Read Sangir MANGA MĚLAHUKUNG 7 Bible Online

MANGA MĚLAHUKUNG 7 - Sangir bible

MANGA MĚLAHUKUNG 7

¹Piạ sahěllo i Gideon dingangu patikụ taumatane němpẹ̌bangung deng mal᷊uka-l᷊ukadẹ̌. I sire nahundal᷊engke kụ nẹ̌daseng su rěduhu simbul᷊u akẹ u Harod. Tenta pẹ̌darasengang u tau Midian kai su sěmběkan sawěnahẹ̌ bọu i sire, su wal᷊ane maraning Bukidu More.

²MAWU e něhengetang si Gideon, ”Taumatanu e tumanị u mal᷊awọ. Iạ e mạdiri mẹ̌gěllịu kal᷊auntu si sire mamatạ tau Midian, u su tiněnnan sire katihọ i sire nakawatạ e kai ual᷊ingu katatoghasʼi sire hala, hakịu i sire tawe mẹ̌dalo si Siạ.

³ Kụ paul᷊ịko su manga taumatanu e, ’U i saing měngkatakụ, ute pakal᷊ighạbe pěněntangu Wul᷊udu Gilead ini e ringangu pẹ̌sul᷊e sol᷊om bal᷊ene.’ ” Tangú kai 22.000 su kataune něngkapul᷊ẹ kụ natěntang tangu kětạeng 10.000 su kataune.

⁴Bọu e MAWU něhengetang kapia si Gideon, ”Taumatanu e mang bědang tumanịu mal᷊awọ. Paringangko i sire sol᷊ong sal᷊ụ. Sene Iạ sarung manahị si sire waugʼi kau e. Kereu Iạ měhengetang si kau, ’Kụ tau ini e harusẹ̌ kakoạ sol᷊ong anunu,’ ute i sie harusẹ̌ tamai. Kaiso kereu Iạ měhengetang, ’Tau ini e tawe wotonge makoạ sol᷊ong anunu,’ ute i sie abe tamai.”

⁵Tangú i Gideon němaringangke si sire ene sol᷊ong sal᷊ụ, mase MAWU e něhengetang si Gideon, ”Taumata kụ mělẹ̌lanụ akẹ kere asu e harusẹ̌ haenu wọu anun taumata měmpěnginung měmul᷊angeng.”

⁶Tangú kai piạ nạung 300 su kataune kụ mělẹ̌lanụ akẹ bọu l᷊imane; arawe wal᷊ine ute kěbị kai mẹ̌mul᷊angeng manginung e.

⁷Bọu e MAWU něhengetang si Gideon, ”Kụ ual᷊ingu 300 su kataune kụ mělẹ̌lanụ akẹ ene, Iạ e sarung měliwirʼi kamene ringangu měngonggọ u kal᷊auntu si kamene makawatạ tau Midian. Dolohe i sire wal᷊ine e pakapul᷊ẹ.”

⁸Ual᷊ingu ene i Gideon něndolohu kal᷊awọu taumatang Israelẹ̌ bal᷊ine e nipakapul᷊ẹ tabeạu katewe nal᷊ěmbe i sire 300 ene. Kal᷊awọu sinasạ, dingangu napiri e nial᷊ạ bọu anun sire apang něngkapul᷊ẹ ene. Tau Midian tangú wawa su al᷊ungu pẹ̌darasengangu tau Israel su tenta.

⁹Sěhěbi ene tangú MAWU e něhengetang si Gideon, ”Pẹ̌bangungke, Gideon! Dakọ e pěngalo su pẹ̌darasengang u tau Midian. Iạ e sarung měngonggọu kal᷊auntu si kamene makawatạ si sire.

¹⁰Kai kereu i kau e matakụ, ute paringangko i Pura, ěllangu ene e sěngkapẹ̌paparingang sol᷊ong pẹ̌darasengang u manga sekẹ.

¹¹I kau e sarung makaringihẹ̌ měnsang apa ipahumbisarang manga sekẹ, kụ ene e makawahani si kau e měngalo.” Tangú nahundal᷊engke i Gideon dẹ̌duang Pura e, sol᷊ong pẹ̌saraěngu pẹ̌darasengangu sekẹ.

¹²Tau Midian, Amalek dingangu taumata wal᷊ine apam bọu wanua l᷊inggi e, nasawuhẹ̌ suapan tampạ su wědạ e ene. Al᷊ingkai ikẹ̌kasilo kere kal᷊imbotong měmpědẹ̌dahěmbung. Ontan sire e mal᷊awọ tạ sihinge kere ěnne su wiwihu apeng.

¹³Ene i Gideon narěntạ e sene, i sie nakaringihẹ̌ piạ sěngkatau kapěbẹ̌běkeneng ipine su hapị e. Tau ene nẹ̌bera u kere ini, ”Iạ e kai nipi piạ borotẹ̌ sěngkompeng tụtal᷊unggi nasuẹ̌ su ral᷊ungu pẹ̌darasengang i kitẹ mase limiu tenta sěmbaụ. Tenta ene nahaka natene sarang nẹ̌saratang bowong ěntana.”

