Read Sangir MANGA MĚLAHUKUNG 2 Bible Online

MANGA MĚLAHUKUNG 2 - Sangir bible

MANGA MĚLAHUKUNG 2

¹Malạekatʼu MAWU e rimal᷊eng bọu Gilgal sol᷊ong Bokhim dingangu nẹ̌bera su tau Israelẹ̌ u, ”Iạ e sen naněbang i kamene wọu Misirẹ̌ e, ringangu nẹ̌bawa si kamene sol᷊om banua Takụ nikědo su manga i upung i kamene. Selain Takụ pinẹ̌bera u, ’Laikị pẹ̌kakědo sutal᷊oarang Iạ dingang i kamene e tawe Takụ iwěsụ.

² Ual᷊ingu ene i kamene tawe wotonge mẹ̌koạ sěmbaụ laikị dingangu měmamanuane sini e. Kal᷊awọu pananěmbaěng i sire e harusẹ̌ goghahʼi kamene.’ Kaiso i kamene tawe mẹ̌kakoạ apan sen Takụ nioro ene. Tabeạu katewe i kamene seng nẹ̌koạewe apang hinong tawe pakikoạ.

³Tangú ini e raringihẹ̌ko! Iạ e tawe sarung měnokol᷊ẹ̌ tumanạu wanua ini e kereu i kamene kawe mẹ̌sasekehẹ̌ dingang i sire. I sire sarung makoạ manga sědụ u, kụ i kamene sarung ikasaung hakịu i kamene mal᷊aing měmpaněmba ringang sěngkapěněmba manga ruatan sire.”

⁴Ene malạekatẹ̌ e nasuẹem bohange habarẹ̌ ene e, kal᷊awọu tau Israelẹ̌ e němpẹ̌sangị mal᷊aihạ-ihạ.

⁵Ual᷊ingu ene hakịu tampạ ene isẹ̌sẹ̌bạ Bokhim.[5] Bọu ene su tampạ ene tau Israelẹ̌ e němpẹ̌gěllịu sasěmba su MAWU.

⁶Ene i Yosua e wouten napakawalan tau Israelẹ̌ e, i sire mal᷊aing němpẹ̌buạ mědeạu měmpẹ̌tanạ su ěntana kụ nakoạ bahageang i sire sěmbaụ-sěmbaụ.

⁷Karangụeweng i Yosua e wiahẹ̌, tau Israelẹ̌ e měmẹ̌munara waugu MAWU e. Maningbe lai i Yosua e seng nate kaiso i sire mang těbe měmẹ̌munara waugu MAWU karěngụeweng i sire lẹ̌ahakeng u taumata kụ seng nakasilo hala kal᷊awọu karal᷊inaụ kinoạu MAWU waugu tau Israel.

⁸I Yosua anạ i Nun — ěllangu MAWU ene — naněntang u dunia umbure mahasụ mapul᷊o su taunge.

⁹ I sie nilěbing su ěntana tataghuanenge hala, kụ kai su Timnat-Serah su wawul᷊urang u Efraim su sěmběkan sawěnahẹ̌ bọu Wul᷊udu Gaas.

¹⁰Bọu ene kal᷊awọeweng sěngkakahengkẹ ene e němpaněntangu dunia e lai. Kụ i sire sěngkakahengkẹ tuhụ e tangu wěgaweng MAWU, ual᷊ingu i sire tawe nakạhombang apan seng kinoạ u MAWU e waugu tau Israel.

¹¹Bọu ene tau Israelẹ̌ e nẹ̌sal᷊a su těngom MAWU. I sire sen tawe saụ naněmba MAWU, Ruatang manga i upung i sire e, ute kai Ruata kụ seng nẹ̌bawa si sire niapasěbang bọu Misirẹ̌. I sire nanětạ e naněmba Baal dingangu Asytoret ore lai manga ruata wal᷊ine kụ sẹ̌subaěng u apam bansa mạngělikụ si sire e. Tangú MAWU e limangehẹ̌ si sire, kụ napakawalang sekẹ e němpěngalo ringangu něhampasẹ̌ si sire. I sire tawe nakapẹ̌kụbibau timatěngo apan sekẹ nangělikụ si sire e.

¹⁵Balạewe tamai mẹ̌sekẹ e, MAWU e rumokạ si sire, kerẹewe seng nipaul᷊ịʼE si sire. Tangú i sire nihombangken sigěsạ masaria tạ sihinge.

¹⁶Měngkate seng masau susul᷊ene MAWU e měgẹ̌gěllịu pangahạ si sire waụgu pẹ̌tẹ̌tawakal᷊i sěngapam botonge pělẹ̌liwirʼi sire wọu wuntuangu sekẹ u mělahampasẹ̌ e.

¹⁷Kaiso i sire tawe měndarekeng u pangahạ i sire e. I sire měmpaněmba manga mahang duata, kụ tawẹ satiane su MAWU. I sire tawe tumatuhụ sansahu manga i upung i sire kụ matuhụ su kal᷊awọu titam MAWU.

¹⁸Kereu MAWU e mẹ̌gěllị u sěngkatau pangahạ u tau Israel, tangú MAWU e sěntiniạ mẹ̌tẹ̌tul᷊ung u pangahạ e ene. Kụ karěngụeweng pangahạ e ene wědang biahẹ̌, MAWU e sěntiniạ měměllọ i sire, kamagengu i Sie makaringihẹ̌ u i sire kawe mẹ̌kẹ̌kiaratagu tẹ̌tingkaitang dingangu sẹ̌sẹ̌dakeng.

¹⁹Kaiso kamagengu pangahạ ene seng naněntangu dunia e, tangu bansa ene něngalembong karal᷊akise tabiatʼi sire wọu ghal᷊ipohong sěngkahengkẹ nạung nakal᷊imona e. I sire kai měmpamunara waugu manga ruata wal᷊ine dingangu naněmba manga ruata ene. I sire měmpạnětul᷊ẹ̌ tundun sire ral᷊akisẹ̌ e kụ madiri měmal᷊ui lulun sire.

²⁰Ual᷊ingu ene tangú MAWU e limangehẹ̌ marasai su manga umatʼu Israel, ringangu něhengetang, ”Iạ e seng něngoro manga i upungu wansa ini e tadeạu měngumpaedẹ̌ pẹ̌kakakědo-Ku e ringang i sire. Kaiso wansa ini e naměsụ u laikị pẹ̌kakakědo ene; kụ i sire kai limampa parenta-Ku.

²¹Orasẹ̌ ini e Iạ selain tawe mapulu manokol᷊ẹ̌ baewe lai wansa sude kụ bědang ene su wanua ini e piạ i Yosua e naněntang u dunia.

²²Iạ e sarung mẹ̌pakẹ u manga wansa ene waugu ipamanikạ tau Israel, tadeạu Iạ masingkạ u měnsang tau Israel mapulu tumuhụ kal᷊awọu parenta-Ku e kerẹewe lai manga i upung i sire arau tala.”

²³Ual᷊ingu ene MAWU tawe nẹ̌gěllị u watạ si Yosua e su manga wansa ene e. Su sěmběkane tangú MAWU e kawe napakawalan sire su wanua ene, kụ tawe lighạ něnokol᷊ʼi sire.