Read Sangir MANGA MĚLAHUKUNG 4 Bible Online

MANGA MĚLAHUKUNG 4 - Sangir bible

MANGA MĚLAHUKUNG 4

¹Ene sarangke i Ehud nate e, tangú tau Israel saụewe nẹ̌dosa su MAWU.

²Tangú MAWU e napakawalan sire pinakiwatạ si Yabin datun tau Kanaan kụ maintol᷊ang su soan Hazor. Dokol᷊u mẹ̌sasekẹ i sire e kai i Sisera kụ mạtanạ su Haroset-Hagoyim.

³I Yabin mạnaghuang karetan sekẹ nikoạ bọu uase kụ sio hasụ su waụ e. Duam pul᷊o su taunge karěngụ e i sie nẹ̌tahuěllangu tau Israel piạ mahasane. Bọu e i sire ghimahiorọ makịtul᷊ung su MAWU.

⁴Su tempo ene mạngahạ tau Israel ute kai sěngkatau nabi wawine arenge i Debora, kawing i Lapidot.

⁵I Debora tundune ute kai mạiang su al᷊ungu kalung korma, su wěllạ u Rama ringangu Betel, su wawul᷊urangu Efraim. Kụ sene tau Israel dụděnta mẹ̌deạu makisasa si sie.

⁶Piạ su sahěllo i sie rimolohu taumata pinẹ̌kui si Barak, anạ i Abinoam, bọu soang Kedes su wanuang Naftali. Bọu e i sie nẹ̌bera si Barak, ”Ini e kai titam MAWU Ruatang Israelẹ̌ e si kamene: ’Komol᷊ẹ̌ko manga esẹ mapul᷊o hiwu su kataune wọu hěnton Naftali ringangu i Zebulon, mase wawako i sire sol᷊ong Bul᷊udʼu Tabor.

⁷Hědo Iạ maparěntang Sisera dokol᷊u sekẹ i Yabin sol᷊ong anung kamene su Sal᷊ụ u Kison dingangu kal᷊awọu manga sordadone ringangu manga karetan sekẹ e waugu ipanekẹ si kamene. Arawe Iạ e sarung mangonggọu watạ si kamene su ral᷊ungu pẹ̌seketang ene.’ ”

⁸I Barak nẹ̌bera si Debora, ”Mạeng u i kau e tumol᷊e, ute iạ mapulu tamai. Arawe kamageng u tala wue ute iạ mal᷊aing tawe mapulu tamai.”

⁹I Debora simimbang u, ”Kerenẹ e, iạ tumol᷊e! Kaiso pẹ̌tahěndung, bal᷊inewe i kau sarung makahombang daralo. Wọu anung sěngkatau wawine e MAWU e sarung mamatạ si Sisera.” Tangú nẹ̌buạ e i Debora e ringang i Barak sol᷊ong Kedes.

¹⁰Kụ i Barak napẹ̌běngkal᷊u manga hiten Zebulon dẹ̌duan Naftali e sol᷊ong Kedes. Apang němpẹ̌tol᷊e si Barak dẹ̌duang Debora e su tempo ene e 10.000 su kataune kal᷊awọe.

¹¹Su tempo ene i Heber, tau Keni ene, seng nẹ̌těngkahaeng batangenge wọu bansane. (Tau Keni e kai hěntong Hobab, ipagi Musa.) I Heber sen dimal᷊eng něnakẹ manga tentane marěduhu manga kakaluang u těrbantin su Zaanaim, tạ kararaune wọu Kedes.

¹²Tawe nararěnnạ sarangke i Sisera nakaringihẹ̌ u i Barak seng tamai sol᷊ong Bul᷊udʼu Tabor,

¹³i sie něnampung u karetan sekẹ kasio hasụe bọu uase ene, sěngkatampung dingangu kạguwạu wuntuang e, mase nẹ̌bawa si sire wọu Haroset-Hagoyim sol᷊ong Sal᷊ụ u Kison.

