Read Sangir PĚLAL᷊AHẸ 1 Bible Online

PĚLAL᷊AHẸ 1 - Sangir bible

PĚLAL᷊AHẸ 1

¹Lohong bukẹ̌ ini e měbẹ̌běkeng apa iwẹ̌bokạ i Yesus Kristus mạanung mangạ e apa sarung mariadi. Mawu Ruata e napakasingkạ si Kristus tadeạu i Sie mapakal᷊ahẹ su manga ěllangʼE apan seng tawẹ kararěngụ e harusẹ̌ mariadi. I Kristus rimolohu manga malạekatʼE sol᷊ong anung Yohanes ěllangʼE, apạul᷊ị u karariading kal᷊awọu munara ene si sie.

²Tangu i Yohanes něběkẹen patikụ apang kinasilone e; kụ seng ini e katataingu wěkene mạanun titang Mawu Kasěllahenge kụ nitoghaseng i Yesus Kristus lụliu pẹ̌sasahidinʼE.

³Kariangkamang taumata kụ mapẹ̌basa ringangu i sain mạpararingihu wal᷊on těbal᷊u bukẹ̌ ini e mase matuhụ suapang kụ kạbawohẹ su ral᷊unge. Batụu tawẹ karěngụ e patikụ ini e sarung mariadi.

⁴ Manga anạ u sěmbaụ su kěbị jamaatẹ̌ pitu su ěntanang Asia! Iạ i Yohanes, měkẹ̌karalọ i kamene kěndagengu al᷊amatẹ̌ dingangu karal᷊unsemahẹ̌ bọu Mawu Ruata — i Sie kụ ene, kụ seng ene, dingangu sěntiniạ ene — ore wọu kěbị rohkẹ̌ pitu kụ ene su těngon kararatun Duata,

⁵ ringangu wọu i Yesus Kristus, sahidi satia. Kai i Sie kahumotong-motongange niapẹ̌biahẹ̌ kapia wọu kapapohonge ringangu kai i Sie kawasang patikụ datun dunia e. Mawu Yesus kiměndagʼi kitẹ, kụ ual᷊ingu kapapohongʼE, i Sie něliung kitẹ bọu patikụ dosang kitẹ,

⁶ kụ něhengkẹ i kitẹ niapakakoạ kawanua těntani manga imang, mẹ̌tatangkiang Duata, i AmangʼE. Kai i Yesus Kristus ene mawantugẹ̌ dingangu kawasa sarang karěngụ e. Aming!

⁷ Kakělla, i Sie riměnta mạdal᷊iwungu winawa! Kěbị taumata e sarung makasilo si Sie, sarangkewen lai i sire apan něněkạ si Sie. Patikụ bansa su dunia e sarung lumungkang ual᷊ing i Sie. Ore, těngadẹ̌! Aming!

⁸ ”Kai Iạ e kahumotongang e ringangu pangěnsueěnge,” ungkuěngu Mawu Ruata e, kụ seng ene, dingangu kụ ene sěntiniạ, Kụ Lembong Kawasa.

⁹Iạ e kai i Yohanes, anạ u sěmbaụ u kụ ukure mẹ̌sul᷊ungʼi kamene su ral᷊ungu pěnanal᷊udẹ̌ susa kụ lụhombang su apan tumatol᷊e si Kristus. I kitẹ e hinong makědang susigěsạ tarangkewe su sěngkatau umatʼE tataghuanengʼE. Iạ e niwembang su tahanusang Patmos ual᷊ingu iạ mělẹ̌habaru hengetang u Mawu Kasěllahenge nitoghasengu sasahidin Mawu Yesus.

¹⁰Su ěllon Mawu e, iạ kai nilohoěngu Rohkẹ̌ u Ruata, bọu e iạ nakaringihẹ̌ tingihẹ̌ maihạ — kere tingihu napiri — mělẹ̌luntingihẹ̌ su likurangku.

¹¹Tingihẹ̌ ene nẹ̌bera u, ”Bohẹko apang ikasilonu, kụ dingọko bukẹ̌ ene su jamaatẹ̌ pitu ini: Efesus, Smirna, Pergamus, Tiatira, Sardis, Filadelfia, ringangu Laodikia.”

¹²Ene iạ nẹ̌bihụ e sol᷊ong likude namanda měnsang kai i sai mạmisara si siạ e. Tangu iạ nakasilọ e ral᷊aedu sol᷊o nikoạ bọu wul᷊aeng kal᷊awọe pitum baụ.

¹³ Sutal᷊oarang manga l᷊aedu sol᷊o ene rụdarisị sěngkatau, kụ kẹ̌kasilo al᷊ingkai kere taumata. I Sie nẹ̌pakẹ u kakingkaenge kụ kanandụe nịdatingu l᷊aedẹ̌. Su sěbạʼE i Sie nẹ̌pakẹu tatukuse wọu wul᷊aeng.

¹⁴ UtạʼE mawira kere manga rukụ u domba, kawirane kere kapesẹ̌: MatanʼE kụkuhenabẹ̌ kere putung;

¹⁵ l᷊aedʼE lụhentẹ kere witụ nitongkạ. TingihʼE kere ghal᷊ědụ u akẹ u tědunang gaghuwạ.

¹⁶LimanʼE koaneng mạngumbelẹ bituing pitu, mase wọu mohongʼE nisěbangengu peda mahoro sěmbaụ kụ horone su ruamběka. GatinʼE kụkuhěnabẹ̌ kere matangěllo su ěllo mal᷊ětu.

¹⁷ Ené iạ nakasilọ e si Sie, kutẹu iạ kawe nělinsumagẹ̌ su těngonʼE kere taumata nate. Ené i Sie nanělideng limanʼE koaneng si siạ e kụ nẹ̌bera, ”Abe katakụ! Kai Iạ e panẹ̌takenge ringangu pangěnsueěnge.

¹⁸Seng Iạ e i Sie kụ biahẹ̌! Iạ e seng nate, kaiso kakěllako, Iạ e wiahẹ̌ sarang marěngụ-děngụ. Iạ e mạngawasa papate, ringangu dunian taumata nate.[1]

¹⁹Ual᷊ingu ene, wohẹko apang kụ kinasilonu, kụ apạeweng ene su orasẹ̌ ini e, ringangu apạewen sarung mariadi e.

²⁰Kai ini e rahasiang bituing pitu e kinasilonu su l᷊ima-Ku koaneng, dingangu wọu ral᷊aedu sol᷊o wul᷊aeng pitumbaụ e: Bituing pitu e kai manga malạekatu jamaatẹ̌ pitu, dingangu ral᷊aedu sol᷊o pitu e ute jamaatẹ̌ pitu ěndaị e.”