Read Sangir MANGA MĚLAHUKUNG 9 Bible Online

MANGA MĚLAHUKUNG 9 - Sangir bible

MANGA MĚLAHUKUNG 9

¹Su sěhěllo i Abimelekh anạ i Gideon nakoạ sol᷊ong Sikem tampạu ghal᷊ipohong anạ u sěngkataung ninange. Sene i sie měbẹ̌bisara ringang i sire, angkuěnge,

²”Kěnangko pakiwal᷊o su kal᷊awọu tumanạ u Sikem, sude limembong kapiane: Parentang i sire manga anạ i Gideon pitum pul᷊o su kataune arau kětạembeng ual᷊ingu sěngkatau ngae? Paul᷊ịko l᷊ai si sire u iạ e kai wědang daha sěmbaụ dingang i sire.”

³Tangú nahundal᷊engke ghal᷊ipohong anạ u sěngkataung ninang i Abimelekh e si sire tau Sikem dingangu něhabaru tatanatang Abimelekh si sire. Bọu e tumanạu Sikem ene e němutusẹ̌ u tumol᷊e si Abimelekh, batụu tumuhụ si sire e i sie mambeng piạ kal᷊ahěmpukangu raha ringang i sire.

⁴Bọu e i sire něngonggọu roitẹ̌ sal᷊aka pitum pul᷊o su kal᷊ẹ̌pane nial᷊ạ bọu wal᷊em pananěmbaěng su Baal-Berit. Kụ dingangu roitẹ̌ ene tangú i Abimelekh němaehẹ̌ sěnggopol᷊ang u taumata tạ atage mědeạu mẹ̌těngkal᷊aụ dingange,

⁵kụ bọu e nakoạ sol᷊ong soang amange su Ofra. Sene i sie němate anạ u sěngkataune pitum pul᷊o su kataune e su wowom batu. Arawe i Yotam anạ i Gideon kahembokange tawe kinapate ringangu ual᷊ingu i sie mẹ̌kẹ̌kěmbuni.

⁶Tangú nẹ̌tampungke kal᷊awọu tumanạu Sikem dingangu Bet-Milo e, bọu e nakoạ sol᷊ong kalun těrbantin piạ kěramatẹ̌ su Sikem. Sene i sire něhengkẹ si Abimelekh nakoạ datu.

⁷Sarangke i Yotam nakaringihẹ̌ hal᷊ẹ̌ ene e, i sie rimarisị e su Wul᷊udʼu Gerizim, bọu e němansagẹ̌ sol᷊ong lantehu taumata l᷊awọ ene e, ”Pẹ̌daringihẹ̌ko si siạ, ei kamene tau Sikem, tadeạu Mawu e mal᷊aing dumaringihẹ̌ si kamene!

⁸Sěnsul᷊ẹ piạ e nariadi kụ manga kakaluange němpẹ̌tampung kụ měmile ratun sire. Tangú nẹ̌berạe i sire su kalun zaitun, ’Kakoạko ratung kami e i kau.’

⁹Angkuěng u kalung zaitun, ’Ah, iạ mạdiri. U kamageng u iạ kai makoạ datung kamene, ute iạ kai reng měngirul᷊e wọu makaual᷊i lanang zaitun kụ ipakẹ baugu ipěngadatẹ̌ manga mahan duata ringangu taumata e.’

¹⁰Bọu e angkuěngu kakaluang su kalung ara u, ’I kaụ e kakoạ datung kami.’

¹¹Kaiso kalung ara e simimbang u, ’Iạ e madiri, watụ u waugu makoạ datung kamene e, iạ kai harusẹ̌ měngirul᷊e wọu makaual᷊i wuang ara mararěngang.’

¹²Bọu e nẹ̌berạ e kal᷊awọu kakaluang su kalung anggorẹ̌ e, ’Kụ, i kaụ e kakoạ datung kami.’

¹³Kutẹu kalung anggorẹ̌ e kawe simimbang u, ’Hal᷊ẹ̌be kereapa kamageng iạ e kawe harusẹ̌ měngirul᷊e měngual᷊ing anggorẹ̌ kụ makạl᷊uasẹ̌ naungu manga mahan duata ringangu taumata e kụ tumbạeng makoạ datung kamene!’

¹⁴Ual᷊ingu ene tangú, nẹ̌berạ e kakaluang e su manga sumpinị e u, ’I kaụ e kakoạ datung kami.’

