Read Sangir MANGA MĚLAHUKUNG 3 Bible Online

MANGA MĚLAHUKUNG 3 - Sangir bible

MANGA MĚLAHUKUNG 3

¹Baugu ipamanikạ taumatang Israel kụ tawe nilẹ̌hombangengu pẹ̌sasěsẹ su Kanaan, MAWU e napakawalam bansa pira-pira e niapẹ̌tanạ su wanua ene.

²MAWU e mẹ̌kẹ̌koạ ene e kětạeng piạ timonane maněntiro su apạeweng hěntong Israelẹ̌ e pẹ̌sẹ̌sekẹ, něngalembo kate i sire apam bědang tawe timẹ̌tol᷊e nẹ̌sekẹ.

³Apam bansa kụ bědang měmpẹ̌tẹ̌timona su wanua ene ute kai: apạeweng mạtanạ su soan Pilistin kal᷊awọe lima tangu, kěbị e kai tau Kanaan, tau Sidon, dingangu tau Hewi kụ mạtanạ su wawul᷊urang u Libanon, manětạ bọu Wul᷊udʼu Baal-Hermon sarang dal᷊eng mẹ̌tẹ̌timona Hamat.

⁴I sire ene paị sene mědeạu makoạ batu wawanikạ su tau Israel. Ual᷊ingu kawe kerene tangu kinasingkatengke měnsang tau Israelẹ̌ e tụtuhụbe kal᷊awọu tita nionggọ u MAWU su manga i upung i sire wọʼi Musa.

⁵Kai ual᷊ingu ene hakịu tau Kanaan, Het, Amori, Feris, Hewi ringangu Yebus tatapẹ̌ mạtanạ su wanua ene ringangu tau Israel.

⁶Kawanuang Israelẹ̌ e němpẹ̌kawing nẹ̌towagu kal᷊awọu wansa tamai ene e, ringangu němpaněmba l᷊ai manga mahang duatan sire.

⁷Kawanuang Israel nẹ̌dosa su MAWU Ruatan sire. I sire niwul᷊e si Sie hakịu i sire němpẹ̌kal᷊iomaneng nẹ̌tahamawu Baal dingangu Asyera.

⁸Tangú MAWU e limangehẹ̌ su kawanuang Israel, kụ napakawalan sire kinawatạ u Ratu i Kusyan-Risyataim bọu Mesopotamia. Ual᷊u taung karěngụe datu ene nẹ̌kawasa si sire.

⁹Bọu e kawanuang Israel němpẹ̌tahimokoi makitul᷊ung su MAWU, bọu e MAWU něngonggọ i Otniel apělẹ̌liwirʼi sire. (I Otniel ute kai anạ i Kenas tuaring Kaleb.)

¹⁰Rohkẹ̌ u MAWU e nẹ̌kawasa si Otniel hakịu i sie nakoạ pangahạ u kawanuang Israel. I sie nẹ̌sekẹ, mase MAWU e něngonggọ u kal᷊auntu si sie su ratum Mesopotamia.

¹¹Tangú nal᷊enehe wanua ene e 40 su taunge karěngụ e. Mase wọu ene i Otniel naminsul᷊e singongone.

¹²Kawanuang Israel nẹ̌dosa l᷊ai su MAWU, hakịu MAWU e napakariading Eglon, datung Moab, nakoạ limembong katoghase wọu Israel.

¹³Datu i Eglon nẹ̌těngkal᷊aụ dingangu tau Amon ore lai Amalek, bọu e němatạ tau Israel, mase namul᷊aho Yerikho, soang korma ene.

¹⁴Mapul᷊o ual᷊u su taunge karěngụ e tau Israel ipẹ̌tẹ̌tahuěllang i Eglon.

¹⁵Kutẹu piạ e tau Israel němpẹ̌tahimokoi makịtul᷊ung su MAWU, i Sie něngonggọ i Ehud piněliwirẹ̌ si sire. I Ehud kai sěngkatau mělẹ̌hal᷊ẹ̌ u limane kaihi; i sie kai anạ i Gera wọu hěntom Benyamin, kụ kai seng i sie e tiasa měnanonda gaghěllị su Ratu i Eglon kụ harusẹ̌ pakịbaehe su tau Israel.

¹⁶Piạ sěhěllo i Ehud něněsal᷊ẹ̌ pedane sěmbaụ horone su ruam běka kụ nandune maraning limam pul᷊o su sentine. I sie něngehẹ u peda ene su wadange su sěndihange koaneng su al᷊ungu pakeange,

¹⁷bọu ene tamai něnarakangu ghaghěllị u tau Israel su Ratu i Eglon. Datu ene tumanịu matawa.

