Read Sangir MANGA MĚLAHUKUNG 18 Bible Online

MANGA MĚLAHUKUNG 18 - Sangir bible

MANGA MĚLAHUKUNG 18

¹Su tempo ene su Israel tawẹ datune. Hěnton Dan bědang kạdeạ e wanua waugu makoạ pẹ̌bawanuaěng i sire, watụ u i sire wědang lai tawe nakạěbạ ěntana ringangu manga hěnto wal᷊ine e su ral᷊ungu kawanuang Israel.

²Ual᷊ingu ene i sire němile limang katau matatoghasẹ̌ bọu tal᷊oaram patikụ ghal᷊ipoho su ral᷊ungu hěnton sire kụ mạtanạ su Zora ringangu Esytaol, mase nẹ̌gěllịu hal᷊ẹ̌ i sire limang katau ene waugu pananẹ̌sui wanua ene. Tangú nẹ̌buạ e i sire ene, kụ nahumpạ su wawul᷊urange su ěntanang Efraim. Sene i sire nẹ̌tanạ su wal᷊eng Mikha.

³Piạ e nạung sumuẹ̌ su wal᷊e ene e, i sire nakaringihẹ̌ umbaseng tau Lewi ene e nẹ̌bisara, i sire nakakiral᷊a wọu lagune. Kụ, i sire riměnta su anune ringangu nakiwal᷊o, ”Kawe unụ e i kau e sini? Kai a kẹ̌koatengu? Kai i sai tangú nẹ̌bawa si kau?”

⁴Tau umbaseng ene simimbang, ”Iạ ene sini e kai ual᷊ingu i Mikha. Kai i sie něhengkẹ u iạ e nakoạ imange, ringangu nẹ̌gěllịu bawaehe si siạ e.”

⁵Bọu ene angkuěng i sire si sie, ”Mạeng kerene, tul᷊ungko kiwal᷊oi su Mawu Ruata měnsang daral᷊eng i kami piạbe ual᷊ine arau kai tala.”

⁶Sasimbangu imang ene, ”Abe katakụ. MAWU e seng něngal᷊amatẹ̌ daral᷊eng i kamene ini.”

⁷Bọu ene tangú nẹ̌buạ e i sire lima ene kụ nakoạ sol᷊ong Lais. Sene i sire měmpạnitị tumanạ e. Nal᷊ahẹ e u kakakoạ u pẹ̌bawiahu tumanạ u Lais ene e kai mẹ̌sul᷊ungu kakakoạ u pẹ̌bawiahu tau Sidon. Manimbe i sire naghea, kụ marau wọu anun tau Sidon, i sire měbẹ̌biahẹ̌ marěmasẹ̌ dingangu mal᷊enehẹ̌, tawẹ sědụ e, mal᷊unsemahẹ̌, dingangu mamben tawẹ konsange apa.

⁸Piạ i sire lima ene nẹ̌sul᷊e su anun taumatane hěnto sěmbaụ su Zora ringangu Esytaol, i sire nirorongang apěgẹ̌gěllịu laporang.

⁹I sire mal᷊aing němpẹ̌berau, ”Bọete i kitẹ měngalo Lais. I kami e sem bọu natamai, ringangu nakasilo u ěntanane mapia, mal᷊oahẹ̌ dingangu maghẹ̌si, patikụ sabarange mang piạ. Abe měngkai hanesẹ̌ sini ringangu tawe mẹ̌kakoạ manga apa. Pakal᷊ighạko tamai kụ pul᷊ahoko wanua ene. I kamene sarung makahombang u tumanạ e mamben tawe nangěnna u kai sarung aloěng. I kami e mạngiaking u Mawu Ruata e kai něngonggọu wanua ini e si kamene.”

¹¹Ual᷊ingu ene, pẹ̌buạ e wọu Zora ringangu Esytaol ěnnungu hasụ su kataune hěnton Dan. Dingangu aghide naipudẹ̌,

¹²i sire nakoạ sol᷊ong sěmběkam bahẹ bọu Kiryat-Yearim su ěntanang Yehuda mase nẹ̌daseng sene. Ual᷊ingu ene hakịu tampạ ene wědang isẹ̌sěbạ Pědarasengang i Dan.

¹³Bọu ene i sire rimal᷊eng sol᷊ong bawul᷊urangu Efraim sarang bal᷊eng Mikha.

¹⁴I sire lima mẹ̌pẹ̌pahimang nạung nirolohẹ̌ e nẹ̌bera su manga hapị e, ”Masingkạ bue i kamene u su wal᷊e sěmbaụ bọu tal᷊oarang manga wal᷊e tamai ini e piạ tul᷊ada nạung nilaburang u sal᷊aka? Piạ lai manga tul᷊ada wal᷊ine ringangu pakeang efod. Kěnangko tahuěnnai kai a hinong koateng i kitẹ e.”

