Read Sangir MANGA MĚLAHUKUNG 14 Bible Online

MANGA MĚLAHUKUNG 14 - Sangir bible

MANGA MĚLAHUKUNG 14

¹Piạ sahěllo i Simson nakoạ sol᷊ong Timna, kụ nakasilo sěngkatau mahualang Pilistin.

²Bọu e i sie napul᷊ẹ kụ nẹ̌bera su gaghurange, ”Iạ kai něnningu sěngkatau mahualang Pilistin su Timna. Iạ mědorong tadeạu rumal᷊eng u weraku si sie.”

³Kai gaghurange němpẹ̌bera u, ”Kawe unụe harusẹ̌ makoạ sol᷊ong anung tau Pilistin mědeạu makareạ kawingu, watụ u i sire hala e kawe tawe narekeng umatʼu MAWU? Kai tawẹ apa tangu mahuala mẹ̌tatal᷊ahino wọu ral᷊ungu ghal᷊ipohong kitẹ e arau wọu tal᷊oarang kal᷊awọu wansang kitẹ e?” Sasimbang i Simson si amange, ”Kai mang mahualang Pilistin ěndaị e kapuluku e. Kụ iạ mẹ̌lěharapẹ̌ u i amang kụ rembem mapulu rumal᷊engu werang iạ e si sie.”

⁴Gaghurang i Simson kai wěga wue u kai MAWU e napakariading Simson mẹ̌kẹ̌koạ hal᷊ẹ̌ ene. Batụu, MAWU e kapědẹ̌deạ e loahe waugu měnekẹ tau Pilistin. Su tempo ene tau Pilistin nẹ̌kawasa tau Israel.

⁵Tangú rimal᷊engke i Simson sol᷊ong Timna ringangu ghaghurange ruang katau. Těntal᷊ang i sire lụliu waelu anggorẹ̌ sěngkamonaěnge, i Simson nẹ̌sombangu singa sěmbaụ kụ kawuhuang. Singa ene mẹ̌munggal᷊ọ,

⁶kụ sěngkělindịu i Simson natoghasẹ̌ ual᷊ingu kawasang MAWU. Bọu ene i sie němamehe singa ene ringangu limane, tabidạu binatang ene kere kambing sěmbaụ. Hal᷊ě ene nirěmmase su gaghurange.

⁷Bọu ene i Simson nẹ̌tiwo mahuala ene kụ nahumbisara ringange, ringangu i Simson kawe mapulun sie.

⁸Ene ta nararěnnạ wọu ene, i Simson saụewe natamai kụ mẹ̌kawing dingangu mahuala ene. Su raral᷊engang, i sie nělengako mědeạu měmanda bangken singa nạung sem bọu nipatene. Nahumpạ sene i sie nakasilo katiupang mal᷊awọ su ral᷊ungu wangke ene, kụ piạ l᷊ai madu.

⁹I sie něngahụ e madu sol᷊ong dal᷊ungu limane, mase rimal᷊engke apidu kạkaěnge madu ene. Bọu ene i sie nakoạ sol᷊ong anung gaghurange ringangu něngonggọ l᷊ai sěmbahageang bọu madu ene si sire kụ i sire nahungkaěng. Arawe i Simson tawe něhabarẹ̌ u madu ene kawe nial᷊ạ e wọu bangken singa.

¹⁰Sarangke i amang i Simson nakoạ e sol᷊ong bal᷊eng mahuala ene, i Simson němangungke sal᷊iwang paị sene, u kawe kerene tundung mangangudạ.

¹¹Ene tau Pilistin nakasilọ e si sie, i sire namile mangangudạ i sire těllum pul᷊o su kataune ipěndingang si sie.

