Read Sangir MANGA MĚLAHUKUNG 19 Bible Online

MANGA MĚLAHUKUNG 19 - Sangir bible

MANGA MĚLAHUKUNG 19

¹Su tempong Israelẹ̌ bědang tawẹ datune, piạ sěngkatau tau Lewi nẹ̌tanạ su ul᷊une, su wawul᷊urangu Efraim. I sie něngal᷊ạ sěngkatau wawine wọu Betlehem Yehuda nakoạ dokạ e.

²Kaiso samurin tau wawine ene wọu limangehẹ̌[18] si sie, hakịu i sie nẹ̌sul᷊e kapia su wal᷊eng amange su Betlehem. Sarangke wawine ene nẹ̌tanạ sene ěpạ u wul᷊ang karěngụ e,

³tau Lewi ene tamai ramahi u si sie waugu měnahionge kapia si sie. I sie tamai kụ nẹ̌bawa ěllange sěngkatau ringangu kalide ruam baụ. Nahumpạ e sene, wawine ene e nẹ̌bawa si sie su anung amange. Sarangke i amangu wawine ene e nakasilo si sie, i sie něnarimạ dingangu naunge mal᷊uasẹ̌,

⁴kụ mẹ̌sẹ̌sěding i sie tadeạu kumbahangbe mapul᷊e. Ual᷊ingu ene i sie natanạ karěngụ u těllu ěllo kụ kụkaěng dingangu mạnginung dingangu mẹ̌tẹ̌tikị sene ringangu rokạ e ene.

⁵Su ěllo kaěpạ e, i sire nẹ̌bangung deng mal᷊uka-l᷊ukadẹ̌ kụ nẹ̌dariahi mẹ̌buạ. Kaiso i amangu rariọ bawine ene nẹ̌bera su tau Lewi ene, ”Kaěngko kal᷊imona tadeạu matoghasẹ̌. I kamene wotonge mẹ̌buạ samuri.”

⁶Tangú naiangke tau Lewi ene, wọu e kimaěng dingangu nanginung sěngkapangidopẹ̌ dingang i amang u rariọ bawine ene. Kai sarangke i sie rimarisị kụ mẹ̌buạ e, i amangu rariọ bawine ene něngologẹ̌ tadeạu abe ral᷊eng. ”Pẹ̌ngiloahẹ̌ko kal᷊imona,” angkuěnge, ”kụ pẹ̌tikịko sini.” Tangú natanạ e tau Lewi ene sene relaing sěhěbi.

⁸Su ěllo kal᷊imane, mal᷊uka-l᷊ukadẹ̌, piạ i sie mẹ̌buạ e, i amang u rariọ bawine ene nẹ̌berako lai, ”Hotede, kaěngko kal᷊imona; měntehang buhụ e ral᷊eng.” Tangú i rẹ̌dua e kimaěng sěngkakaěng dingang, kụ mẹ̌tẹ̌těngkatěmudẹ̌ sarang matangěllo mạnětạ kạsědạ e.

⁹Bọu ene sarangke tau Lewi ene ringangu rokạ e ore lai ěllange kụ mẹ̌buạ e, i amang ene nẹ̌bera, ”Ěllo e seng kạkạdanineng mahěbi, seng tạ kaděngụ e marěndung, mapiawe pẹ̌tikị kapia sini kụ pěngiloahẹ̌ko. Diěllo i kamene wotonge mẹ̌bangung deng mal᷊uka-l᷊ukadẹ̌ mẹ̌buạ kụ mapul᷊ẹ.”

¹⁰Kai tau Lewi ene madiri relaing mẹ̌tikị sene. I sie ringangu rokạ e mẹ̌buạ, sěngkapẹ̌buạ dingangu ěllange ringangu kalidene rarua piạ kal᷊aianenge. Ene kakạhěbine i sire nahumpạen děduhu Yebus (kụ kai Yerusalem). Bọu e ěllang ene nẹ̌bera su mawune, ”Tuang, bọete i kitẹ motong kụ mẹ̌tikị su soan tau Yebus ini e kapapiane.”

¹²Arawe i tuange simimbangu, ”Tala! I kitẹ den tawe maědung su tampạ kụ tumanạ e wal᷊inewe tau Israel. Bọete i kitẹ e remben saụ maněpasu raral᷊eng maning kadodọ kụ hědọ e mẹ̌tikị su Gibea arau Rama.”

¹⁴Ual᷊ingu ene i sire měngkate rimal᷊eng dingangu tawe něngirul᷊e su Yebus. Matangěllo seng simědạ piạ i sire nahumpạ su Gibea su ěntanang hěnton Benyamin.

¹⁵I sire naotong sene mědeạu mẹ̌tikị, bọu e nahunsuẹ̌ su soa kụ nahungkaiang su rěllahu wal᷊eng lawọ. Kai tawẹ u sarang sěngkatau něnotẹ̌ i sire sol᷊ong bal᷊en sire mědeạu mẹ̌tikị.

