Read Sangir MANGA MĚLAHUKUNG 11 Bible Online

MANGA MĚLAHUKUNG 11 - Sangir bible

MANGA MĚLAHUKUNG 11

¹I Yefta e kai sěngkatau sordado wahani. I sie nẹ̌tanạ su Gilead. I amang e isẹ̌sẹ̌bạ si Gilead arawe i ninange kai sěngkatau tahapẹ̌sundal᷊ẹ̌.

²I amange ene piạ lai manga anạ e esẹ bal᷊ine wọu kawinge tutune. Sarang manga rariọ ene nasaria, i sire něnagha si Yefta wọu wal᷊e. Angkuěng i sire si sie, ”I kau sarung tawe makahombang budelẹ̌ apa-apa wọu i amang i kami, batụu i kau e kai anạ bọu wawine wal᷊ine.”

³Ual᷊ingu ene i Yefta nẹ̌tal᷊ei wọu manga tuhange ringangu tuarine wọu ene rimal᷊eng kụ nẹ̌tanạ su wanuang Tob. Sene sěngkomol᷊ang u taumata ral᷊akisẹ̌ nẹ̌dal᷊aụ dingange, wọu e i sire rimal᷊eng něhampasẹ̌.

⁴Tawe nararěnnạ wọu ene tau Israel nialoěngu tau Amon.

⁵Piạ e hal᷊ẹ̌ ene nariadi e, apan tuměllangu Israel su Gilead, rimal᷊eng kụ němaringang i Yefta naněntangu wanuang Tob.

⁶I sire nẹ̌bera, ”Těllangeko i kami rumokạ tau Amon.”

⁷Kaiso i Yefta e simimbang, ”Bal᷊inewe i kamene tumanịu mạběnsing u iạ tangu? I kamene seng něnagha si siạ bọu wal᷊eng amangku. Unụe orasẹ̌ ini e su tempong kamene su ral᷊ungu sigěsạ, i kamene simongo su anuku?”

⁸I sire simimbang, ”I kami e simongo ual᷊ingu i kami mẹ̌měnning u tadeạu i kau měmihing kal᷊awọu tumanạ u Gilead baugu měnekẹ tau Amon orasẹ̌ ini e lai.”

⁹Sasimbahʼi Yefta, ”Kereu i kamene měmaringang u iạ mẹ̌sul᷊e sol᷊ong Gilead mědeạu měnekẹ tau Amon, dingangu MAWU e nẹ̌gěllịu watạ si kitẹ e, seng iạ e sarung makoạ měngangawasa si kamene.”

¹⁰I sire simimbang, ”I kami e akorẹ̌ lai. MAWU e sahidine.”

¹¹Tangú nẹ̌buạ e i Yefta sěngkapẹ̌buạ dingangu manga tuměllang u Gilead. Bọu ene tumanạ u Gilead něhengkẹ i sie nakoạ měngangawasa ringangu pangahạ. Kụ su těngom MAWU e su Mizpa, i Yefta e něhabaru kal᷊awọu haghing tẹ̌tuntukange su tumanạ u Gilead.

¹²Bọu ene i Yefta rimolohu sěngkatau sol᷊ong anun datung Amon mědeạu mẹ̌bera kere ini, ”Kai apạe pẹ̌sasal᷊ang kami hakịu i kamene sumekẹ banuang kami?”

¹³Datun tau Amon simimbang su manga rarolohange ene u, ”Su těmpong umatʼu Israel narěntạ e wọu Misirẹ̌, i sire něngal᷊ạ ěntanang kami, nanětạ bọu Sal᷊ụ u Arnon sarang Sal᷊ụ u Yabok dingangu Sal᷊ụ u Yordan. Orasẹ̌ ini e lai sul᷊eko ene su pẹ̌darame.”

¹⁴Mase i Yefta něndolohu l᷊ai taumata sol᷊ong anun datung Amon

¹⁵mědeạu apasimbang kere ini, ”Kawanuang Israelẹ̌ e mamben tawe němul᷊aho ěntanan tau Moab arau ěntanan tau Amon.

