Read Sangir PĚLAL᷊AHẸ 10 Bible Online

PĚLAL᷊AHẸ 10 - Sangir bible

PĚLAL᷊AHẸ 10

¹Bọu e iạ nakasilo sěngkatau malaẹkatẹ̌ mal᷊intoị bal᷊ine limintụ bọu sorga. I sie mạl᷊ahěmbungu winawa ringangu piạ děndipahẹ̌ sěmbua něliwung těmbọ e. Gatine sụsěnnang kere matangěllo, ringangu l᷊aede kere rihi putung.

²Su l᷊imane piạ bukẹ̌ dul᷊ung kadodọ mạbawingkahẹ̌. Laede koaneng mạtatahida su sasị, arawe kaihi e mạtatahida su rul᷊unge.

³Mase i sie něngěnggahu tingihe maihạ kere pěmamunggal᷊ọ u manga singa. Sarangken malạekatẹ̌ ene wọuten něluntingihẹ̌ e ute nisimbahengken děllụ pitum bua ringangu tingihe měgẹ̌gaghal᷊ědụ.

⁴Sarạeng děllụ pitu ene e nẹ̌gaghal᷊ědụ, iạ mapulụ e mamohẹ, kai iạ nakaringihe tingihẹ̌ bọu sorga nẹ̌bera, ”Lěmping bue apan niweran děllụ pitu e; kumbahang iwohẹ!”

⁵Mase malạekatẹ̌ kinasiloku e rụdarisị su l᷊audẹ̌ dingangu su rul᷊unge ene, něhengkẹ l᷊imane koaneng sol᷊ong l᷊angị.

⁶I sie nẹ̌salu su arengu Mawu Ruata kụ biahẹ̌ sarang marěngụ-děngụ, něndiadi langị, dunia ringangu l᷊audẹ̌ dingangu l᷊ohone patikụ. Malạekatẹ̌ e nẹ̌bera, ”Tempone e sembeng tawe ikaědung!

⁷ Kai kereu malạekatẹ̌ kapitune e měniụ napirine, ute Mawu Ruata e sarung mapakasěhụ u hingidu rahasiane, kerẹewe seng nihabare su manga ěllange, mangạe nabi e.”

⁸Bọu ene tingihẹ̌ kụ bọu takụ kinaringihẹ̌ bọu sorga e, nẹ̌saụ kapia nẹ̌bera si siạ, ”Dakọ e al᷊ạ dul᷊ungu bukẹ̌ mạbawingkahẹ̌ pai su l᷊imam malạekatẹ̌ kụ dụdarisị su l᷊audẹ̌ dingangu su rul᷊unge ene.”

⁹Tangu iạ e mal᷊aing natamai sol᷊ong anun malạekatẹ̌ ene e, kụ mědẹ̌dorong tadeạu i sie mangonggọ u bukẹ̌ dul᷊ung kạdodọ ene si siạ e. I sie nẹ̌bera, ”Daekeko kụ kaěngko ini e. Su ral᷊ungu tiangu e i sie sarung mapaị, arawe su ral᷊ungu mohongu e i sie marěngang kere ghul᷊ang katiupang.”

¹⁰ Iạ e měngkai nangal᷊ạ bukẹ̌ dul᷊ung kadodọ ene e wọu l᷊imane kụ takụ nịkakaěng. Su ral᷊ungu mohong tangu temange mang kere temangu gul᷊ang katiupang, kai sarạeng takụ niěllụ, tangu su ral᷊ungu tiange kai timemang mapaị.

¹¹Su samurine iạ e niparentaěng, ”Bokạko l᷊ai sěnsul᷊e hengetangu Mawu e mạanun manga umatẹ̌ e, arau wansa, mangạ e wera, ringangu mangạ e mararatu e.”