¹⁸Bọuten něnarakang u ghaghěllị ene, i Ehud něngoro taumata niapěmasaěng doitẹ̌ bul᷊aeng ene pinakapul᷊ẹ.

¹⁹Kaiso i Ehud hala e něngirul᷊e sarang nahumpạ u manga watu nipakang su rěduhu Gilgal, bọu e nẹ̌sul᷊e kapia su anung Datu i Eglon. Su tempo ene i Eglon ene su kamare maral᷊ěnding su haweng e rasị su ral᷊ungu istanane. Angkuěng i Ehud su Ratu Eglon, ”Mawu Kụ Lẹ̌adateng! Ěllangu e mělẹ̌habaru hal᷊ẹ̌ u pẹ̌kakal᷊irung baugʼi Tuangku.” Tangú ratu e něhengetang, ”Pěngampal᷊ẹ̌ko l᷊ai wědang,” mase i sie rimolohu manga ěllange apạsěbang kụ pạněntang i sie rěduang Ehud hala e. Bọu ene i Ehud himaungke su ratu piạ i sie mạiang, kụ nẹ̌bera, ”Piạ habarẹ̌ bọu Mawu Ruata waugʼi Tuangku!” Nakaringihẹ̌ ene e, datu e rimarisị.

²¹Apidu i Ehud něnawụ pedane ringangu limane kaihi wọu sěndihange koaneng, bọu e nipilị e pinakaral᷊ung su tiangu ratu ene. Patikụ horom peda ene sarang pul᷊une nasuẹ̌ su ral᷊ungu manga tawang tiangu ratu ene, timěpasẹ̌ sarang sěmběka. I Ehud němalam peda ene sene,

²³bọu e siměbang kụ něnukung dingangu němal᷊e tukadʼu kamarẹ̌ ene,

²⁴kụ bọu ene naghěngging. Ene narěntạ e manga ěllangu ratu e kụ nakaěbạ e kal᷊awọu tukadu kamarẹ̌ kawe mạpapal᷊e, su kiral᷊ingʼi sire tangú ratu e kai ene su ral᷊unge kụ kai manga sụsea.

²⁵Sarangke mạngampal᷊ẹ̌ piạ kararěnane dingangu ratu e mal᷊aing tawe něnope tukadẹ̌, i sire e měngkai apa nẹ̌tal᷊abingọ kụ bọu e něngal᷊ạ kakunsị dingangu něnope tukadẹ̌ ene. Kutẹu nạung datun sire e nawatang kụ nate su wowon lante.

²⁶Těntal᷊ang i sire rem bědang měngẹ̌ngampal᷊ẹ̌, i Ehud sem bọu timal᷊ang u watangenge sol᷊ong Seira limiu manga watu nipakang.

²⁷Ta nararěnnạ sarangke nahumpạeng bawul᷊urangʼu Efraim, i sie něniụeng napiri ipẹ̌kui tau Israel mẹ̌sekẹ. I sire nahunděnta kụ bọu ene i sie něngahạ i sire riměsung bọu wawul᷊urange ene.

²⁸”Tol᷊eko siạ,” angkuěnge si sire, ”MAWU seng němatạ tau Moab, sědụ u e waugʼi kamene.” Tangú su l᷊imang pěngangahạ i Ehud, němpẹ̌děsungke tau Israelẹ̌ e wọu wawul᷊urange. I sire němpěmul᷊aho tampạ lẹ̌liuangu tau Moab su Sal᷊ụ u Yordan. Tawẹu sarang sěngkatau wọu manga sědụ ene e nionggotang loahe niapal᷊awesẹ̌ kụ maambang.

²⁹Su ral᷊ungu pẹ̌sasekẹ ene e i sire němpěmate manga sordadong Moab kapapiaěnge mangawe mapul᷊o hiwu su kataune; kụ tawẹ u nakal᷊awesẹ̌.

³⁰Ěllo ene Moab kinawatạ u Israel, tangú narěmase wanua ene e ghěnnangu ual᷊um pul᷊o su taunge karěngụ e.

³¹Těmbonang e tuhụ e ute i Samgar anạ i Anat. I sie mal᷊aing nẹ̌karadiahang sěngapam botonge něliwirʼu tau Israel. Dingangu těkingu laahạ sapi, i sie němate tau Pilistin ěnnungu hasụ su kataune.