Read Sangir MANGA MĚLAHUKUNG 6 Bible Online

MANGA MĚLAHUKUNG 6 - Sangir bible

MANGA MĚLAHUKUNG 6

¹Sěnsul᷊eko l᷊ai kawanuang Israelẹ̌ e nẹ̌dosa su těngom MAWU, hakịu i sie napakawalan tau Midian nẹ̌kawasa si sire pitu taung karěngụ e.

²Tau Israel enẹ e maghěnggang su tau Midian hakịu i sire měmpẹ̌kẹ̌kěmbuni su ral᷊ungu manga liang dingangu su apan tampạ bal᷊ine kụ marěmasẹ̌ su wawul᷊urange.

³Saunengke lai apạeweng kasaun sul᷊ene měngangěntana e mahěnsinuang e tangú, riměntạ e tau Midian sěngkakarěnta ringangu tau Amalek ringangu l᷊ai taumata wal᷊ine e wọu wanua l᷊inggi kụ něngalo tau Israel.

⁴I sire němpẹ̌daseng su wanuang Israel kụ němpẹ̌gagholọ u kal᷊awọu sasuang paị sene sarang banua mạngělikụ Gasa sěmběkan timuhẹ̌. Kerene lai manga binatang lẹ̌hikinang kụ domba, sapi ringangu kalideng kawanuang Israel niparingang niapatal᷊ang. Tawẹ u l᷊ai sarang sěmbaụ kinatěntangeng i sire e, hakịeweng kawanuang Israelẹ̌ e seng tawẹ kaěng i sire marihutu.

⁵Taumata apang kụ němpẹ̌songo ringangu binatang, ore lai tentan sire riọ botonge kal᷊awọe. I sire ringangu manga ontane tumanịu mal᷊awọ pěndekenang. I sire němpẹ̌děnta e kai něnggagholọ banua ene,

⁶ringangu kawanuang Israelẹ̌, tawe makakoạ manga apa si sire.

⁷Bọu ene kawanuang Israel ghụgahiorọ u makitul᷊ung su MAWU mědeạu i sire makarokạ tau Midian.

⁸MAWU e rimolohu sěngkatau nabi sol᷊ong anun sire. Nabi ene nẹ̌bera u, ”Kai kere ini angkuěng u MAWU Ruatang Israel: ’I kamene seng niapakal᷊iwirẹ̌ bọu kakakoạ u tau Misirẹ̌ e.

⁹I kamene sen Takụ niapakasal᷊amatẹ̌ bọu tau Misirẹ̌ e ringangu wọu anun taumatang banua ini e mědeạu měnekẹ si kamene. I sire sen Takụ niuserẹ̌ bọu wanua ini piạ i kamene nạung něngalo si sire, mase Takụ nighěllirangu ěntanan sire si kamene.

¹⁰Sen Takụ niwera si kamene u kai Iạ e MAWU Ruatanu, dingangu i kamene tawe wotonge měmpěněmba manga mahan duatan tau Amori kụ banuane pẹ̌tẹ̌tanakeng i kamene orasẹ̌ ini e. Arawe i kamene tawe tumatuhụ kal᷊awọu parenta-Ku.’ ”

¹¹Piạ su sahěllo malạekatʼu MAWU e riměnta su soang Ofra, bọu e naiang su al᷊ungu kalun těrbantin, tataghuaneng i Yoas, sěngkatau wọu ghal᷊ipohom balagʼi Abiezer. Anạ e isẹ̌sẹ̌bạ si Gideon, kapẹ̌lẹ̌lohone gandung su pěmaměhaěng u anggorẹ̌ e. I sie mẹ̌kẹ̌koạ ene e mapěni-pěnisẹ̌ tadeạu tawe ikasilon tau Midian.

¹²Malạekatʼu MAWU e nẹ̌tẹ̌ngkatodẹ u watangenge si sie ringangu nẹ̌bera u, ”Ei kal᷊endesang mal᷊intoị! MAWU e rụděndingang si kau!”

¹³Sasimbangi Gideon, ”Ampunge wue tuang! Kereu těngadẹ̌ MAWU e mạněntanudẹ̌ si kami, unụe wue kěbị tamai ini e mihombang si kami? Kai suapa kal᷊awọu apam makạdal᷊inaụ kụ nạung kinoạ u MAWU su tempo nal᷊iu e ringangu niwěkeng manga i upung i kami e mạanụeng kereapa MAWU napasěbang i sire wọu Misirẹ̌ tangu? Orasẹ̌ ini MAWU e seng naněntang i kami ringangu napakawalang kami pinẹ̌kawasaěngu tau Midian.”

¹⁴Bọu ene MAWU e nẹ̌parenta si Gideon kere ini, ”Dingangu kasěllahu kuatu, tangu rakọko pěměllọu tau Israel bọu kawasan tau Midian. Kai Iạ e něndolohi kau.”