¹⁵Bọu e i sire nakoạ sol᷊ong bal᷊eng Mikha, katatanakengu umbaseng tau Lewi ene, ringangu makịbal᷊ong kakakoạ e.

¹⁶Su tempo ene ěnnungu hasụ su kataune sordado hěnton Dan, piạ aghide nasukụ e, mạhundarisị su těngom pasěllangeng.

¹⁷I sire lima mẹ̌papahimang ene e, apidu nahunsuẹ̌ su ral᷊ungu wal᷊e, kụ něngal᷊ạ tul᷊ada kalu nilaburangu sal᷊aka ene ringangkewem manga tul᷊ada wal᷊ine, ringangu efod. Kal᷊endesangu Lewi ene katahundarisị e dingangi sire sordado ěnnungu hasụ ene su tukadu pasěllangeng.

¹⁸Ene piạ i sire lima nasuẹ̌ su wal᷊eng Mikha ringangu něngal᷊ạ e efod, dingangu tul᷊adang mahang duata ene, umbaseng tau Lewi e nakiwal᷊o, ”Kụ ini e nikoạ i kamene?”

¹⁹I sire simimbang, ”Karěmase! Abe pakiwal᷊o. Měngkate tol᷊e ringangi kami, hědọe i kau makoạ imang dingangu měnasa si kami. Sul᷊ungu makoạ imang u tumbạu sěntahanakeng mạpiangbe makoạ imang u wansa sěmbaụ.”

²⁰Umbaseng tau Lewi ene mal᷊uasẹ̌ su těgu ěndaị e. Kụ i sie něngal᷊ạ e efod dingangu manga tul᷊adang mahan duata ene wọu ene timol᷊e si sire.

²¹Bọu ene ghapaěng ene e naněpaseng daral᷊eng i sire, nikal᷊imonaěng u manga rariọ, binatang dingangu manga apal᷊iwụ i sire.

²²Ene piạ e i sire seng marau, i Mikha nẹ̌kui manga lampunge kụ seng sěngkapěnahusu si sire ghal᷊ipohong hiten Dan ene. Nasandigen sire tangu,

²³i Mikha ringangu manga taumatane e němpẹ̌buheang si sire. Taumatang ghal᷊ipohong Dan ene e němpẹ̌bihu kụ nakiwal᷊o si Mikha, ”Kai piạ a? Kawe unụe taumata kereng kal᷊awọe němpẹ̌děnta?”

²⁴I Mikha simimbang, ”I kamene kai nahuntal᷊ang nẹ̌bawa manga tul᷊adaku ringangu imange, kụ iạ kai sen tawẹ manga apa lai, kutẹu i kamene relaing mẹ̌berau, ’Piạ manga apa!’ ”

²⁵Angkuěngu ghal᷊ipohong Dan tangú, ”Mapiambe ghěmming mohong; kụ kumbahangbe sarang i sire ini e lumangehẹ kụ měngalo si kau. Kụ hědong i kau ringangu kal᷊awọu anạ u sěngkataunu e měngkairị.”

²⁶Bọuten nẹ̌bera kerene, taumatang hěnton Dan e naněpasen daral᷊eng i sire. I Mikha e nakasilo u i sire e něngalembong katoghase marau wọu i sie, ual᷊ingu ene i sie nẹ̌sul᷊e kụ napul᷊ẹ.

²⁷Samurin sire ghal᷊ipohong Dan ene němpěnalangu imang ene ringangu manga apal᷊iwụ pẹ̌kakal᷊iomaneng koạ i Mikha ene, i sire tamai něnekẹ Lais, soa e tumanạ e měmpẹ̌bẹ̌biahẹ̌ marěmasẹ̌ dingangu mal᷊enehẹ̌. (Soa ene kai su wal᷊ane sěmbaụ dingangu soam Bet-Rehob.) Taumatang ghal᷊ipohong Dan ene e němate kal᷊awọu tumanạu Lais bọu ene nanutung soa ene. Tawẹ apa taumata riměnta němpẹ̌tul᷊ungu tau Lais ene, ual᷊ingu tampạ i sire e naghea ringangu maraun Sidon. Bọu ene taumatan Dan němangung kapia soa ene kụ bọu ene natanạ sene.

²⁹Arengu soa ene niawengang i sire nakoạ Dan, timuhụ arengu i upung i sire, kụ kawe i Dan, anạ i Yakub.

³⁰Tul᷊adang mahan duata niwawang sire ene e, nirarisị i sire su soa ene, mase něhengkẹ i Yonatan anạ i Gersom, pulung i Musa, nakoạ imang i sire. Hěntong Gersom ini e tatapẹ̌ nakoạ imang u hěnton Dan ene sarung tempong tau Israel nihengkẹ dingangu nirěmmẹ sol᷊ong banua wal᷊ine.

³¹Tul᷊adang mahan duata koạ i Mikha e těbe su Lais karěngụu Tentang Mawu e ene su Silo.