Read Sangir MANGA MĚLAHUKUNG 21 Bible Online

MANGA MĚLAHUKUNG 21 - Sangir bible

MANGA MĚLAHUKUNG 21

¹Su tempon tau Israel nẹ̌tampung su Mizpa, i sire seng nẹ̌diandi su MAWU u tawẹu sarang sěngkatau wọu i sire kụ napakawalang anạ e mahuala e nakoạ kawingu hěntom Benyamin.

²Orasẹ̌ ini e i sire nakoạ sol᷊ong Betel dingangu naiang kụ lụl᷊ahunsusa sarang nahěbi su těngom Mawu. I sire nahungkiạ kạkuine,

³”O MAWU, Ruatang Israel, unụe kěbị ini e hinong mariadi? Hěntom Benyamin, kai sěmbaụ bọu ghal᷊ipohong kawanuang kami e, seng masarạ mailang!”

⁴Sěngkarịěllone, deng mal᷊uka-l᷊ukadẹ̌ e tau Israel němětị pananěmbaěng sěmbaụ sene, kụ něnarakang u sasěmba tinongkạ su MAWU e ringangu sasěmbang pẹ̌darame.

⁵Bọu ene i sire něnanẹ̌sui wọu tal᷊oarang manga hěntong Israel měnsang piạu tawe natamai nẹ̌tampung nẹ̌těngom MAWU e su Mizpa kal᷊imona. (Su tempo ene i sire seng nẹ̌salu u taumata kụ tawe nitụ kakui sol᷊ong Mizpa e harusẹ̌ ihukung pakapate.)

⁶Tau Israelẹ̌ e timal᷊ěntụ su manga anạ u sěmbaụ i sire hěntom Benyamin; i sire nẹ̌bera, ”Ěllo ini e Israel kinailangengu sěmbaụ bọu tal᷊oarang manga hěntone.

⁷I kitẹ e mẹ̌koạ e apa tadeạu hěntom Benyamin kụ nal᷊ěmbe ini e wotonge makareạ kawing i sire, u i kitẹ e kai seng nẹ̌salu sutěngom MAWU u i kitẹ tawe mapakawalang manga anạ i kitẹ bawine e makoạ kawingu hěntom Benyamin?”

⁸Tangú i sire něnanẹ̌sui měnsang piạ manga ghal᷊ipoho sěmbaụ bọu hěnton tau Israel kụ tawe němpẹ̌tampung su Mizpa. Kụ i sire nakahombang u wọu tal᷊oarang tau Yabesh su Gilead, tawẹu sarang sěngkatau kụ natamai sol᷊ong Mizpa.

⁹Ual᷊ingu, su tempong piněmarikẹ̌saěng dol᷊ẹ̌ u areng, sěngkakakěllane mang tawe kinaěbakeng sene sarang sěngkatau wọu i Yabesh.

¹⁰Ual᷊ingu ene, taumata kụ natampung su Betel e něndolohu 12.000 su kataune kawawahaniange wọu tal᷊oarang sire apěmate apan taumata su Yabesh, nasowa lai manga wawine ringangu manga rariọ.

¹¹I sire nioro apạmate kěbị manga esẹ, dingangu l᷊ai apang manga wawine kụ sem bal᷊inewe lai parawang.

¹²Tangú sutal᷊oaran taumata kụ mạtanạ su Yabesh ene e, i sire nakaěbạ 400 su kataune manga mahuala kụ bědang parawang. I sire němpěmaringang manga mal᷊ahuala ene e sol᷊ong pẹ̌darasengang su Silo kaẹ̌bakeng su soang Kanaan.

¹³Bọu ene kal᷊awọu tau Israel naparal᷊ingu rarolohang su taumatang Benyamin ene su manga wul᷊udu watu su Rimon baugu mapal᷊ětong pẹ̌darame.

¹⁴Ual᷊ingu ene apan taumatam Benyamin ene němpẹ̌sul᷊e, bọu e tau Israel nẹ̌gěllịu manga wawine wọu Yabesh apan tawe nipate ene. Kaiso kal᷊awọu manga wawine ene tawe nakaiěkụ kal᷊awọu hěntom Benyamin ene.

