Read Sangir MANGA MĚLAHUKUNG 15 Bible Online

MANGA MĚLAHUKUNG 15 - Sangir bible

MANGA MĚLAHUKUNG 15

¹Tawe nararěnnạ wọu ene, piạ e musungu pěmaměnsạ gandung, i Simson tamai nẹ̌tiwo kawinge. I sie nẹ̌bawa kambing měndangeng sěmbaụ baugu kawinge ene. Nẹ̌berạe i Simson si amange kinaratingang, ”Iạ mapulu sol᷊ong kamarẹ̌ mědeạu mẹ̌sombangu kawingku.” Kaiso i amange kinaratingange tawe napakawalan sie.

²Angkuěnge si Simson, ”Iạ mạngiral᷊ing u i kau e kahěnga-hěngang měbẹ̌binsị i sie, kụ i sie sen takụ nionggọ su hapị u. Kai i kau e wotonge měngal᷊ạ tuarine. I sie něngalembong kasadadạ e.”

³Něberạ e i Simson, ”Kai apạe takụ koateng baugu tau Pilistin sěnsul᷊e ini, wal᷊inewe sal᷊aku!”

⁴Bọu e i sie tamai něnamẹ dal᷊ugẹ̌ kal᷊awọe těllu hasụ su waụ e. Tol᷊eng dal᷊ugẹ̌ tamai ene nilaikị e pẹ̌tahạ dua. Su tal᷊imbukung laikị e ene, nitahoěngu utụ e pẹ̌sěmbua.

⁵Bọu ene i sie naparěllị u kal᷊awọu lautụ tamai ene wọu e napakapěllọu manga dal᷊ugẹ̌ ene su ral᷊ungu manga rahaming tau Pilistin. Natutungke kal᷊awọu gandung apan seng nipěnsạ sene. Sarangkate sasuang gandung dingangu kal᷊awọu rahaming anggorẹ̌ mal᷊aing natutung.

⁶Tau Pilistin tamai něnanẹ̌sui si sain nẹ̌koạ ene. Bọu e taumata něhabarẹ̌ si sire u seng i Simson nẹ̌koạ ene, ual᷊ingu i amange kinaratingange su Timna seng nẹ̌gěllịu kawing i Simson su sěngkatau hapị i Simson, ual᷊ingu ene tau Pilistin nanutung tau wawine ene ringangu kal᷊awọu ral᷊ohom bal᷊eng amange sarang nahěpusẹ̌.

⁷Bọu e angkuěng i Simson su tau Pilistin ene, ”Oh, kai kerene kakakoạ i kamene ěng! Iạ mẹ̌salu reng tawe matanạ marěmasẹ̌ kereu iạ den tawe měmal᷊isẹ̌ hal᷊ẹ̌ ene si kamene!”

⁸Bọu ene i sie něngalo si sire ringangu mahasa kụ němate lawọ bọu tal᷊oaran sire. Bọu ene i sie rimal᷊eng kụ nẹ̌tanạ su ral᷊ungu liang su wul᷊ude sěmbaụ mawatu su Etam.

⁹Tangú tau Pilistin diměnta sol᷊ong banuang Yehuda kụ nẹ̌daseng sene, wọu e simowa su soang Lěhi.

¹⁰Tau Yehuda nakiwal᷊o su tau Pilistin, ”Unụe i kamene něngalo si kami?” I sire simimbang, ”I kami e riměnta mědeạu měnamẹ si Simson, tadeạu i kami e miěbạ i sie e mẹ̌sul᷊ungkeweng i sie miěbạ i kami e.”

¹¹Nakaringihẹ̌ ene, rimal᷊engke tau Yehuda i sire těllu hiwu su kataune sol᷊ong liange su wul᷊ude watu su Etam. Sene i sire nẹ̌bera, ”Simson, i kau kai wěga, karạ tau Pilistin kawe kawasa si kitẹ e? Kai seng ini tangu nikoạ u si kami!” I Simson simimbang, ”Iạ e kětạeng němal᷊isẹ̌ apan nikoạ i sire si siạ.”

¹²Angkuěng i sire, ”I kami e riměnta waugu měngikị dingangu měnarakang i kau e su tau Pilistin.” I Simson nẹ̌berạ, ”Pẹ̌kědọe kal᷊imona, u i kamene hala e tawe sarung mamate si siạ.”

¹³”Kerenẹ e,” angkuěng i sire, ”kahěngang bue i kami tumbạeng mapulu měngikị dingangu měnarakang i kau su tau Pilistin. I kami e tawe měmate si kau.” Bọu e i sire něngikị i sie ringangu tal᷊i rarua rem buhu, kụ nẹ̌bawa si sie sol᷊ong likudu liang ene.

¹⁴Piạ e i Simson niwawa sarang nahumpạ u Lěhi e, tau Pilistin nahuntal᷊ang nakoạ sol᷊ong anune kapẹ̌mansage. Sěngkělěndịu i sie natoghasẹ̌ ual᷊ingu kawasang MAWU. Kal᷊awọu tal᷊i laikị limane e nasuem běsụ e kere namaměsụ tal᷊i seng nahěngisẹ̌.

¹⁵Bọu e i sie nakaěbạ e ruhim běngahu kalide sěmbaụ kụ bědang buhu. I sie němurụ e ruhi ene, wọu e nipakẹ e piněmanggo si sire sěhiwu su kataune sol᷊ong nate.

¹⁶Tangú nẹ̌kantarị e i Simson, ”Dingangu ruhim běngahu kalide e, takụ pinělimadẹ̌ sěhiwu su kataune; dingangu wěngahu kalide e, takụ niěndụ[13] kal᷊awọu maietʼi sire.”

¹⁷Bọu e i sie něnděmmẹ u ruhing běngahẹ̌ ene. Kụ kai ual᷊ingu ene hakịu tampạ ene nisěbạ Ramat-Lěhi.[14]

¹⁸Bọu e i Simson nakapěndang narou-rou, hakịu i sie kimahiorọ su MAWU. I sie nẹ̌bera, ”MAWU, buhụewe i Kau nẹ̌gěllịu kal᷊auntu masaria ini e si siạ. Tangú ini e iạ kai harusẹ̌ pakapaten dou, kụ samekangu tau Pilistin ini kụ běgang Kau e?”

¹⁹Tangú Mawu Ruata e nělekese lohangu wul᷊ude watu su Lěhi ene, mase siměpụ e akẹ bọu tampạ ene. I Simson něnginung, kụ nakapěndang nahuweka kạpia. Hakịu ene simbul᷊u akẹ ene nisěbạ e Simbul᷊u Akẹ u Hakor.[15] Simbul᷊u akẹ ini e wědang ene su Lěhi.

²⁰Duam pul᷊o su taunge karěngụ e i Simson něngahạ tau Israel piạ i sire pinẹ̌kawasaěngu tau Pilistin.