¹⁵Tangú sumpinị ene simimbangke, ’Kereu i kamene kahěnga-hěngang měhengkẹ u iạ makoạ datung kamene, ute ramahị e pẹ̌těngkaěllung su al᷊ungu naụku e. Mạengu i kamene mạdiri ute, wọu kal᷊awọu apang lelangku e kụ piạ hanggang e ini tangu sarung suměbang putung kụ měnutung pakasuen tutunge kal᷊awọu kakaluang u aras su Libanon.’ ”

¹⁶”Kụ,” angkuěng i Yotam tuhụ e, ”Kụ kiwuạu ual᷊ingu pělahengkẹ si Abimelekh nakoạ datu, i kamene tangu seng nẹ̌karadiahang u naung matul᷊idẹ̌ dingangu wurẹ̌si ngae? I kamene sembeng nẹ̌koạ kerẹewe hinone si Gideon, i amangku e, ringangu ghal᷊ipohong anạ u sěngkataune? I kamene sem bọu němal᷊isẹ̌ kal᷊awọu kapiang amangku e

¹⁷kụ seng nẹ̌tohạ u munarane waugʼi kamene? Pẹ̌tahěndung, i sie seng něnarakang u niawane waugu ipěngambang si kamene wọu kawasan tau Midian.

¹⁸Arawe orasẹ̌ ini e i kamene nẹ̌ndal᷊akisẹ̌ anạ u sěngkatau wọu i amangku e. Manga anạ e seng nasuem patene si kamene sěngkapate su wowom batu e, i sire kal᷊awọe pitum pul᷊o su kataune. I Abimelekhẹ̌ e anạ i amangku su ěllange. Kaiso i kamene kawe něhengkẹ i sie nipakaratu su Sikem, kětạeng ual᷊ingu i sie kai wědang piạ kal᷊ahěmpukangu raha sěmbaụ dingang i kamene.

¹⁹Kereu kakanoạu e sěhěllo ini waugʼi amangku ringangu anạ u sěngkataune matul᷊idẹ̌ bue ringangu wurẹ̌si e, ute sal᷊amatewe mẹ̌daral᷊uasẹ̌ dingang i Abimelekh, kụ balạete i sie pẹ̌daral᷊uasẹ̌ dingang i kamene.

²⁰Kaiso kereu wal᷊inewe kerene kakakoạ e, ute karimạko wọu i Abimelekh tangu suměbang putung kụ měnutung pakasuen tutunge kal᷊awọu tumanạ u Sikem dingangu Bet-Milo. Dingangu karimạko wọu tumanạ u Sikem ore lai Bet-Milo e mal᷊aing sẹ̌bangengu putung kụ měhěngisẹ̌ si Abimelekh.”

²¹Bọu ene i Yotam tangu tumal᷊angu watangenge wọu e natanạ su Beer, watụ u i sie kai matakụ i Abimelekh, tuarine ene.

²²Těllu taung karěngụ e i Abimelekh nẹ̌parenta Israel.

²³Bọu e Mawu e napal᷊ětong pẹ̌sasitori sutal᷊oarang Abimelekh dingangu tau Sikem hakịu i sire rumokạ si sie.

²⁴Hal᷊ẹ̌ ini e mariadi tadeạu kawal᷊isang karal᷊akisʼi Abimelekh dingangu tau Sikem kụ něnahowong si sie apạmate manga anạ i Gideon i sire pitum pul᷊o su kataune.

²⁵Tau Sikem ene e naměllọu měllahěbagẹ̌ su manga wowom bul᷊ude waugu pěnamẹ si Abimelekh. Walạewe i saing sumahe sene hampasengu měllahěbagẹ̌ ene e. Tangú hal᷊ẹ̌ ene e nịlahabarẹ̌ si Abimelekh.

²⁶Su tempo ene i Gaal anạ i Ebed seng narěnta sěngkarěnta ringangu manga anạ u sěngkataune kụ měmpẹ̌tanạ su Sikem; dingangu tau Sikem e mạhimang si sie.

²⁷I sire tamai němpěnipo anggorẹ̌ su manga waelu anggorẹ̌, kụ bọu ene němpẹ̌koạ inumang bọu anggorẹ̌, dingangu němangung sal᷊imbang. I sire nahungkaěng dingangu něnginung su tampạ u pěnanal᷊eěng su mahan duatan sire apidu kapẹ̌sẹ̌salune si Abimelekh.

