Read Sangir MANGA MĚLAHUKUNG 5 Bible Online

MANGA MĚLAHUKUNG 5 - Sangir bible

MANGA MĚLAHUKUNG 5

¹Su ěllo ene nẹ̌kantarị e i Debora rẹ̌duam Barak anạ i Abinoam. Kere ini wawerane,

²Pẹ̌daloko MAWU, baugu manga mol᷊ensekẹ u Israel kụ seng piạ karakine su mẹ̌tawakal᷊i, mase kawanua e mal᷊aing napulu nẹ̌sekẹ.

³Pẹ̌daringihẹ̌ko ei mararatu ringangu těmbonangu pẹ̌seketang e, iạ e mẹ̌katantarị baugu Ruatang Israel kụ kai MAWU e.

⁴Ene piạ i Kau e nẹ̌buạ bọu Seir, o MAWU!, kutẹu wanuang Edom nitěntangʼU banua e ghimanuẹ̌, kal᷊awọu sal᷊ěsugu l᷊angị e nasue rimal᷊eng, dingangu kal᷊awọu winawa e němpa měmbing u akene.

⁵ Kal᷊awọu wul᷊ude ghimanuẹ̌ su těngong měngangawasang Sinai, su těngom MAWU Ruatang Israel.

⁶Su tempong i Samgar, anạ i Anat, dingangu l᷊ai su tempong Yael, tawẹ apa kapila su wanua, ringangu tawẹ apa rumaral᷊ěngang sural᷊eng gẹ̌guwạ.

⁷Kal᷊awọu soang Israel tawẹ apa měmamanuane, marěmasẹ̌ sarang i kau narěnta, Debora; i kau e narěnta tabidạeng i ninang lẹ̌adateng.

⁸Piạ e nạung tau Israelẹ̌ nanětạ naněmba mahang duata, tangú nẹ̌sekẹ e su wanuan sire; sutal᷊oarang ěpạ u pul᷊o suhiwune mol᷊ensekẹ u wanua e, tawẹ u sarang sěngkatau kụ nakapanědeng aghidẹ̌.

⁹Baugu manga panglimang tau Israelẹ̌ kụ mapulu makihengkẹ, tangú iạ makitarimakasẹ sěngapang kasěllahe. Kụ karaloko MAWU e!

¹⁰Ei kamene kụ mahunsake kalide mawira e, i kamene mạiang su wowom bawilạ e pěrmadani, kụ i kamene kěbị apang dụdal᷊eng u laedẹ̌ e, pěmpěhabarẹ̌kong běkeng pěmamatạ ini e!

¹¹Su rěduhu manga pahighi e ikẹ̌karingihẹ̌ taumata maral᷊uasẹ̌ měmpẹ̌kẹ̌kantarị, měmpẹ̌bẹ̌běkeng pěmamatạ u MAWU e masau su sul᷊ene, pěmamatạ u Israel, umatʼu MAWU. Tangú němpẹ̌tentẹ e i sire mẹ̌tẹ̌timona sol᷊ong pasěllangeng u soa.

¹²Nẹ̌pětị e i Debora, kụ něngangkạeng kantarị. Pẹ̌bangungke i Barak, kụ ahạko taumatang tahungkụ!

¹³Mawawahani apang nal᷊ěmbe tangú riměntạ e su anung pangahạ e, i sire němpẹ̌děnta, kụ selaing sadia mědeạu mẹ̌tawakal᷊ing munara waugʼi Sie.

¹⁴I sire němpẹ̌dal᷊eng bọu Efraim sol᷊ong bědạ e, timol᷊e wuntuang i Benyamin mẹ̌tẹ̌tente su těngon sire. Ene wọu Makhir narěntạ e apang panglima, mase wọu anun Zebulon tangú němpẹ̌pětị e apang pěrwira.

¹⁵Tangú apạeweng těmbonang i Isakarẹ̌ e riměnta sěngkakarěnta ringangʼi Debora, ore i Isakar narěntạ e, kụ i Barak mal᷊ain timol᷊e, kụ i sire němpẹ̌tol᷊e si sie riměsung sol᷊ong bědạ e. Arawe hěnton Ruben tawe nakakoạ tiněnnane watụ u sutal᷊oaran sire e kai tawẹ apa pẹ̌sasěnsunduang.