¹⁵I Gideon simimbang, ”Unụe iạ MAWU? Man tawe masowa akal᷊ẹ̌ kụ iạ e makaambang tau Israel bọu l᷊imang kawasan tau Midian. Su ral᷊ungu hiten Manasye, ute seng balagẹ̌ bọu iạ e kal᷊omeěng e. Dingangu su ral᷊ungu walagẹ̌ku e seng iạ ini e limembong tạ mangal᷊ene.”

¹⁶”Nal᷊ahẹ u i kau e wotonge!” angkuěngu MAWU, ”batụu kai Iạ e sarung montol᷊ẹ̌ si kau. I sire tau Midian sarungbe tawẹ karěngụ e ghagholokangu, mẹ̌sul᷊ungu i kau e tumbạu tụtatěngo sěngkatau.”

¹⁷Angkuěng i Gideon, ”Kereu kahěnga-hěngang iạ lẹ̌lahimpuluang u MAWU e, kěnangko iạ gělikeng sěmbaụ tatialane u mambeng MAWU e něngonggọu parenta ene si siạ.

¹⁸Iạ mẹ̌dorong kereu wotonge MAWU e reng měngampal᷊ẹ̌ kal᷊imona sini e, sarang iạ e reng měndiahing laidopẹ̌ e waugu MAWU.” ”Kerenẹ e,” angkuěng u MAWU, ”Iạ reng měngampal᷊ẹ̌ sarang i kau e marěnta kapia.”

¹⁹Tangú napul᷊ẹ e i Gideon kụ něnasạ e kambing měndangeng sěmbaụ, dingangu něngal᷊ạ e tapoěng mapul᷊ong kilo, wọu ene nẹ̌koạ e borotẹ̌ kụ tawẹ kabọ e. Bọu ene ghěsing kambing ene e nitahone su ral᷊ungu kimpạ, dingangu sawone su ral᷊ungu kuring, mase wọu ene kěbị e niěntudẹ̌ kụ nisadia su malạekatʼu MAWU e kụ kạpělẹ̌hědone suěllungu kalun těrbantin ene e.

²⁰Malạekatʼu MAWU e nẹ̌bera u, ”Pěllọko kinạ dingangu borotẹ̌ ene su wowom batu ini mase sěbohẹ̌ko sawong kinạ ene su wowone.” I Gideon tangu nẹ̌koạewe apang niparenta si sie.

²¹Bọu ene malạekatʼu MAWU e něngul᷊uhu limane kụ dingangkewem pondol᷊u kalu kạl᷊ahěgo si sie tangu i sie něnenggehe kinạ dingangu borotẹ̌ ene. Batu ene riměllị ku nasuẹe nahěngisẹ̌ kinạ dingangu borotẹ̌ ene. Bọu ene naghěnggingke malạekatẹ̌ ene.

²²I Gideon nakahěngangke u nạung sen diměnta su anune ene ute kawe nạung malạekatu MAWU e hala. Tangú apidu kạkendene nẹ̌berạ e i Gideon, ”Nasilakạ iạ MAWU Kasěllahenge! Batụu iạ kai seng nẹ̌sombang u ghati lawọ gati ringangu malạekatʼU e!”

²³Arawe MAWU e něhengetang si sie, ”Pakatatape! Abe katakụ. I kau e tawe mate.”

²⁴Mase i Gideon němětị e pananěmbaěng sěmbaụ sene kụ nisěbạ e, ”MAWU e kai Simbul᷊u Karal᷊unsemahẹ̌”. Pananěmbaěng ene e wědang ene su Ofra, soạen tau Abiezer.

²⁵Su hěbi ene MAWU e něngoro kere ini si Gideon, ”Al᷊ạko saping amangu esẹ e, sapị e kal᷊ěnggihange[6] umure pitu taung. Lěkeko pananěmbaěng nạung nipětị i amangu e waugʼi Baal, mase hakạ e rihi tul᷊adang mahan duata Asyera su koaneng u pananěmbaěng ene.

²⁶Pětịko su wowong komol᷊ang ěndukang ene pananěmbaěng sěmbaụ kụ seng niantagẹ̌ pinakapia. Mase sapi esẹ ene kěbị e, harusẹ̌ tongkạ u tinalung koạ kere sasěmba waugu MAWU. Kụ dihi tul᷊adang mahan duata Asyera nạung seng nihakanu e koạ e kalune.”

²⁷Tangú i Gideon němilẹ e ěllange mapul᷊o wọu e tamai nẹ̌koạewe apang niorom MAWU e si sie. Kaiso ual᷊ingu i sie tumanịu mạtakụ u anạ u sěngkataune ringangu suapạewen taumata su kampong ene e, i sie tawe wahani mẹ̌koạ hal᷊ẹ̌ ene ěllo mal᷊ětu. Kụ hědọewe koatenge su tempong hěbi.