¹⁶Su tempon tau Israel naněntang u Misirẹ̌, i sire nẹ̌timona Wěngạ u Akaba limiu wanua l᷊inggi wọu e nahumpạ u Kades.

¹⁷ Bọu ene i sire rimolohu taumata sol᷊ong anun datun Edom mědeạu pẹ̌dorong loahe lumiu wanuane. Kaiso i sie tawe mapakawalan sire. Bọu ene i sire nẹ̌dorongbe hal᷊ẹ̌ mẹ̌sul᷊ung su ratung Moab, kaiso i sie mal᷊ain tawe mapakawalan sire lumiu wanuane. Ual᷊ingu ene kawanuang Israelẹ̌ e nẹ̌tanạ e su Kades.

¹⁸ Bọu ene i sire naněpaseng daral᷊eng i sire limiu wanua l᷊inggi, kaiso tawe limiu wanuang Edom dingangu Moab, kaiso kai něngal᷊ạ dal᷊eng nělikụ sarang nahumpạ u sěmběkan daki wọu Moab, su sěmběkan Sal᷊ụ u Arnon. I sire němpẹ̌daseng sene, kaiso tawe limiu sal᷊ụ ene, ual᷊ingu wanua ene nasowa ěntanang Moab.

¹⁹ Nal᷊iung ene e umatʼu Israel něndolohu taumata sol᷊ong anun Sihon, datung Amori su Hesybon baugu mẹ̌paramisi lumiu wanuang Amori, watụ u i sire kai makoạ sol᷊ong banuan sire hala.

²⁰Kaiso i Sihon tawe napakawalan sire, watụ u i sie tawe mangimang u i sire kětạeng mapulu lumiu samatang. I sie katewe mundangu napasẹ̌bang u kal᷊awọu wuntuang u mẹ̌sasekẹ e bọu ene někomol᷊ẹ̌ su Yahas kụ bọu ene něngalo Israel.

²¹Kaiso MAWU e, Ruatang Israel, něngonggọu kal᷊auntu su kawanuang Israel němatạ si Sihon dingangu kal᷊awọu wuntuange. Kerene kakakoạ e umatʼu Israel nakahombang kal᷊awọu ěntanan tau Amori apang němpẹ̌tẹ̌tanạ su wanua ene.

²²Wanuang Amori ene nanětạ nikaianeng i sire wọu Arnon su sěmběkan timuhẹ̌, sol᷊ong sěmběkan sawěnahẹ̌ bọu Sal᷊ụ u Yabok dingangu wọu wanua l᷊inggi su sěmběkan daki sarang Sal᷊ụ u Yordan su sěmběkam bahẹ.

²³Kụ MAWU, Ruatang Israel ene e, něnagha tau Amori waugu pandungangu kawanuang MAWU.

²⁴Kụ orasẹ̌ ini e lẹ̌ěnnaěng i kau mapulu wue měngal᷊ạ kapia ngae? Ěntana kụ seng nionggọ i Kamos, mahan duatanu e si kau wotonge wue těbe tẹ̌taghuaneng i kamene. Kaiso apang kụ seng nionggọ u MAWU Ruatang kami si kami e, sarung tahutěndakeng i kami.

²⁵ Kiral᷊ingu i kau e kai limembong kapiane wọʼi Balak anạ i Zipor, datung Moab? I Balak ta kạdiongeng dimokạ arau nẹ̌sekẹ i kami.

²⁶Těllu hasụ su taunge karěngụ e Israel nakakaiang su Hesybon dingangu Aroër ore lai manga weọ e mạngělikụ e, ringangu kal᷊awọu soa su wiwihu Sal᷊ụ u Arnon. Dingangu kawe unụe karěngụu ene i kau tawe něngal᷊ạ ene kapia?

²⁷Tala, i kami e tawe nẹ̌sal᷊a si kamene. Seng i kau e nẹ̌sal᷊a ual᷊ingu rimokạ něngalo si kami. MAWU e mělahukung kụ sahěllo ini e němutusu pěrkara ini sutal᷊oarang kawanuang Israel dingangu kawanuang Amon.”

