Read Sangir MANGA MĚLAHUKUNG 12 Bible Online

MANGA MĚLAHUKUNG 12 - Sangir bible

MANGA MĚLAHUKUNG 12

¹Su tempo ene hěntong Efraim mědẹ̌dariahi waugu mẹ̌sekẹ, bọu e rimal᷊eng liměba Sal᷊ụ u Yordan makoạ sol᷊ong Zafon. I sire nẹ̌bera si Yefta, ”Unụ e i kau rimal᷊eng něnekẹ tau Amon kụ tawe němaringang i kami e? Orasẹ̌ ini e i kami sarung měnongkạ i kau ringangu ral᷊ohom bal᷊enu e su putung.”

²Něberạ e i Yefta, ”Bọu tal᷊oarang tau Amon ringang i kami tau Gilead, kai piạ pẹ̌sasitori marehe. I kamene sem bọu takụ nikuiang baugu pěngambang pěliwirẹ̌ si siạ e wọu tau Amon ene, kaiso i kamene tawe riměnta.

³Kụ sarangke iạ nangiakingu i kamene sarung tawe ruměnta mẹ̌tul᷊ungu iạ, ute iạ kai piạ ol᷊angu tamai mẹ̌sekẹ u tau Amon ene katewe mundangu iạ mate. Bọu e MAWU e něngonggọu kal᷊auntu si siạ nakawatạ si sire. Unụ e ini i kamene riměnta měngalo si siạ?”

⁴Bọu e i Yefta něngomol᷊ẹ̌ kal᷊awọu tau Gilead, bọu e i sire něnekẹ dingangu namatạ tau Efraim. (Tau Gilead mạtanạ su Efraim dingangu Manasye seng nitokeng tau Efraim u i sire kai seng něhaem batangengʼi sire wọu i Efraim hěntone.)

⁵Tau Gilead kapẹ̌sẹ̌sekẹ e ene, kimaiang nẹ̌kawasa apan tampạ u ral᷊iuang su Sal᷊ụ u Yordan, tadeạu makapěmetọ tau Efraim apam měmpẹ̌tal᷊ang. Su tempọeng piạ sěngkatau wọu hěntong Efraim kụ tumal᷊angke, i sie makiloahẹ̌ baugu lumiu, kụ tau Gilead nakiwal᷊o si sie, ”I kau e tau Efraim?” Kereu i sie simimbang u, ”Wal᷊ine,”

⁶i sire něngoro si sie pinẹ̌berang, ”Syibolet”. I sie sarung mẹ̌berang ”Sibolet” ual᷊ingu tawe nakaweram bawera ene su hinone. Mase i sire sarung měnamẹ si sie ringangu měmate si sie su tampạ sěmbaụ bọu tal᷊oarang kěbị tampạ u ral᷊iuang e. Tangu seng 42.000 su kataune tau Efraim nate su tempo ene.

⁷Ěnnungu taung karěngụ e i Yefta mạngahạ tau Israel. Bọu e i sie nate, kụ bọu ene nilěbing su soam pinamitingang puide[10] kụ su soang Mizpa su Gilead.

⁸Samuring Yefta umatʼu Israelẹ̌ e niwihing i Ebzan bọu Betlehem.

⁹I Ebzan piạ anạ e esẹ těllum pul᷊o su kataune ringangu wawine těllum pul᷊o su kataune. Manga anạ e wawine ene niapẹ̌kawinge ringangu taumata wọu hěnto wal᷊ine, kụ i sie něngal᷊a mahuala wọu hěnto wal᷊ine i sire těllum pul᷊o waugu manga anạ e esẹ. Pitu taung karěngụ e i Ebzan němihing umatu Israel,

¹⁰bọu ene i sie nate ringangu nilěbing su Betlehem.

¹¹Samuring Ebzan, umatʼu Israelẹ̌ e niwihing i Elon bọu hěnton Zebulon mapul᷊o taung karěngụ e.

¹²Bọu ene i sie nate kụ nilěbing su Ayalon su wanuang Zebulon.

¹³Samuring Elon, umatu Israelẹ̌ e niwihing i Abdon anạ i Hilel bọu Piraton.

¹⁴Anạ esẹ e, ěpạ u pul᷊o su kataune, ringangu manga pulunge esẹ e těllum pul᷊o su kataune. I sire sěngkatau-sěngkatau e mạnaghuang kalide sasakeěng e pẹ̌sěmbaụ. Ual᷊u taung karěngụ e umatu Israel iwẹ̌bihing i Abdon.

¹⁵Bọu ene i sie nate kụ nilěbing su Piraton su wanuang Efraim su wawul᷊urangu tau Amalek.