Read Sangir PĚLAL᷊AHẸ 11 Bible Online

PĚLAL᷊AHẸ 11 - Sangir bible

PĚLAL᷊AHẸ 11

¹ Bọu ene iạ nighěllirangu kalu sěmpědi mạngawẹ těking sasukạ sěmbua, mase nioro u, ”Dakọko pěngukurẹ̌ Bal᷊em Mawu ringangu pananěmbaěnge. Dekeneko měnsang kal᷊awọe taumata němpẹ̌kal᷊iomaneng su ral᷊unge.

² Kai abe pěngukurẹ̌ děllahẹ̌ su l᷊ikudu Wal᷊em Mawu e, batụu tampạ ene kai seng nionggọ su taumata apang tawe makakiral᷊a Mawu. I sire sarung měndaral᷊itạ soa susi e ghěnnangu ěpạ u pul᷊o dua su wul᷊ange karěngụ e.

³Iạ e sarung dumolohu sahidi-Ku e ruang katau apěluhem pakeangu mělutu, ringangu i sire sarung mamokạ u hengetangʼu Mawu Ruata e 1260 su ěllone karěngụ e.”

⁴ Sahidi rarua ene ute kai kalun zaitun darua, ringangu ral᷊aedu sol᷊o rarua su těngon Mawung kaguwạu dunia e.

⁵Kereu piạ u manal᷊ukạ si rẹ̌dua apẹ̌kẹ̌koạ dal᷊akị e ute piạ putung suměbang bọu mohong i rẹ̌dua e ipaminasa kal᷊awọu apan dumarokạ si rẹ̌dua e. Ual᷊ingu kakakoạ kerene ute, patikụ taumata apang měmpěndal᷊aị si rẹ̌dua e ute sarung ikapate.

⁶ I rẹ̌dua e mal᷊aing piạ kawasa waugu měhěping langị e tadeạu tawe rumasehẹ̌ karěngụewen i rẹ̌dua e mạmokạ u hengetangu Mawu Ruata e. I rẹ̌dua e mal᷊aing piạ kawasa waugu kěbị simbul᷊ẹ̌, ipamal᷊ui akẹ ipakakoạ daha. Dingangu si rẹ̌dua e mal᷊aing piạ kawasa waugu měmahang dunia e ringangu haghin sigěsạ, balạewe měnsang su tempo sude koateng tuhụ kapulun dẹ̌dua e.

⁷ Sarạeng i rẹ̌dua seng natagapi pẹ̌sasahidin dẹ̌dua e tangu, binatang kụ sarung sumẹ̌bang bọu tigal᷊ụ u papate e sarung dumokạ si rẹ̌dua.

⁸ Tangu kasuangʼi rẹ̌dua e sarung mạdal᷊iwatedẹ̌ sutal᷊oarang dal᷊eng mawěnahẹ̌ su soa ghaghuwạ e piạ e Mawun dẹ̌dua nịgaghantong. Sasaliling arengu soa ene ute Sodom arau Misirẹ̌.

⁹Taumata wọu patikụ něgara, hěnto, wera, ringangu wansa e sarung makasilo maietʼi rẹ̌dua e karěngụ u těllu ěllo, ringangu tawe mapakawalan manga maietẹ̌ ene ilěbing.

¹⁰Tumanạu dunia e sarung mahul᷊uasu kakaten sahidi rarua ene. I sire sarung měmpẹ̌sal᷊iwang dingangu měmpẹ̌daringọ u kakěngkunang batụu nabi rarua ene e seng nakarěntang haghing papahang su kěbị taumata su dunia.

¹¹ Nal᷊iụen těllu ěllo ringangu sěmpotọ, piạ e singongong pẹ̌bawiahẹ̌ e wọu Ruata e, kapia saụ simuẹ̌ su ral᷊ungʼi rẹ̌dua nabi ene. I rẹ̌dua e nẹ̌bangung nahundarisị, hakịu kěbị taumata e nakasilo si rẹ̌dua e něngkatakụ tawẹ sihinge.

¹² Kụ Bọu e nabi rarua ene e nakaringihe tingihẹ̌ maihạ kụkui si rẹ̌dua e wọu sorga e, ”Ěndaị e awị sol᷊ong ini!” Mase su těngọen dumarokạ si sire, i rẹ̌dua e nẹ̌těngkasapuạ sol᷊ong sorga, mạl᷊ahěmbungu winawa.

¹³ Tangu su tempo ene nělinuhẹ̌ kụ makạtatakụ. Kụ sěngkapul᷊ong kapahiakengu soa ene naopehẹ̌, kụ pitu hiwu su kataune e něngkapaten linuhẹ̌ ene. I sire lai wal᷊ine e mangkewen něngkatakụ tawẹ sihingʼe, kụ bọu e i sire nẹ̌dalo kasěllahu Ruata e su sorga.

¹⁴Hombang karuane e seng napaghohẹ̌. Kai kakěllako hombang katěllune e selaing mal᷊ighạ makatol᷊e.

¹⁵ Bọu e, malạekatẹ̌ kapitune nẹ̌tiụ e napirine, tangu kinaringihe tingihẹ̌ mal᷊aihạ-ihạ su sorga měbẹ̌bera, ”Kawasa waugu mẹ̌parenta dunia e orasẹ̌ ini kai seng su l᷊imang Mawung kitẹ dingangu Ratu Mananal᷊amatẹ̌ kụ ikẹ̌kědonʼE. I Sie sarung mẹ̌parenta sarang karěngụe!”

¹⁶Tangu i sire ruam pul᷊o ěpạ manga těmbonange kụ mạiang su kaderang kawawantugʼi sire su těngon Mawu Ruata e, němpẹ̌těngkasumagẹ̌ kụ nẹ̌suba Ruata.

¹⁷Ungkuěng i sire, ”Mawu, Ruata Limembong Kawasa, kụ ene ringangu seng těbe ene! I kami makitarimakasẹ si Kau, batụu i Kau seng nangumbelẹ kawasanʼU masaria, ringangu seng nanětạ e nẹ̌parenta!

¹⁸ Taumata apang běgang Mawu e, němpěnulu, u seng tempone i Kau mapasěbangu ral᷊angehu, ringangu semben tempone i Kau měhukungu taumata nate. Seng ini e tempone měmal᷊awuhu wawalarẹ̌ saghedẹ̌ baugu manga ěllangʼU manga nabi, dingangu su kěbị kawanuanʼU apang měmpẹ̌kẹ̌kal᷊iomaneng si Kau, matěllang arau rarodọ. Seng ini e tempone mědeạu mapakawinasang apan mạminasa dunia e!”

¹⁹ Tangu, Bal᷊em Mawu Ruata su sorga e natopẹ e, kụ nikasilọ e Peting Pẹ̌dariandi e su ral᷊unge. Ene sěngkianụ e nẹ̌kilạ mědẹ̌dahenesang, dingangu piạ tingihu rěllụ měgẹ̌gaghal᷊ědụ dingangu mạbawengesẹ̌, apidu nělinuhẹ̌ dingangu piạ tahitine kompelẹ̌ mal᷊awọ.