Read Sangir MANGA MĚLAHUKUNG 13 Bible Online

MANGA MĚLAHUKUNG 13 - Sangir bible

MANGA MĚLAHUKUNG 13

¹Tau Israel nẹ̌baradosa l᷊ai su MAWU, wọu e MAWU napakawalan tau Pilistin nẹ̌kawasa si sire karěngụ e ěpạ u pul᷊o su taunge.

²Su tempo ene piạ sěngkatau esẹ su soan Zora. Arenge i Manoah, wọu hěnton Dan. Kụ kawinge kai wantọ.

³Arawe piạ su sahěllo malạekatʼu MAWU e nẹ̌těngkaodẹ u watangenge si sie ringangu nẹ̌bera, ”Karěngụ u ini e i kau tawe makapěnaghuang anạ, kaiso tawẹ lai karěngụ e i kau e mẹ̌bawa kapapia, kụ makahombang sěngakatau anạ esẹ.

⁴Ual᷊ingu ene pakariagạ bue pakapia watangengu e. Kumbahang měnginung anggorẹ̌ arau měnginung inumang makakětị, arau kumaěng kaěng ipẹ̌tẹ̌tělling.

⁵ Sarangke anạu e nawantelẹ̌, kumbahang-bahang měngkai kạpotọ e utạ e, watụ u reng dokeng bọu ral᷊ungu gandongange i sie seng nitilakehu makoạ taumata nisarakang.[11] Seng i sie sarung mẹ̌tawakal᷊i mědeạu měliwirẹ̌ tau Israel bọu kawasang Pilistin.”

⁶Samuring ene kawingʼi Manoah nakoạ sol᷊ong anung Manoah kụ nẹ̌bera, ”Ringang, piạ darolohang u Mawu Ruata riměnta su anuku; gahị e kere malaekatʼu Mawu, hakịu iạ natakụ. Iạ tawe nakiwal᷊o měnsang narěnta wọu apa, ringangu i sie mal᷊aing tawe něhabaru arenge si siạ.

⁷Kaiso i sie něbera u iạ kai sarung piạ kapapia kụ makahombang sěngkatau anạ esẹ. I sie nẹ̌bera l᷊ai u iạ e tawe wotonge manginung anggorẹ̌ arau inumang makakětị, arau kumaěng kaěng ipẹ̌tẹ̌tělling, batụu rariọ ene harusẹ̌ isarakang su Ruata waugu makoạ sěngkatau ěllangu MAWU kanandung biahẹ̌.”

⁸Nakaringihẹ̌ ene, nẹ̌kal᷊iomanengke i Manoah su MAWU, kere ini, ”MAWU, mal᷊owọko i Kau rembeng dumolohu ěllangʼU ene kapia si kami waugu měhabaru apa kụ harusẹ̌ kapuraneng i kami e waugu rariọ ene kereu i sie mawantelẹ̌.”

⁹Mawu Ruata e rimaringihẹ̌ dorong i Manoah. Malaekatʼu MAWU ene riměnta l᷊ai piạ e kawing i Manoah těntal᷊ang kạkaiange su rahami. Su tempo ene kawinge tawẹ dise sene.

¹⁰Kụ i sie timal᷊ang něhabaru hal᷊ẹ̌ ene si sie, ”Ringang! kěllạ e, tau nạung kal᷊imona narěnta su anuku ene, riměnta kapia!”

¹¹I Manoah masahawụ-sahawụ timol᷊e kawinge. I sie riměduhẹ̌ tau ene kụ nakiwal᷊o, ”Seng i tuang ngae nẹ̌bawa habarẹ̌ su kawingku?” ”Kahěngang,” angkuěnge.

¹²Bọu e i Manoah nakiwal᷊o, ”Kereu apang niwerang Tuang ene e seng masěhụ tangu, apạ e harusẹ̌ koatengu rariọ ene ngae? Kereapạ e pẹ̌bawiahe sarung?”