¹⁶Kawe unụ e i sire měmpẹ̌tẹ̌tanạ sutal᷊oarang manga domba? Unụ e waugu rumaringihẹ̌ měndal᷊ukade tangú harusẹ̌ kumui binatang lẹ̌hikinang e ngae? Těngadẹ̌ bue hěnton Ruben tawe kasahekang e, watụ u lawọ i sire tawẹ pẹ̌sasěnsunduang.

¹⁷Těntal᷊ang i Zebulon děduang Naftali mẹ̌tẹ̌tohạ sěngapam botonge su pẹ̌seketang, kụ hěnton Dan nẹ̌tondaisẹ̌ su kapal᷊ẹ̌, dingangu hěnton Gad něngindunụ natanạ su sěmběkan daki wọu Yordan, arawe hěnton Asyer měngkate matatapẹ̌ tạ konsange kụ tawe mapulu mangensọ bọu pẹ̌tatanakeng i sire kanandung duruhang.

¹⁹Su Taanakh, su wiwihu sal᷊ụ su Megido e, manga ratu e němpẹ̌sekẹ, mararatung Kanaan němpẹ̌karadiahang, kaiso sal᷊aka e tawẹ apa niwawan sire kere nipul᷊aho.

²⁰Manga wituing e mal᷊aing nẹ̌tawakal᷊i rimokạ si Sisera e, wọu tampạ pědẹ̌dal᷊indingang i sire e su winangaeng.

²¹Sal᷊ụ u Kison nělěba něngonodẹ̌ manga sědụ. Tol᷊ọ, tol᷊ọ e pakawahani, ei himukudẹ̌ku!

²²Měngkate mahawesẹ̌ manga tarěntung u laedʼu kawal᷊o bẹ̌bawaěng u mẹ̌bawawa kawal᷊o e.

²³”Kaị pisị si Meros, dingangu tumanạ e,” angkuěng u Malạekatʼu MAWU ”batụu i sire tawe riměntạ něngonggọu tatongka, kere mol᷊onsekẹ kụ mẹ̌kẹ̌karadiahang baugu munaram MAWU e.”

²⁴Warạuntu i Yael, kawing i Heber tau Keni; wọu patikụ tumanạu tenta e, u seng i sie e něngalembong lẹ̌al᷊amateng.

²⁵I Sisera e nẹ̌dorong akẹ, kutẹu i sie kawe něngonggọu susu si sie, nisadiane susu su ral᷊ungu mangko kere hinone waugu mararatu.

²⁶Piạ e pasạ dingangu rarupa su l᷊imane tangú i Yael něndupa si Sisera hakịu nararul᷊ẹ těmbọ e.

²⁷Su laedʼi Yael i sie naěnsạ tawẹ singongone, nělimbatang su ěntana naminsul᷊ẹ̌ singongone.

²⁸Bọu wěllạu tarapẹ̌ u janela e i ninang i Sisera e mạmanda, ringangu mẹ̌bẹ̌bera u, ”Kawe unụe karetane tawẹ běke mạděnta, kawe unụ e tawe ikararingihẹ̌ tarěntungu kawal᷊one?”

²⁹Kapelesaěng e wọu tal᷊oarang sanggele, něngonggọu sasimbahẹ̌ kụ seng nikaěbạ e hala su ral᷊ungu naunge:

³⁰”I sire kạpěpapahiạ e apal᷊iwụ pul᷊aho, waugu apang sordado, sěngkatau arau ruang katau parawang. Baugi Sisera hekạ u pakeang kal᷊ěgadenge waugu ratu wawine e, wawandang kai piạ sujị e mẹ̌kẹ̌kananginang awạ e.”

³¹Mal᷊owọko apan sědụ u MAWU, mairị kere i Sisera, arawe kal᷊awọu anạ u sěmbaụ e mahuweka mẹ̌sul᷊ungu matangěllo su winangaeng! Bọu ene, nal᷊enehe wanua ene ghěnnangu ěpạ u pul᷊o su taunge karěngụ e.