹ i sire wọu uase; ual᷊ingu ene tau Yehuda e tawe nakapanguserẹ̌ si sire.

²⁰ Kerẹewe seng bọu niorong Musa e, Hebron e nionggọ si Kaleb, batụu nạung kal᷊imona e těllung ghal᷊ipoho wọu walagu hěntong Enak seng bọu nitokol᷊ʼi Kaleb bọu soa ene.

²¹ Hěntom Benyamin tawe nakatokol᷊ẹ̌ tau Yebus nipasěbang bọu soan Yerusalem. Kai ene hakịu tau Yebus bědang mạtanạ sene ringangu hěntom Benyamin.

²²Balagʼi Efraim dẹ̌duang Manasye hěnton Yusup, tamai něngalo soam Betel, nạung su tempo ene isẹ̌sẹ̌bạ Lus. Kụ MAWU e nẹ̌tul᷊ung i sire. Su tempong mẹ̌kakakotone nirolohẹ̌ nipẹ̌timona sol᷊ong soa ene,

²⁴i sire němpẹ̌sombangu sěngkatau esẹ kụ narěntạ wọu soa. Ungkuěng i sire si sie, ”Kamagengu i kau e mapulu mẹ̌tul᷊ung i kami e tadeạu i kami makasuẹ̌ su ral᷊ungu soa ini, i kami sarung mẹ̌koạ mapia si kamene.”

²⁵Tangú tau ene měnodẹ u ral᷊eng mapia si sire apasuẹ̌ su ral᷊ungu soa ene. Bọu e taumatang Efraim dẹ̌duang Manasye němpahunsuẹ̌ su soa ene kụ němpěmate kal᷊awọu pamanuane patikụ e, tabeạu katewe tau ene ringangu manga anạ u sěngkataune.

²⁶Bọu ene i sie něngal᷊ing sol᷊ong banuan tau Het, mase němangung soa sěmbaụ sene kụ nisěbạ e Lus. Soa ene wědang tatapẹ̌ isẹ̌sẹ̌bạ kerene.

²⁷ Balagʼi Manasye tawe něnagha tumanạ u soam Bet-Sean, Taanakh, Dor, Yibleam, dingangu Megido ringangu manga kampong su rěduhe. Kụ tau Kanaan tatapẹ̌be měmpẹ̌tẹ̌tanạ sene.

²⁸Kahěngang bue sarangke tau Israel nahuntinambang katoghase, i sire něnihasa tau Kanaan nẹ̌karadiahang baugʼi sire, kaiso i sire lai tawe něnagha tau Kanaan ene wọu ene.

²⁹ Su soang Gezer, balagʼi Efraim tawe něnagha tau Kanaan, mamanuang soa ene. Kụ, tau Kanaan bědang těbe mạtanạ sene sěngkapẹ̌tanạ dingang i sire.

³⁰Měmamanuang soang Kitron dingangu Nahalol tawe lai nisaghang balagʼi Zebulon. Kai ual᷊ingu ene tau Kanaan e bědangbeng mạtanạ sěngkapẹ̌tanạ dingang i sire, kaiso tau Kanaan ene e nisihasa pěmẹ̌munara waugʼi sire.

³¹Tumanạu soang Ako, Sidon, Ahlab, Akhzib, Helba, Afek dingangu Rehob mal᷊aing tawe nisaghang balagʼi Asyer.

³²Kai ual᷊ingu ene hakịu tau Kanaan, tumanạ e patutune su wanua ene, wědang mạtanạ sene sěngkapẹ̌tanạ dingangu tau Asyer.

³³Tumanạu soam Bet-Semes dingangu Bet-Anat e mal᷊aing tawe nisaghang balagʼi Naftali. Ual᷊ingu ene hakịu tau Kanaan, tumanạ e patutune su wanua ene, bědang matanạ sene sěngkapẹ̌tanạ dingangu tau Naftali. Kaiso i sire nịsasihasa piněhal᷊ẹ̌ baugu walagʼi Naftali.

³⁴Tau Amori wědang těbe mạtanạ su Ayalon, Saalbim dingangu Wul᷊udu Heres batụu balagʼi Dan sẹ̌sahẹ̌sekang i sire sol᷊ong bawul᷊urange, ringangu tawe nipakawala lumintụ sol᷊ong wimbaengu wal᷊ane. Arawe tau Amori e hanesẹ̌ lẹ̌ěpisangu walagʼi Efraim dẹ̌duam Manasye ringangu sẹ̌sihasaěng u pěmẹ̌munara waugu wansa rarua ene.

³⁶Su sěmběkan sawěnahẹ̌ bọu Sela, pẹ̌saraěngu tau Amori e limiu Sasakaěngu Akrabim.