¹⁶Ené, i sire nahungkaiangke su rěllahu wal᷊eng lawọ, narěntạe sěngkatau maghurang bọu pělẹ̌hal᷊ěkange su lantang. I sie tuhụ hinone kai wọu wawul᷊urangu Efraim kai orasẹ̌ ini natanạ su Gibea. (Tumanạ e wal᷊inẹ su Gibea e ute kai hěntom Benyamin.)

¹⁷Piạ e tau maghurang ene nakasilo tau Lewi ene su rěllahu wal᷊eng lawọ, i sie nakiwal᷊o, ”I kau e kai wọu a, ringangu sol᷊ong a?”

¹⁸Tau Lewi ene simimbang, ”I kami e wuhu sasongo wọu Betlehem su Yehuda, kai kạdal᷊enge mapul᷊ẹ sarang bal᷊e[19] su ul᷊ung bawul᷊urangu Efraim. Iạ e kai wọu paị ene. Tawẹ u sarang sěngkatau wọu tumanạ u soa ini e měnarimạ i kami mẹ̌tikị su wal᷊en sire.

¹⁹I kami e tawe mẹ̌gausẹ̌ manga apa wal᷊ine; sinasạ i kami e wotonge wue. Piạ l᷊ai manga rěmpugẹ̌ dingangu kaěng keweng kalideng kami e; borotẹ̌ dingangu anggorẹ̌ baugeweng kandua sěngkawingang dingangu mẹ̌tatangkuang siạ e.”

²⁰Bọu e angkuěng u tau maghurang ene, ”Abe katakụ, hědo iạ mẹ̌tul᷊ung. Manịeng tawe mẹ̌tikị sini.”

²¹Bọu ene i sie němaringang si sire sol᷊ong bal᷊ene kụ bọu ene něngonggọu kaěng su manga kaliden sire. Kụ sarạengbeng manga sakene seng bọu němpanguhasẹ̌ laedʼi sire e, i sire nahungkaěngke.

²² Ene i sire kạpangirol᷊one, sěngkělěndịu wal᷊e ene nilikutangu taumata ral᷊akisẹ̌ su soa ene. I sire měngkate apa něnggagholang tukadẹ̌ dingangu němpẹ̌pawera su tau maghurang ěndaị e, ”Sarakangko si kami tau esẹ niparingang sol᷊ong bal᷊enu e. I kami mapulu mẹ̌pakẹ i sie!”

²³Tau maghurang ene siměbang kụ nẹ̌bera si sire, ”Kumbahang, manga anạ u sěmbaụ! Iạ mẹ̌dorong, kumbahang bue mẹ̌koạ dal᷊akisẹ̌ dingangu tawe hinone kerene, u i sie kawe sakeku.

²⁴Iạ hědọ e mẹ̌gěllịu rokạ e ringangu anạku wawine si kamene kụ balạe i kamene pẹ̌batụ abul᷊ing kamene si sire. Kai kumbahangbe mẹ̌koạ dal᷊akisẹ̌ baugu sakeku ene!”

²⁵Kai arawe i sire matatingkaị ene e měngkate mẹ̌tẹ̌tungkětị u naung i sire, hakịu tau Lewi e měngkatewe něnuhudu rokạ e ene niapasěbang baugʼi sire. Bọu ene i sire nẹ̌tingkaị tau wawine ene e tawẹ ědone sarang sěngkamal᷊ukade.

²⁶Nạung deng kalonge tau wawine ěndaị e nẹ̌sul᷊e, kai su těngọen tukadu wal᷊eng tau maghurang ene, tampạu tau esẹ e nẹ̌tikị, i sie napinsang. Kụ sarangke matangěllo siměbang i sie wědang ene sene.

²⁷Mal᷊ukadẹ̌ ene, piạ e tau esẹ e nẹ̌pětị kụ manope tukadẹ̌ kụ nẹ̌buạ e rimal᷊eng, i sie nakaěbạ e rokạ e mạl᷊aoha su těngom bal᷊e ene, kụ limane mạngumbelẹ tukadẹ̌.

²⁸”Pẹ̌bangungke,” angkuěnge si sie, ”bọete, rumal᷊engke i kitẹ.” Arawe tau wawine ene e tawe simimbang ual᷊ingu seng nate. Mase, i sie namětị tau wawine ene kụ nipěllọe su wowong kalide, bọu e nẹ̌buạ napul᷊ẹ sol᷊ong bal᷊ene.

²⁹ Nahumpạ u wal᷊e, i sie simuẹ̌ kụ něngal᷊ạ pisọ kụ němotọ maietʼu rokạ e ene mapul᷊o dua su potọ e. Bọu ene i sie něndingọ kempang u ghẹ̌sine ene su pal᷊ahiteng Israel si sire e mapul᷊o dua sěngkatau-sěngkatau pẹ̌sěmpotọ.

³⁰Kěbị taumata apang nakasilo e nẹ̌bera, ”Tawẹ běke reng bọu mạdiadi kakakoạ kerene, ren dokeng tau Israel siměbang bọu Misirẹ̌ e sarang orasẹ̌ ini. I kitẹ tawe wotonge kạtatanạ marěmasẹ̌. I kitẹ harusẹ̌ mẹ̌dal᷊ahintau kụ mẹ̌karadiahang!”