Read Sangir MANGA MĚLAHUKUNG 10 Bible Online

MANGA MĚLAHUKUNG 10 - Sangir bible

MANGA MĚLAHUKUNG 10

¹Samuring Abimelekh nate, tangú i Tola anạ i Pua, nakoạ pangahạ e waugu měliwiru taumatang Israel. I sie kai pulung i Dodọ bọu hěntong Isakarẹ̌. I sie mạtanạ su Samir su wanuang bawul᷊urang u Efraim.

²Duam pul᷊o těllu su taunge karěngụ e i sie něngahạ umatʼu Israel, bọu ene i sie nairị kụ nilěbing su Samir.

³Samurin i Tola, Israel niahạ i Yair ruam pul᷊o su taunge karěngụ e. I Yair asal᷊e wọu Gilead.

⁴Manga ahuse esẹ e i sire těllum pul᷊o su kataune. I sire mạnaghuang kalide sasakeěng těllum pul᷊o su waụ e, ringangu kal᷊awọu kampong su wanuang Gilead arěgang těllum pul᷊o su waụ e. Kampong tamai ene wědang isẹ̌sěbạ manga kampong i Yair.

⁵I Yair mal᷊aing nairị, kụ nilěbing su Kamon.

⁶Umatu Israel nẹ̌barạdosa kapia su MAWU. I sire tawe mẹ̌papandung MAWU ringangu tawe měnaněmba l᷊ai si Sie. I sire kai měnẹ̌němba mahang duata i Baal, ringangu i Asytoret, ore lai manga mahang duatan tau Siria, Sidon, Moab, i Amon, dingangu Pilistin.

⁷Ual᷊ingu ene MAWU e limangehẹ̌ su manga umatʼu Israel, hakịu i Sie napakawalan tau Pilistin dingangu wansang Amon nẹ̌kawasa si sire.

⁸Mapul᷊o ual᷊u su taunge karěngụ e wansa rarua ene něnědạ kal᷊awọu taumatang Israel kụ mạtanạ su Gilead, kụ kai wanuan tau Amori su sěmběkan daki wọu Sal᷊ụ u Yordan. I sire miěbạ tau Israelẹ̌ e matingkaị kahěngang.

⁹Tau Amon katewe mundangu lumiu Sal᷊ụ u Yordan kụ tamai sumekẹ hiteng Yehuda, hitem Benyamin, dingangu i Efraim hakịu umatʼu Israelẹ̌ e enẹ e masigěsạ.

¹⁰Bọu e umatʼu Israel nẹ̌kariatagẹ̌ su MAWU, angkuěnge, ”I kami e seng nẹ̌dosa su těngo-Nu, ual᷊ingu i kami e tawe nẹ̌pandung si Kau, Mawu Ruatang kami. I kami kawe naněmba manga mahang duatam Baal.”

¹¹MAWU e simimbang, ”Humotong i kamene nạung su kawasan tau Misirẹ̌, Amori, Amon, Pilistin, Sidon, Amalek dingangu tau Maon. Bọu ene su tempo ene i kamene ghụgahiorọ u makitul᷊ung si Siạ arau ěng? Kěnang pẹ̌tahěndung, měnsang Iạ e tawe měngambang si kamene wọu l᷊imang kawasan sire?

¹³Maningbe kerene, i kamene mang bědang lai tụtal᷊ikudẹ̌ si Siạ, kụ měmpaněmba manga mahang duata. Orasẹ̌ ini e Iạ seng madiri měliwirʼi kamene.

¹⁴Dakọ e pěmpẹ̌tamai sol᷊ong anung mahang duata seng nipileng kamene ene. Pẹ̌dorongke si sire! Měngkate wala i sire pẹ̌tul᷊ung i kamene su tempong i kamene su ral᷊ungu sigěsạ.”

¹⁵Arawe umatʼu Israelẹ̌ e nẹ̌bera su MAWU e, u, ”I kami e seng nẹ̌dosa, MAWU. Měngkate koạ apang kapulu-Nu, asal᷊u i Kau e mětul᷊ung i kami e sahěllo ini.”

¹⁶Bọu e i sire něnděmmẹ kal᷊awọu tul᷊ada e, mase něněmba Ruata. Tangú Ruata e mal᷊aing simurị su naunge kiměndung nakasilo si sire su ral᷊ungu sigěsạ e.

¹⁷Su tempo ene sordadong Amon kapẹ̌dariahine měmpẹ̌sekẹ. I sire nẹ̌daseng su Gilead. Umatʼu Israel mal᷊aing seng nẹ̌tampung dingangu němpẹ̌daseng su Gilead.

¹⁸Sene tangú kawanua e ringangu manga pangahạ e wọu manga pal᷊ahiteng Israelẹ̌ e měmpẹ̌kẹ̌kakiwal᷊o měnsang piạ sutal᷊oaran sire kụ bahani měnědeng aghidẹ̌ dumokạ bansang Amon. Tau ene sarung ihengkẹ makoạ těmbonang u patikụ tumanạ u Gilead.