¹³Angkuěng u Malạekatʼu MAWU e, ”Kawingu e tawe wotonge manginung anggorẹ̌ arau inumang makakětị, dingangu l᷊ai tawe wotonge kumaěng apa-apa wọu kalung anggorẹ̌, arau apa-apa ipẹ̌tẹ̌tělling. I sie harusẹ̌ mẹ̌koạ kal᷊awọu apan takụ pinẹ̌bera si sie, ringangu měndiagạ tadeạu tawẹ apa kụ tawe koatenge.”

¹⁵Bọu ene angkuěng i Manoah si Sie, ”Mal᷊owọko i Tuang deng měngampal᷊ẹ̌ kạdodọ tempo. I kami e reng měnasạ kambing měndangeng kal᷊imona e waugʼi Tuang.”

¹⁶Kaiso malaekatʼu MAWU e nẹ̌bera, ”Manilaing iạ e mahědo sini, iạ e tawe kumaěng kaěng kụ sarung sadiaěngu e. Kaiso kereu i kau mang mapulu měnadia, sadiạ e ene kere sasěmba tẹ̌tongkateng, kụ sěmbako su MAWU.” I Manoah e reng tawe nakahěngang u mẹ̌bẹ̌bisara ringange ene kawe nạung malạekatʼu MAWU e. Kụ i sie nẹ̌bera, ”Mạeng kerene, mal᷊owọko i Tuang deng měhabaru areng i Tuang, tadeạu kereu apa nạung niweran Tuang ene seng bọu nariadi ute, i kami e makaonggọbeng laadatʼi kami e waugʼi Tuang.”

¹⁸Malạekatʼu MAWU e nakiwal᷊o, ”Kawe unụe i kau e mapulu masingkạ u arengku? Arengku ene e kai areng makạdal᷊inaụ.”

¹⁹Tangu i Manoah e něngal᷊ạ e kambing měndangeng sěmbaụ dingangu gandung kạdodọ bọu e nitahone su wowom batu kụ nisěmba su MAWU, kụ kai MAWU mẹ̌kẹ̌koạ kal᷊awọu hal᷊ẹ̌ makạdal᷊inaụ.[12]

²⁰Těntal᷊ang putunge rụděllị tụtiol᷊ě taraị bọu pananěmbaěng, i Manoah dingangu kawinge nakasilo malạekatʼu MAWU e nasapuạ su ral᷊ungu rěllị u putung ene e, mětẹ̌timona l᷊angị. Buhụewe i Manoah nakahěngangu ene kawe malạekatʼu MAWU; tangu i sie ringangu kawinge mal᷊aing nẹ̌tumpěkuhẹ̌. Kụ seng tawe saụ nakasilo malạekatẹ̌ ene kapia.

²²Bọu e angkuěng i Manoah su kawinge, ”I kitẹ e nal᷊ahẹ u sarung mate watụ u i kitẹ e seng bọu nakasilo Ruata!”

²³Kawinge simimbang, ”Kereu MAWU e mambeng mapulu mamate si kitẹ e, nal᷊ahẹ u i Sie tawe mapulu manarimạ u sasěmba kụ isěmbang kitẹ si Sie ene; i Sie mal᷊aing sarung tawe měnodẹ u kěbị ini e si kitẹ arau měhabaru kal᷊awọu apan seng pinẹ̌bera-Ne si kitẹ e.”

²⁴Pira wul᷊ang samuring kawingʼi Manoah e namantelʼu sěngkatau rariọ esẹ, kụ bọu ene i sie nẹ̌gěllịu arenge i Simson si sie. Dariọ ene nasaria kụ nial᷊amatengu MAWU;

²⁵kụ sarangke i sie ene su pẹ̌darasengangu hěnton Dan su wěllạu Zora ringangu Esytaol, Rohkẹ̌ Susi e nanětạ e nẹ̌gěllịu katoghasẹ̌ si sie.