Read Sangir MANGA MĚLAHUKUNG 8 Bible Online

MANGA MĚLAHUKUNG 8 - Sangir bible

MANGA MĚLAHUKUNG 8

¹Tau Efraim nẹ̌bera si Gideon, ”Unụ e i kami tawe niparingang piạ i kau e nẹ̌buạ tamai něngalo tau Midian? Kawe unụe i kami e nikoạ u kerene?” Kerene sungutʼi sire si Gideon.

²Kutẹu i Gideon simimbangu, ”Apan takụ nikakoạ e kadodọ bue mangal᷊ene isul᷊ung kere suapang seng kinoạ i kamene. Manilaing tawe tumanịu nikoạ i kamene, kaiso kadodọ nikoạ i kamene e kai limembong mạarěga marau wọu kal᷊awọu apan seng nikoạ u wuntuang u ghal᷊ipohoku.

³ Seng i kamene ini e nakahombang kawasa wọu Ruata hakịu nakapate si Oreb dẹ̌duan Zeeb, i rẹ̌dua mapapiang Midian ene e! Isul᷊ung sene tangú, kai apạe kapapiaku?” Bọuteng i Gideon nẹ̌bera kerene tangú, i sire semben tawe saụ limangehẹ̌.

⁴Su tempo ene i Gideon dingangu taumatane i sire těllu hasụ e nahumpạen sěmběkan Sal᷊ụ u Yordan. I sire kai něngkarul᷊ěpe kaiso měngkai kạsahusune sekẹ i sire.

⁵Bọu e i sire natẹ̌pase sarang Sukot. Sene i Gideon nẹ̌bera su mamanuang soa u, ”Tul᷊ungko ghěllireng kaěng maning kadodọ su taumataku e. I sire kai narul᷊ěpe marasai sěmbal᷊iau i kami e kai wědang měnahusu si Zebah rẹ̌duang Salmuna, mararatum Midian ene.”

⁶Kutẹu apan těmbonangu Sukot ene němpẹ̌simbang, ”Ah, i kamene wědang lai tawe nạnamẹ si Zebah rěduan Salmuna, i kamene kawe sem bọu němpẹ̌dorong kaěng! Kai waugu apa tangu taumatanu e harusẹ̌ ipakaěng?”

⁷Tangú angkuěng i Gideon, ”Kerenẹ e! Hědo kereu MAWU e sen něngonggọ u kal᷊auntu namatạ si Zebah rěduan Salmuna e, i kamene sarung takụ geserang u manga barang mal᷊ahoro ringangu manga hanggange wọu wanua linggi e.”

⁸Bọue i Gideon naněpase raral᷊enge kụ nahumpạ su Pnuel. Paị sene lai i sie nẹ̌dorong kaěng baugu taumatane. Kaiso sasimbangu tau Pnuel mẹ̌sul᷊ungu sasimbang u tau Sukot.

⁹Ual᷊ingu ene i Gideon nẹ̌bera si sire, ”Iạ e hědon sarung mẹ̌sul᷊e kapia ringangu masal᷊amatẹ̌. Kụ su orasẹ̌ ene iạ e sarung mělengge měnaran soa ini!”

¹⁰Těntal᷊ang ene tangú i Zebah rěduang Salmuna e ringangu kasěllahu wuntuang i sire e ene su Karkor. Bọu kasěllahu wuntuang u tau wanua l᷊inggi e, kětạeng piạ u manga 15.000 su kataune nal᷊ěmbe; 120.000 su kataune sordadone e seng něngkapate.

¹¹I Gideon timol᷊ẹ e kěhị u pẹ̌saraěngu wanua l᷊inggi e su sěmběkan daki wọu Nobah ringangu Yogbeha wọu ene sěngkělěndị u něngalo sekẹ e něhěkosẹ̌.

¹²Kụ i Zebah rěduan Salmuna, mararatun Midian darua e nahuntal᷊ang, kaiso i Gideon něnahusu ringangu nanamẹ si sire, hakịu kasěllahu wuntuangu sekẹ i sire e nipẹ̌kal᷊ipomponge.

¹³Bọu ene suraral᷊engang masul᷊e wọu pẹ̌sasekẹ, i Gideon něngal᷊ạ e ral᷊eng lumiu sasakaěng u Heres.

¹⁴Sene i sie něhěgo sěngkatau umbaseng bọu Sukot, bọu e pinakiwal᷊oěnge tau ene arengu kal᷊awọu manga těmbonange su Sukot. Tangú tau e němohẹ e kal᷊awọu areng ene e waugʼi Gideon — kụ kěbị e 77 su kataune.

¹⁵Bọu ene i Gideon dimal᷊eng nẹ̌sombangu manga těmboěng e su soa ene mase nẹ̌bera, ”Mamben nal᷊ahẹ u i kamene wědang makạtahěndung u i kamene kai wọu nạdiri nẹ̌tul᷊ung u iạ, batụu iạ e wědang tawe nạnamẹ si Zebah rẹ̌duan Salmuna arau ěng? I kamene mạdiri mapakaěngu apan taumataku; sěmbal᷊iau i sire mamben sukaral᷊omene tempo ene. Kakěllạ e ěndaị i Zebah rẹ̌duan Salmuna.”

¹⁶Bọu ene i Gideon něngal᷊ạ e hanggange ringangu manga larang su wanua l᷊inggi kụ nipěliwara kal᷊awọu těmbonang u soan Sukot ene.