²⁸”I kitẹ ini e kai i sai tangú hakịu hinong mẹ̌tumpẹ̌kuhẹ̌ si Abimelekhẹ̌ e?” Angkuěng i Gaal. ”I sie ene kawe i sai tumuhụ hinone? I sie kai wal᷊inewe anạ i Gideon kụ i Zebul nakoạ lumaontol᷊e ene, kụ nakoạ ěllang i Hemor, i amang i Sikem i upung i kitẹ e ngae!”

²⁹”Kereu iạ makoạ měnẹ̌němbonang u tau Sikem ini ute mamben těngadẹ̌ nasue wěkeng Abimelekh ene. Iạ sarung mẹ̌bera[8] si sie, ’Ho, tol᷊ọ e! Pakasue sěbang sordadonu kụ damahi e sěbang pẹ̌sekẹ!’ ”

³⁰I Zebul kawasang soan Sikem, nisongkaneng u pědune sarang nakaringihẹ̌ dudatong Gaal kerene.

³¹I sie něndingọ u rarolohange sol᷊ong anung Abimelekh su Aruma apẹ̌lẹ̌habaru tatanata ini, ”I Gaal anạ i Ebed dingangu manga anạ u sěngkataune seng němpahunděnta su Sikem kụ něnahowong tumanạ e tadeạu apẹ̌děndokạ si kau.

³²Ual᷊ingu ene, mal᷊owọko i kau ringangu taumatanu e tamai měmpẹ̌kěmbuni su rahami su tempong hěbi.

³³Diěllo mal᷊ukadẹ̌ mạengu matangěllo e suměbang, tal᷊iwungẹ e soa ene kụ hẹ̌kose. Kụ mạeng u i Gaal ringangu taumatane mahunsěbang kụ dumokạ si kau e, ute ene kai seng tempone i kau měnggolaha si sie!”

³⁴Tangú i Abimelekh dingangu kal᷊awọu taumatane nẹ̌kakanoạ su tempong hěbi. I sire nẹ̌kal᷊iaesẹ̌ nakoạ ěpạ u kamonaěng kụ němpẹ̌kěmbuni nangělikụ soang Sikem.

³⁵Tawẹ kararěngụ e samuring Abimelekh dingangu kal᷊awọu taumatane nakasilo si Gaal siměbang kụ nahundarisị su pasěllangengu soa e, i sire kěbị e němpẹ̌sěbangke wọu pẹ̌kakěmbuniang i sire.

³⁶I Gaal nakasilo si sire, bọu e nẹ̌bera si Zebul, ”Kakěllạ e! Piạ taumata l᷊awọ ěnaẹ mạhul᷊intụ bọu manga wowom bul᷊ude!” ”Ah ene wal᷊inewe taumata,” angkuěng i Zebul, ”ene tumbạeng manga kěngkau su wul᷊ude.”

³⁷Bọu ene angkuěng i Gaal ko l᷊ai, ”Kahěngang! Piạ taumata limintụ bọu manga wěntihu wul᷊ude, dingangu piạ l᷊ai sěngkamonaěng damahi mẹ̌tẹ̌timona sini wọu těngong kalun těrbantin piạ kěramatẹ̌!”

³⁸Něberạe i Zebul si Gaal, ”Kutẹu, suapa ini mohong mal᷊oang ene? Kangerẹ baweranu e, kai waugu a i kitẹ harusẹ̌ mẹ̌tumpěkuhẹ̌ si Abimelekh ene? Kụ seng ini e taumata apang lẹ̌hinakanengu ene. Kụ tamaị e tol᷊ọ ini e pěngalo si sire!”

³⁹Bọu e i Gaal naněbangu tau Sikem kụ dimokạ si Abimelekh.

⁴⁰Kai i Abimelekh něngalo si sie sarangkewe i sie nakatal᷊ang. Tingkul᷊ẹ̌ e masịkal᷊ahondosẹ̌ sarang těngong tukadʼu pasěllangengu soa.

⁴¹Pangěnsueěnge i Abimelekh nẹ̌sul᷊e sol᷊ong Aruma, kụ něngindunụ sene. I Zebul něnagha si Gaal dingangu manga anạ u sěngkataune niapasěbang bọu Sikem, hakịu i sire seng tawe makapẹ̌tanạ sene kạpia.

⁴²Sěngkarịěllone tau Sikem nanětạ e naněntangu soa, makoạ sol᷊ong dahami, kụ hal᷊ẹ̌ ene nipaul᷊ị si Abimelekh.