¹²Bọu e i Simson nẹ̌bera si sire, ”Iạ e kai piạ tatinggungku. Kereu i kamene makatikạ, i kamene sěngkatau-sěngkatau e takụ gěllirangu hekạ leneng al᷊usẹ̌ pẹ̌sěngkauhẹ̌ dingangu pakeang maral᷊ěnggihẹ̌ e pěsěmparẹ̌. I kamene takụ gěllirangu tempo pitu ěllo karěngụ u sal᷊iwangu kawing ini e, pěnikạ tatinggung.

¹³Kai kereu i kamene tawe makatikạ ute seng i kamene sěngkatau-sěngkatau e harusẹ̌ pẹ̌gěllị si siạ hekạ leneng al᷊usẹ̌ pẹ̌sěngkauhẹ̌ dingangu pakeang maral᷊ěnggihẹ̌ pẹ̌sěmparẹ̌.” Mase tau Pilistin ene nẹ̌bera, ”Wotonge! Kụ ini e sen tempone kụ tikạ e tatinggung ene.”

¹⁴Tangú i Simson nẹ̌bera, ”Wọu kumakaěnge, sụsěbang apan nikaěnge; bọu matoghasẹ̌ e sụsěbang marěngang.” Nal᷊iung těllu ěllo e i sire wědal᷊ain tawe nakạtikạ tatinggung ene.

¹⁵Tangú su ěllo kaěpạ e nẹ̌berạ e i sire su kawingʼi Simson, ”I kau e harusẹ̌ pěngologẹ̌ kawingu tadeạu i sie mapulu měhabarẹ̌ si kami mangal᷊eng tatinggung ene. Kereu tala, ute i kami e sarung měnutung si kau ringangu ral᷊ohom bal᷊eng amangu. Luhude i kau nẹ̌gausẹ̌ i kami baugu nengěnsue darotong i kami!”

¹⁶Ual᷊ingu ene, kawing i Simson nakoạ sol᷊ong anun Simson apidu kạkiạ e, kụ bọu e nẹ̌bera, ”Iạ masingkạ i kau tawe kumakěndagu iạ. Kawe unụe i kau e nẹ̌gěllịu tatinggung su manga hapịku, kaiso i kau e tawe něhabaru mangal᷊ene si siạ? Tantu i kau mạběnsing u iạ!” Angkuěng i Simson, ”Hědoko kạdodọ! Baugu ghaghurangku hala e, iạ mal᷊ain tawe naul᷊ị, unụe wue i kau e harusẹ̌ takụ pẹ̌habareng?”

¹⁷Karěngụ u sal᷊iwang pitu ěllo ene, kawingʼi Simson měngkate kụkiạ. Kụ ual᷊ingu i sie měngkate hanesẹ̌ mẹ̌tẹ̌tuhědesẹ̌, tangu su ěllo kapitune, i Simson něhabaru mangal᷊eng tatinggung ene si sie. Bọu e kawingi Simson něhabaru ene su tau Pilistin.

¹⁸Kụ su ěllo kapitune těntal᷊ang matangěllo ren tawe simẹ̌dạ, taumatan soa ene nẹ̌bera si Simson, ”Kai apa limembong karěngange wọu madu? Ringangu kai apa limembong katoghase wọu singa?” I Simson simimbahẹ̌, ”Kereu i kamene tawe mẹ̌gausẹ̌ kawingku, i kamene sarung tawe makatikạ tatinggung ene!”

¹⁹Sěngkělěndịu i Simson natoghasẹ̌ ual᷊ingu kawasan MAWU, wọu e i sie nakoạ sol᷊ong Askelon. Paị sene i sie němate manga esẹ pakeange maral᷊ěnggihẹ̌ i sire těllum pul᷊o su kataune. I sie něngal᷊a pakeang i sire ene kụ nangonggọ si sire těllum pul᷊o su kataune kụ seng něnikạ tatinggung ene. Bọu ene i sie napul᷊ẹ sol᷊ong bal᷊ene piạ sěsile.

²⁰Bọu e i amange kinaratingange něngonggọu kawing i Simson ene e su taumata kụ nakoạ tumataking si Simson su tempong pẹ̌kakawinge.