¹⁷Su Pnuel lai i sie napakahakang měnara ringangu němate kěbị esẹ su soa ene.

¹⁸Bọu ene i Gideon nakiwal᷊o si Zebah rẹ̌duan Salmuna, ”Kereapa gahị i sire apang nipateng kamene su Tabor ene?” Zebah rẹ̌duan Salmuna simimbang, ”I sire ene kěbị e mẹ̌pẹ̌papangawẹ i kau, mẹ̌sul᷊ungu hěntonu mapapangkatẹ̌.”

¹⁹”Ene e kai manga anạ u sěmbaụku — manga anạ i ninangku,” angkuěng i Gideon. ”Andene i kamene tawe němate si sire, maning makapatẹ e iạ e tawe lai měmate si kamene.”

²⁰Ene angkuěng i Gideon si Yeter, anạ e kaiakanenge, ”Patẹ e i sire!” Kaiso i Yeter e wedangbeng mangudạ. Kụ i sie mạtakụ hakịu i sie tawe měnawụ pedane měmate.

²¹Angkuěng i Zebah rẹ̌duan Salmuna si Gideon, ”Ené, kamagengu i kau e kai esẹ tangú pateěngu limanu hala i kami e!” Tangú i Gideon němatẹ e si sire, kụ něngal᷊ạ e kal᷊awọu ral᷊ěgahẹ̌ su lehẹ u ontan sire.

²²Bọu e nẹ̌berạe tau Israel si Gideon, ”I kau e sen něngambang i kami wọu kawasan tau Midian. Ual᷊ingu ene mal᷊owọko i kau e reng makoạ těmbonang i kami — i kau ringangu hitenu e.”

²³Angkuěng i Gideon, ”Tala. Iạ e tawe makoạ těmbonang i kamene; anạku e mal᷊ain tala. Kai MAWU e těmbonang i kamene.”

²⁴Kaiso wọu e i Gideon saụko l᷊ai nẹ̌bera, ”Tumbạen sěmbaụ dorongku; anti-anti nạung nipul᷊ahong kamene wọu sědụ e, sarakangbeng kamene kěbị si siạ.” (Tau Midian tundune kai měpẹ̌pakẹ u anti-anti wul᷊aeng, mẹ̌sul᷊ungu i sire wal᷊ine apang měmpẹ̌tẹ̌tanạ su wanua l᷊inggi.)

²⁵”Kerenẹ e,” angkuěng i sire, ”ringangu naung mal᷊uasẹ̌ i kami e sarung měnarakangu ene si kau.” Mase i sire němilạeng hekạ sěnggehẹ mase sěngkatau-sěngkatau e němpẹ̌děntạ e kụ nasịpěllọeng anti-anti wul᷊aeng apan nạung nipul᷊ahon sire wọu sědụ i sire.

²⁶Kal᷊awọu anti-anti wul᷊aeng apang nisarakang si Gideon su tempo ene wěhạ e maraning duam pul᷊o su kilone, wědang tawe narekeng manga ral᷊ěgahẹ̌, kalong, hekạ kamumụ pẹ̌paketang u mararatum Midian, dingangu kalong mạsasangẹ su manga l᷊ehẹ u ontan sire.

²⁷Wọu manga wul᷊aeng ene e, i Gideon nẹ̌koạko tul᷊ada mahang duata, mase piněllọ e su kamponge isẹ̌sẹ̌bạ Ofra. Kal᷊awọu tau Israel makoạ sol᷊ong ene, kụ měmpaněmba tul᷊adang mahan duata ene, hakịu i sire semben tawe lai mẹ̌dahirị Duata. Kụ hal᷊ẹ̌ ene tangú makoạ sedẹ baugʼi Gideon dingangu ral᷊ohom bal᷊ene.

²⁸Tau Midian tawe makakanoạ baharia; u i sire kai seng kinawatạ u tau Israel. Tangú nal᷊enehe wanua ene ěpạ u pul᷊o su taunge karěngụ e, karěngụeweng i Gideon bědam biahẹ̌.

²⁹Samurin pẹ̌sasekẹ ene e, i Gideon nẹ̌sul᷊ẹ e su kampong pinamitingang puide kụ nẹ̌tanạ e sene.

³⁰Manga anạ e esẹ e pitum pul᷊o su kataune, watụ u kawinge kai mal᷊awọ.

³¹Piạko l᷊ai rokạ e su Sikem; kụ bọu rokạ e ini e i sie nakahombang anạ e esẹ sěngkatau kụ nịsěbạ e si Abimelekh.

³²Ene umbure natimụeng gurange wuhụewe i Gideon anạ i Yoas ene e naminsul᷊e singongone. I sie nilěbing su pěndal᷊ẹ̌bingang i Yoas i amange. Lebing ene e kaěbakeng su Ofra, soang hiten Abiezer.

³³Ene i Gideon nairị e, tau Israelẹ̌ e semben tawẹ lai satiane su Ruata. I sire měmpạněmba manga mahan duatam Baal dingangu napakariading Baal-Berit duatan sire.

³⁴I sire sen tawe lai mẹ̌kakal᷊iomaneng su Ruata, MAWUN sire, kụ nạung něngambang si sire wọu kawasam patikụ dokạ mạngělikụ si sire.

³⁵I sire lai tawe měmamal᷊isẹ̌ budi sural᷊ohom bal᷊eng Gideon baugu kal᷊awọu kapiang Gideon su kawanuang Israel.