Read Sangir PĚLAL᷊AHẸ 13 Bible Online

PĚLAL᷊AHẸ 13 - Sangir bible

PĚLAL᷊AHẸ 13

¹ Bọu e iạ nakasilo piạ binatang sěmbaụ ěndaị siměpụ bọu ral᷊ungu sasị. I sie piạ sungene mapul᷊o ringangu těmbọ e pitu. Suapan sungene nahiạ u makotane, dingangu suapan těmbọ e niwohekangu areng sěmbaụ sasamedẹ̌ su Mawu Ruata.

² Binatang kụ takụ kinasilo ene luhude měpẹ̌papangawẹ gahịu masang kambal᷊ọ, laede kere laedu běruang, dingangu sasimụe kere sasimụ u singa. Mase binatang ene nionggol᷊angu nagạ e kuate sẹ̌sane ringangu kaderang kawawantuge, ringangu kawasane masěllahẹ̌.

³Sěmbaụ bọu binatang těmbọe pitu ene kakěllaěng kere piạ lesẹ e gẹ̌guwạ-guwạ, kaiso sembeng naul᷊e. Kạguwạu dunia e měngkate rụdal᷊inaụ apidu kạpahuntol᷊ene binatang ene.

⁴Kụ i sire měmpẹ̌sẹ̌suba su nagạ ene batụu i sie seng nẹ̌gěllịu kawasane su binatang ene. Kụ i sire mal᷊aing měmpẹ̌sẹ̌suba binatang ene. Ungkuěng i sire, ”Tawẹ apa kụ mẹ̌sul᷊ungu binatang ini! Tawẹu makatohạ mẹ̌sekẹ dumokạ si sie!”

⁵Binatang ene měngkate niwala mohonge měbẹ̌bera wawera mal᷊aotohẹ̌ dingangu manungkeang Mawu. I sie niapakawala mẹ̌parenta karěngụ u ěpạ u pul᷊o dua su wul᷊ange karěngụ e.

⁶ Mase i sie nanětạ e něhinakang Duata dingangu mạnal᷊amạ arengu Ruata. Kerene lai tampạ katatanakengu Mawu Ruata, dingangu patikụ apạeweng tumanạu sorga e nasuen tungkeange.

⁷ I sie mal᷊aing niapakawala rumokạ kawanuan Duata kụ apạmatạ si sire. Dingangu mẹ̌kawasa su wowom patikụ hěnto, wansa, ringangu wera, ringangu umatẹ̌ kụ seng nisarakang si sie.

⁸ Binatang ene sarung subaěngu patikụ taumata apang měbẹ̌biahẹ̌ su wowon dunia, tabeạu ketewe taumata apang arenge seng kạdarol᷊ẹ̌ kal᷊amonan dunia niriadi e, su ral᷊ungu bukẹ̌ u taumata wiahẹ̌ tẹ̌taghuanengu Ahusu Domba e kụ seng bọu pinotọ.

⁹Ual᷊ingu ene, kereu i kamene makakoạ dumaringihẹ̌, ute pěmpẹ̌daringihẹ̌ko habarẹ̌ ini:

¹⁰ ”Taumata kụ hinong itaweng, mang sarung tawengang. Dingangu taumata kụ hinong pateěngu papilị, mang sarung pateěng pilikang. Kai ual᷊ingu ene hakịu kawanuan Duata e hinon mẹ̌dararagẹ̌ dingangu satia.”

¹¹Mase iạ nakasilo binatang sěmbaụ bal᷊ine siměpụ bọu ral᷊ungu dunia. Piạ sungene rarua mẹ̌sul᷊ungu sungen anạ u domba. Tingihe mẹ̌sul᷊ungu tingihu nagạ.

¹²Su těngon binatang humotong ene i sie měpẹ̌pakẹ u kawasa masaria mal᷊aing kinahombange wọu binatang ene. Kaguwạu dunia ringangu patikụ mětatumanạ e, sẹ̌sihasaěngu harusẹ̌ měmpẹ̌suba binatang humotong, kụ hempange seng napia.

¹³Binatang karuane e nẹ̌koạ e manga hal᷊ẹ̌ makạdal᷊inaụ gaghuwạ. Su těngong kěbị taumata e i sie napakanawọen putung bọu langị sol᷊ong dunia e.

¹⁴Kụ kěbị taumata apang měmpěbẹ̌biahẹ̌ su wowon dunia e lẹ̌akal᷊engu manga karal᷊inaụ kụ kẹ̌koatenge su těngon binatang humotonge. Kụ i sire kěbị e niorone apẹ̌děndarisị u tul᷊adang binatang sěmbaụ kụ seng bọu nilesẹ u warạ e, katewe mang těbe wiahẹ̌.

¹⁵Binatang karuane ene niapakawala mapẹ̌biahu tul᷊ada e, hakịu tul᷊ada ene wotonge mẹ̌bisara ringangu mamate kěbị taumata apan tawe mapulu měmpẹ̌suba si sie.

¹⁶Kěbị taumata e, baẹ gaghuwạ arau rarodọ, kalạ dingangu kasiang, ěllang arau kawanua, isẹ̌sihasan binatang ene mědeạu pěnẹ̌narimạ u tatiala su l᷊imang sire koaneng arau su rěhụ i sire.

¹⁷Tawẹu sarang sěngkatau makapěmělli arau makapẹ̌bal᷊ụ u apa-apa, kereu i sie tawẹ tatialane; mangal᷊ene arengu binatang ene hala e, arau rekenangu arenge.

¹⁸Sini e hinong piạ katatahuěnna. I saing kụ matahuěnna ute makarekeng mangal᷊eng dekenangu binatang ene batụu rekenang ene kai arengu taumata sěngkatau. Dekenange tangu kai 666.