¹⁵Tau Israel kiměndagu hěntom Benyamin, u MAWU e seng namotọ kasasěmbaụ u manga hěnton Israel.

¹⁶Ual᷊ingu ene manga matatěbone kụ apan nẹ̌tampung su Betel e nẹ̌bera, ”Su ral᷊ungu hěntom Benyamin sen tawẹ apa lai manga wawine. Kaiso mẹ̌koạbe kereapa; i kitẹ tawe wotonge mapakawalang manga anạ i kitẹ mahuala e pěkawing dingang i sire, batụu i kitẹ e seng napẹ̌salung apan taumata wọu tal᷊oarang kitẹ e kụ mapakawalang anạ e wawine mẹ̌kawing u sěngkatau wọu hěntom Benyamin! Kụ kai apạ e harusẹ̌ koateng i kitẹ e waugʼi sire apang nal᷊ěmbe ini e tadeạu i sire wotonge piạ kawingʼi sire lai? Kumbahangbe sarang Israel kailangengu sěmbaụ bọu tal᷊oarang hěntone mapul᷊o dua e. I kitẹ e harusẹ̌be mědeạ dal᷊engu tadeạu hěntom Benyamin e wotonge piạ hitene mẹ̌bẹ̌bawěllasẹ̌ kụ kạtatanạbe mạnaghuang kasěllahu ěntanane.”

¹⁹”Kere ini,” angkuěng i sire, ”piạ sěmbaụ akal᷊e mapia, ute su tempong pěmamantugu taung baugu MAWU e su Silo.” (Su sěmběkang timuhẹ̌ bọu Silo ini e, kai piạ soam Betel, kụ su sěmběkam bahẹ tangú ral᷊eng gẹ̌guwạ bọu Betel sol᷊ong Sikem, arawe su sěmběkan sawěnahẹ̌ kaěbakeng soan Lebona.)

²⁰Tangú kal᷊awọeweng těmbonang u pẹ̌sasombang su Betel ene němpẹ̌bera su apang hěntom Benyamin kụ nal᷊ěmbe ene, ”Dakọ e i kamene pěmpẹ̌kěmbuni su manga rahaming anggorẹ̌ e su Silo e,

²¹ringangu pakaral᷊ukadẹ̌ sene. Hědọeng kamagengu manga mahualang Silo e měmpahunsěbang kụ měmpẹ̌sal᷊ai karěngụeweng pěmamantugʼu taung baugu MAWU, i kamene harusẹ̌be sěbang bọu manga rahaming anggorẹ̌ ene. Bọu e sěngkatau-sěngkatau e pasị samẹ e mahuala ene pẹ̌sěngkatau wọu tal᷊oaran sire kụ tal᷊ang i kamene sol᷊ong banuam Benyamin kụ koạ kawingu.

²²Kereu i amange arau mahuanene ruměnta kụ měnuntụ si sie ute i kamene[21] wotonge mẹ̌bera u, ’I kami e mẹ̌dorong tul᷊ung, walạekere i sire ringang i kami. I kami e tawe měmul᷊aho si sire su ral᷊ungu pẹ̌sasekẹ. Kụ ual᷊ingu i kamene tawe něngonggọ i sire si kami, ute i kamene tawe limampa kědo kụ tawẹ apawe sal᷊ane.’ ”

²³Tangú hěntom Benyamin ene e němpẹ̌koạbe apang niwera si sire. Kụ i sire sěngkatau-sěngkatau němpěnalang u mahuala pẹ̌sěngkatau wọu tal᷊oarang manga mahuala apan němpẹ̌sal᷊ai su Silo. Bọu ene i sire nẹ̌sul᷊e sol᷊ong banuan sire hala kụ němangung kapia kal᷊awọu soane kụ nẹ̌tanạ sene.

²⁴Taumatang Israel bal᷊ine ene e mal᷊aing němpẹ̌buạ. I sire nẹ̌sul᷊e su ěntana tataghuaneng i sire su ral᷊ungu wanuan sire sěngkatau-sěngkatau e, timuhụewe ghal᷊ipohone ringangu apang hěntone.

²⁵ Su tempo ene wědang tawẹ apa ratu su Israel. Sěngkatau-sěngkatau e mẹ̌kẹ̌koạbe apang su tingirang i sire e nihino.