Read Sangir MANGA MĚLAHUKUNG 17 Bible Online

MANGA MĚLAHUKUNG 17 - Sangir bible

MANGA MĚLAHUKUNG 17

¹Piạko sěngkatau esẹ arenge i Mikha. I sie mạtanạ su wawul᷊urangu Efraim.

²Piạ sěhěllo i sie nẹ̌bera si ninange, ”Inang, piạ i ninang kinailangengu roitẹ̌ sal᷊aka sěhiwu mahasụ su kal᷊ẹ̌pane e, iạ nakaringihẹ̌ u i ninang něngane mẹ̌tatakone. Ninang, ini roite! Kai iạ nẹ̌tako.” I ninange simimbang, ”Mal᷊owọko i kau e al᷊amateng u MAWU!”

³I Mikha něnul᷊eng doitẹ̌ ene si ninange, mase i ninange nẹ̌bera, ”Tadeạu i kau anạku e mal᷊iwirẹ̌ bọu laane kụ sem bọu niweraku e, iạ maněmbang sal᷊aka ini e su MAWU mědeạu ipẹ̌koạ tul᷊ada kalu kụ ěmboěngu sal᷊aka. Kụ doitẹ̌ ene e takụ isul᷊e si kau.”

⁴Tangú sarangke i Mikha e nanul᷊ẹeng doitẹ̌ ene si ninange, i ninange e něngal᷊ạ dua hasụ sukal᷊ěpane roitẹ̌ ene e, kụ nionggọ e su sěngkatau tukang u sal᷊aka. Bọu e i sie rimolohʼu tukang ene e pinẹ̌koạ tul᷊ada wọu kalu sěmbaụ niěmboěngu sal᷊aka ene. Bọu ene tul᷊ada ene e nipěllọ e su wal᷊eng Mikha.

⁵I Mikha sẹ̌sane seng piạ tampạ u pananěmbaěnge sěmbaụ. I sie nẹ̌koạ tul᷊adang mahan duata ringangu pakeange efod[17] sěmbaụ kụ bọu e něhengkẹ u sěngkatau wọu manga anạ e esẹ nakoạ imang.

⁶ Su tempo ene tau Israel tawẹ datune; sěngkatau-sěngkatau e měkẹ̌koạ apang lẹ̌ěnaěng nihino.

⁷Su tempo ene lai piạ sěngkatau mangudạ bọu hěnton Lewi. Kal᷊amona i sie mạtanạ su Betlehem su ěntanang Yehuda.

⁸Arawe su orasẹ̌ ini e i sie seng naněntang u soa ene kụ kạdal᷊enge mědẹ̌deạ tampạ pẹ̌tatanakenge wal᷊ine. Su ral᷊ungu raral᷊enge ene i sie nahumpạu wal᷊eng Mikha su wawul᷊urangu wanuang Efraim.

⁹I Mikha nakiwal᷊o si sie, ”I kau e kai tau a?” Tau ene simimbang, ”Iạ e kai tau Lewi wọu Betlehem su Yehuda. Iạ kai kapẹ̌dẹ̌deạ e tampạ pẹ̌tatanakeng.”

¹⁰I Mikha nẹ̌bera, ”Katanạ e ringangku e sini, tadeạu i kau e makoạ měnanasạ ringangu imang i kami. Iạ hědo mẹ̌gěllịu roitẹ̌ sal᷊aka mapul᷊ong kal᷊ěpa si kau e apan taung, dingangu lai pakeang arau kaěng.”

¹¹Umbaseng tau Lewi ene e kimire, bọu e nihengkẹ i Mikha nakoạ imange. I sie natanạ su wal᷊eng Mikha ringangu nikoạ kere anạ i Mikha wọu kombang.

¹³Ene angkuěng i Mikha, ”Ho, orasẹ̌ ini e iạ mạngiaking u MAWU e sarung mẹ̌koạ mapia si siạ batụu seng piạ sěngkatau tau Lewi e nakoạ imangku.”