⁴³Bọu e i Abimelekh něnampungke taumatane, ringangu němahiạ i sire nakoạ těllung kamonaěng, kụ bọu e i sire němpẹ̌kěmbuni su manga rahami. Ene i sie nakasilọ e tumanạ u soa e nakoạ sol᷊ong dahami e, i sie tangú siměbang bọu pẹ̌kakěmbuniange kụ němate si sire.

⁴⁴Těntal᷊ang i Abimelekh dingangu wuntuange masahawụ-sahawụ timol᷊ọ němpěngalo pasěllangeng u soa e, wuntuange rarua wal᷊inẹ e němpěnahusu kụ němpěmate kal᷊awọu taumata apang němpahuntal᷊ang sol᷊ong dahami e.

⁴⁵I Abimelekh měngkate něngalo kanandung ěllo e ringangu němul᷊aho soa ene; tumanạ e nipate, mase soane nigaghoghahe, wọu e nisawuhangu asing.

⁴⁶Ene i sire apang su ral᷊ungu bentengu Sikem nakaringihe hal᷊ẹ̌ ene, tangú i sire nahunsuẹ̌ e su ral᷊ungu lohange su al᷊ungu pěnaněmbaěng si El-Berit mědeạu pẹ̌těngkaěllungang.

⁴⁷Bọu e taumata naul᷊ị si Abimelekh u taumata su těndạu u Sikem ene e seng němpẹ̌tampung sene.

⁴⁸Ual᷊ingu ene, i Abimelekh dingangu taumatane něngkakoạ sol᷊ong Bul᷊udu Zalmon. Sene i sie něněnto manga lelangu kalu ringangu wal᷊iung, bọu ene nipasaěng su wěmbange manga lelangu kalu ene, wọu ene rimolohu taumatane lai masahawụ-sahawụ nẹ̌koạewe kere apang sen nịkakoạ e.

⁴⁹Tangú i sire sěngkatau-sěngkatau e něněntọ e manga lelangu kalu, mase němpahundal᷊eng timol᷊e si Abimelekh. Kal᷊awọu lelang u kalu ene niěndụ i sire su mohongu lohang u pěnanal᷊eěng ene, wọu e nitutunge, těntal᷊ang tau Sikem wědang ene su ral᷊unge. Ual᷊ingu ene nate e kal᷊awọu taumata apang měmpẹ̌tẹ̌tanạ su Sikem e, piạ u manga sěhiwu su kataune esẹ dingangu wawine.

⁵⁰Bọu ene i Abimelekh dimal᷊eng sol᷊ong Tebes. I sie něnal᷊iwung soa ene wọu ene nikaianeng i sire.

⁵¹Su puidewen soa ene piạ měnara matoghasẹ̌ sěmbaụ. Tangú kal᷊awọu tumanạu soa ene němpẹ̌tal᷊ang sene. I sire nahunsuẹ̌ su ral᷊ungu měnara ene kụ němal᷊e tukadẹ̌, bọu ene nawị sol᷊ong bowone.

⁵²Bọu ene riměntạ e i Abimelekh sol᷊ong ene kụ něngalo su měnara ene. Piạ i sie nahumpạ e su tukadu měnara ene kụ nanutungke,

⁵³ sěngkatau wawine něngěnsạu watung gilimang sěmbaụ su wowon těmbọe hakịu nahěpi kawul᷊ung těmbọe ene.

⁵⁴Ringangu masahawụ-sahawụ i Abimelekh nẹ̌kui sěngkatau umbaseng mạmasaěng aghide kụ nẹ̌bera, ”Sawụko pedanu kụ pateko iạ; iạ madiri pẹ̌beraěng u taumata u iạ kawe nipaten bawine.” Tangú umbaseng ene naněkạ si sie hakịu nate.

⁵⁵Ene tau Israel nakasilo u i Abimelekh kawe seng nate ute, i sire kěbị e něngkapul᷊ẹ e.

⁵⁶Kerene kakakoạ e Ruata němal᷊isẹ̌ si Abimelekh su karal᷊akise kụ nikakoạ baugʼi amange, piạ i sie němate manga anạ u sěngkataune, kal᷊awọe pitum pul᷊o su kataune.

⁵⁷Dingangu Mawu e něhukungu l᷊ai tau Sikem ual᷊ingu karal᷊akisʼi sire. Hal᷊ẹ̌ ene nisěhụ kerẹewe seng nipẹ̌bera si Yotam anạ i Gideon mạanun sire piạ e i sie měmpěnalu si sire.