¹⁴Hapị e simimbahẹ̌, ”Kai, ene e mambeng pedang Gideon anạ i Yoas, tau Israel ene! Mangal᷊ene Ruata e seng něngonggọ u kal᷊auntu si sie namatạ tau Midian dingangu kasěllahu wuntuang u sekẹ i kitẹ!”

¹⁵Piạ e i Gideon nakaringihẹ̌ běkeng ipin tau ene ringangu mangal᷊ene, i sie mal᷊aing němul᷊angeng nẹ̌suba Ruata. Bọu ene i sie nẹ̌sul᷊e sol᷊ong pẹ̌darasengang u Israel kụ nẹ̌bera u, ”Pakarariahi wue! MAWU e něngonggọ u kal᷊auntu si kamene, namatạ buntuangu mẹ̌sasekẹ u tau Midian!”

¹⁶Bọu e i Gideon němahiạ u taumatane 300 su kataune nakoạ těllung kamonaěng. Pẹ̌sěngkatau e nionggotangu slompretẹ̌ dingangu wěnsadẹ̌ lohong oborẹ̌.

¹⁷Angkuěng i Gideon si sire, ”Kereu iạ e mịdating u pẹ̌saraěngu pẹ̌darasengang u tau Midian, tinganeko iạ pakapia-pia, ringangu pẹ̌koạko apan takụ koateng.

¹⁸Kereu iạ dingangu kamonaěngku e měnịu slompretẹ̌ e, i kamene mal᷊aing harusẹ̌ pěniụ u slompretu. Bọu ene i kamene harusẹ̌ pěmpěmansagẹ̌ su sěnaung mạngělikụ pẹ̌darasengang ene, ’E waugu MAWU ringangu waugʼi Gideon!’ ”

¹⁹Mạdanịeng kẹ̌kal᷊oarane, i Gideon dingangu kal᷊awọu taumatane nịdatingkeng pẹ̌saraěngu pẹ̌darasengangu sekẹ. Su tempo ene taumata kụ mělẹ̌lukadẹ̌ pẹ̌darasengang e wuhụ e pěngangaweng mělal᷊ukade. Mase i Gideon dingangu taumatane němpěniụ e slompretẹ̌ dingangu němpaměkạ e manga wěnsadʼi sire.

²⁰Duang kamonaěng lai wal᷊ine ute nẹ̌koạ lai kerene. Tangú wọu ene i sire kěbị e němpěnědẹ e oborʼi sire ringangu l᷊iman sire kaihi, ringangu něniụ slompretẹ̌ su l᷊iman sire koaneng. I sire němpěmansagẹ̌ u, ”Peda baugu MAWU ringangu waugʼi Gideon!”

²¹I sire kěbị e těbe sěngkatau-sěngkatau rụdarisị su tampạ e mạngělikụ pẹ̌darasengang ene. Tangu kal᷊awọu wuntuangu sekẹ ene e němpahuntal᷊ang ipẹ̌sẹ̌sasenggene apidu kapěmẹ̌mansage.

²²Piạ i Gideon dingangu apan taumatane kapẹ̌lẹ̌hětene slompretẹ̌, MAWU e napẹ̌karasu wuntuang u sekẹ e lawọ i sire ringangu pedan sire. I sire němpẹ̌tal᷊ang nẹ̌timona Zerera sarang karauange Bet-Sita ringangu soang Abel-Mehola maraning Tabat.

²³Tangú hěnton Naftali, i Asyer, dingangu hěnton Manasye baewe apan su sěmběkan daki arau lai su sěmběkam bahẹ bọu Sal᷊ụ u Yordan nikuiang. Bọu e i sire němpěnahusu sordadom Midian.

²⁴Kerene lai su kasěllahu wimbaengu wawul᷊urangu Efraim, Gideon něndingọ u habaru kakui ini e, ”Mahiko lintụ pěnekẹ tau Midian. Tahutěndake wue Sal᷊ụ u Yordan dingangu kal᷊awọu anạ u sal᷊ụ karaune sarang mịdatingu Bet-Bara. Abe ghělire loahe tau Midian apal᷊iu wọu ene.” Tangú apan tau Efraim e mal᷊aing nipẹ̌gihingang, bọu e i sire němpẹ̌tahutěndạeng Sal᷊ụ u Yordan dingangu kal᷊awọu lelange sarang Bet-Bara karaune.

²⁵Duang katau mapapian tau Midian kụ kai i Oreb dẹ̌duan Zeeb nisamẹ i sire. I Oreb nipate su Watung Oreb dingangu i Zeeb nipate su pěmaměhaěng anggorʼi Zeeb. Taumatang Efraim ene e tatapẹ̌ něnahusu tau Midian, bọu ene němpẹ̌bawa těmbọ i Oreb dẹ̌duang Zeeb sol᷊ong anung Gideon su sěmběkang Yordan su sěmběkan daki.