¹⁴Bọu e angkuěng i Debora si Barak, ”Ho, tamaị e! MAWU e sarung měngahạ si kau. Ěllo ini i Sie měngonggọ u pěmamatạ u si Sisera.” Tangú limintụ e i Barak bọu Wul᷊udu Tabor sěngkal᷊intụ dingangu taumatane i sire mapul᷊o hiwu su kataune,

¹⁵bọu e něngalo si Sisera. Kụ MAWU e něnal᷊iawuhẹ̌ kasěllahu wuntuang i Sisera ringangu manga karetan sekẹ e hakịu i Sisera e limintụ bọu karetane, mase timal᷊ang u watangenge kụ liměngang.

¹⁶I Barak měnẹ̌nahusu manga karetan sekẹ ene e sarang nakahumpạ u Haroset-Hagoyim bọu e kasěllahu wuntuang i Sisera ene nịpapatene tawẹ sarang sěngkatau kụ nipakawala wiahẹ̌.

¹⁷Těntal᷊ang ene i Sisera e sen timal᷊ang su tentan Yael, kawingʼi Heberẹ̌, tau Keni ene. Batụu Datu i Yabin bọu Hazor nẹ̌dal᷊ahapị u walagu anạ u sěngkataung Heberẹ̌ ene.

¹⁸Ene narěntạ e i Sisera, i Yael naněnsomahẹ̌ si sie kụ nẹ̌bera, ”Damahi e Tuang, suẹ̌ e su ral᷊ungu tentaku e; tawahal᷊uasʼu matakụ.” Tangú i Sisera e simuẹ̌ sol᷊ong dal᷊ungu tenta ene mase kahian Yael nitakateng u hekạ u hordeng tadeạu i sie mawuni.

¹⁹Angkuěng i Sisera si Yael, ”Tul᷊ungko ghělire iạ akẹ kạdodọ mědeạu pěnginungang; iạ e kai narou.” Tangú i Yaelẹ̌ e něngukahe kawihe nikoạ bọu pisị pěndaresokangu susu, bọu e nipakiinunge si Sisera, mase nitakạ e kapia ringangu hekạ u gorden.

²⁰Bọu e i Sisera nẹ̌bera si Yael, ”Dakọ e rarisị su těngon tukadu tenta e. Kereu taumata marěnta ringangu makiwal᷊o si kamene měnsang piạ taumata sini, ute měngkate paul᷊ị u tala.”

²¹I Sisera enẹ e kal᷊omene, hakịu i sie kinahuntikilang kụ mal᷊ěnabẹ̌. I Yael něngal᷊ạ e martelu sěmbua e ringangu pasạ sěmpědi waugu tenta, mase marěmma-rěmmasẹ̌ diměduhẹ̌ si Sisera. Bọu ene i sie něněteleng pasạ ene e sol᷊ong dal᷊ungu sěndihangu rěhụ e hakịu timẹ̌pasu ěntana. Kerene kakakoạ e i Yael němate si Sisera.

²²Su tempong i Barak diměnta nẹ̌deạ si Sisera e, i Yael naněnsomahẹ̌ si Barak kụ nẹ̌bera si sie, ”Bọete iạ hědo měněbọ u tau rẹ̌deakeng i kamene ene.” I Barak simuẹ̌ sěngkasuẹ̌ dingang i Yael, mase nakasilo si Sisera seng nate, nawal᷊andang su ěntana kụ piạ pasạ u tenta kạtatěbị su sěndihangu rěhụ e.

²³Sahěllo ene Mawu e něngonggọu watạ su tau Israel nẹ̌těngon Yabin datun tau Kanaan.

²⁴Datu ene kakạděngụ e mangkeng sẹ̌sẹ̌dakeng u tau Israel sarangkewe pangěnsueěnge i sie nawihua.