²⁸Kaiso ratung Amon tawe nẹ̌pandung tatanatang Yefta ene e.

²⁹Mase Rohkẹ̌ Susi e nẹ̌kawasa si Yefta. Tangú rimal᷊engke i Yefta limuhu wanuang Gilead dingangu Manasye wọu ene nẹ̌sul᷊e kapia sol᷊ong Mizpa su Gilead. Bọu ene i sie naněpasu raral᷊engange su wanuang Amon.

³⁰I Yefta nẹ̌taingu pẹ̌kakakědo ini su MAWU, ”Kereu MAWU e mapakawalang iạ měmatạ tau Amon,

³¹dingangu iạ e mẹ̌sul᷊e wue ringangu masal᷊amatẹ̌, tangú walạewe měnsang i sai kụ kahumotongange suměbang bọu wal᷊eku waugu maněnsomahẹ̌ si siạ, sarung takụ isěmba kere sasěmba tẹ̌tongkateng baugu MAWU.”

³²Bọu e i Yefta limiu Sal᷊ụ u Yordan baugu rumokạ tau Amon, dingangu MAWU e měngonggọu kal᷊auntu si sie.

³³I Yefta měngkatewe nangěnsue nanětạ bọu Aroër sarang banua mạngělikụ Minit — kakěpal᷊u soa e kai ruam pul᷊o su waụ e — dingangu lai karaune sarang Abel-Keramim. Mal᷊awọ kahěngang tau Amon nate, hakịu i sire kinawatạ u tau Israel.

³⁴Piạ i Yefta nẹ̌sul᷊e kapia sol᷊ong Mizpa anạ e wawine riměnta naněnsomahẹ̌ si sie apidu mẹ̌sẹ̌sal᷊ai kạpanengkele arabanạ. Kụ kai ene anạ e sěmbaụ tudẹ.

³⁵ Ene i Yefta nakasilọ e, i Yefta apạe masusa-susa naunge hakịu i sie něnggaghonaị pakeange, kapẹ̌berane, ”Kasiang anạku, nẹ̌golang-golang naungku e! Unụe kawe i kau harusẹ̌ mapakasusan dal᷊ungu naungku e tangu? Iạ kai seng nẹ̌salu, su MAWU dingangu iạ kai seng tawe makawol᷊eng kapia!”

³⁶Bọu e angkuěngu wawine ene si Yefta, ”I Amang kai seng nẹ̌salu su MAWU, ringangu MAWU e seng napakawalang Amang mamal᷊isẹ̌ karal᷊akisu tau Amon, sědụ i Amang ene. Kụ apang seng nikědong Amang karimạko koateng i Amang.”

³⁷”Kětạeng,” angkuěngu wawine ene tuhụ e, ”iạ kai piạ dorongku sěmbaụ: Gěllirengkon tempo iạ e rua wul᷊ang baugu mẹ̌daral᷊eng[9] su wawul᷊urange sěngkaral᷊eng dingangu manga hapịku. Paịse, iạ e kai reng sumangị u pẹ̌bawiahẹ̌ku, u iạ e kai sarung mate rem bědang parawang.”

³⁸I amange napakawalan sie, kụ bọu ene nirolohe niaparal᷊eng. Bawine ene ringangu manga hapị e simaka wul᷊ude waugu susan dal᷊ungu naung sene, watụ u i sie kai sarung mate reng tawe nẹ̌kẹ̌kawing dingangu piạ anạ e.

³⁹Nal᷊iung dua wul᷊ang, i sie nẹ̌sul᷊e sol᷊ong anung amange, wọu e i amange nẹ̌koạ apa nạung seng nikědone su MAWU e. Tangú nate e mahuala wědang parawang ene e. Ene kai panẹ̌takenge su komol᷊angu tau Israel, tiasa

⁴⁰manga rariọ mahuala němpẹ̌dal᷊eng karěngụu ěpạ u ěllo su ral᷊ungu sěntaung waugu susan dal᷊ungu naung mẹ̌tahěndung anạ i Yefta su Gilead.