²⁸Ene měmamanuang soa ene e němpẹ̌pětị e sěngkarịěllone mal᷊ukadẹ̌, tangú, i sire nakasilọ e pananěmbaěng baugu Baal dingangu rihi tul᷊adang duata wawine i Asyera e seng nawatang. I sire nakasilo l᷊ai su tampạ ene seng nipětị pananěmbạěng sěmbaụ dingangu selain nẹ̌tongkạ u sapi esẹ nakoạ kere sasěmba.

²⁹Nakiwal᷊ọe i sire sěngkatau su wal᷊ine, ”Kai kakanoạ i sai ini ngae?” Sarangke nisẹ̌suiangke, kinasẹ̌suiangken sire u kawe nạung i Gideon anạ i Yoasẹ̌ e nẹ̌koạ.

³⁰Bọu e angkuěng i sire si Yoas, ”Anạu kai seng něnggoghahẹ̌ pananěmbaěng su Baal dingangu něhaka rihi tul᷊adang mahan duata Asyera su koaneng u pananěmbaěng ene. Ual᷊ingu ene, paringangke anạ u ene apasẹ̌bang damahi sol᷊ong ini. I sie harusẹ̌ mate!”

³¹Arawe i Yoas simimbang su kěbị apan dụdokạ ene, ”Pakasahẹ e i kamene mạnumběka su Baal kụ tumatawang si sie? I saim manumběka si sie, sarum pateěng sahěllo ini. Kereu i Baal kawe mamben Duata tangú balạe sẹ̌sane panumběka watangenge, batụu nighoghahe ene ute kawe pananěmbaěnge.”

³²U i Yoas kai nẹ̌bera, ”Manilaing i Baal sẹ̌sane rumokạ si Gideon, batụu i sie kawe seng něnggoghahẹ̌ pananěmbaěnge,” tangú nanětạ bọu ene taumata e nẹ̌sẹ̌bạ i Gideon si ”Yerubaal”.[7]

³³Su tempo ene kal᷊awọu tau Midian, Amalek dingangu apang hěntom bansa wal᷊ine su wanua l᷊inggi e su sěmběkan daki wọu Sal᷊ụ u Yordan tangu seng nẹ̌tampung. I sire liměbạ Sal᷊ụ u Yordan, kụ nědaseng su Wal᷊ang Yisreel.

³⁴Arawe i Gideon tangu pinẹ̌kawasaěngu Rohkẹ̌ u MAWU, hakịu i sie něniụ napiri waugu ipẹ̌kui taumatam balagʼi Abiezer tadeạu aparěnta apẹ̌dal᷊aụ dingange.

³⁵I sie mal᷊aing dimolohu rarolohang baugu hiten Asyer, Zebulon, Naftali, ringangu hiten Manasye — baewe apang su sěmbẹ̌kan daki, arau waewe lai su sěmběkam bahẹ bọu Sal᷊ụ u Yordan, mědeạu mẹ̌gausẹ̌ si sire apẹ̌tatamba ringange. Tangú i sire kěbị e riměnta kụ naontol᷊ẹ̌ si Gideon.

³⁶Bọu e i Gideon nẹ̌bera su Ruata u, ”MAWU, i Kau seng něhengetang u i Kau mẹ̌pakẹ u iạ e waugu ipěngambang tau Israelẹ̌.

³⁷Kereu mambeng kerene, tangú su wowong ěntana ini tuhụ tundune ute i kami kawe měměllọu gandung bọu kawene kụ sen takụ nipakatontong u ghuntingu rukụ u domba. Kereu rịěllo kawe kětạeng dukụ u domba ini samatang naholong namuhẹ̌ e, kụ ěntanane kawe tala, ute ene mělẹ̌lahẹ u i Kau sarung mẹ̌pakẹ u iạ e waugu ipěngambang tau Israel.”

³⁸Tangú nakoạ e kerene: Piạ i Gideon nẹ̌bangung sěngkarịěllone mal᷊ukadẹ̌ dingangu něměhạ e rukụ u domba ene, i sie nakahombangke akẹ u namuhẹ̌ sěmangko.

³⁹Bọu e i sie nẹ̌berạ e su Mawu Ruata, ”Mawu, mal᷊owọko ren tawe lumangehẹ̌ kereu iạ e relaing mẹ̌bisara sěnsul᷊e. Pakawalako iạ e reng mẹ̌koạ sěmbaụ bawanikạ lai ringangu ghuntingu rukụ u domba ini. Kaiso sěnsul᷊ẹ ini e kiwuạko reng kětạeng dukụ u domba ini e samatang tẹ̌bewe mamara, arawe ěntanane tangu kawe naholo.”

⁴⁰Sěhěbi ini e Mawu Ruata mẹ̌koạbe apang nirorongang i Gideon ene, hakịu sěngkarịěllone mal᷊ukadẹ̌ e rukụ u domba e nạung těbewe mamara, arawe ěntanane kawe seng naholo ual᷊ingu namuhẹ̌.