Read Sangir PĚLAL᷊AHẸ 14 Bible Online

PĚLAL᷊AHẸ 14 - Sangir bible

PĚLAL᷊AHẸ 14

¹ Bọu e iạ nakasilo, kụ sěngkakakělla Ahusu Domba e rụdarisị su wowom Bul᷊udʼu Sion. Dingange piạ i sire 144.000 su kataune kụ su apan děhụ i sire e mạbawohẹ arengʼE ringangu arengʼi AmangʼE.

²Mase iạ nakaringihe tingihẹ̌ bọu l᷊angị kere ghal᷊ěgehu akẹ u tědunang gaghuwạ dingangu kere gal᷊ědụ u rěllụ maihạ-ihạ. Tingihẹ̌ ene ikẹ̌karingihẹ̌ kere tingihu kěcapi kẹ̌kobikangu manga měnanalange.

³Su těngong kaderang kawawantugẹ̌ dingangu riadikang ěpạ e ore manga mananěmbonange měmpělẹ̌likụ kadera e, i sire 144.000 su kataune e měkẹ̌kantarị u kantarị buhu sěmbua. Kantarị ene tawe ikaěndung i sai wal᷊ine, su l᷊ikudu i sire 144.000 su kataune e kụ seng niapakal᷊iwirẹ̌ bọu dunia e.

⁴I sire ene kai apang kụ tạ turạ e, mẹ̌sul᷊ungu parawang, batụu tawe němpěnẹ̌nenggehẹ̌ manga wawine. I sire mạhuntol᷊ẹewe Ahusu Domba e balạewe sol᷊ong apa ral᷊engange. Bọu kal᷊awọu patikụ umatẹ̌ e, i sire ene seng niapakal᷊iwirẹ̌ kere sasěmba kahumotongange su těngon Duata ringangu su Ahusu Domba e.

⁵ Tawe němpẹ̌kẹ̌konti i sire; dingangu tawẹ sěngkul᷊e sarang kạdodọ si sire.

⁶Mase iạ nakasilo malạekatẹ̌ bal᷊ine sěngkatau tụtěllạ marangẹ su l᷊angị. Malạekatẹ̌ ene e něhabaru Injilẹ̌ kakalẹ̌ e mědeạu ihabarẹ̌ su taumata su dunia e waugu patikụ umatẹ̌, hěnto, wera ringangu wanua.

⁷Malạekatẹ̌ ene mạmohang dingangu tingihe maihạ u, ”Kěngkatakụbeng Mawu Ruata, ringangu pẹ̌daloko kasěllahʼE. Batụu seng tempone Mawu Ruata e měhukungu taumata e. Pěmpẹ̌subako si Sie kụ něndiadi langị, dunia, l᷊audẹ̌ dingangu patikụ simbul᷊u akẹ!”

⁸ Malạekatẹ̌ karuane e nakatol᷊e malạekatẹ̌ humotong kạpẹ̌berane, ”Seng nawatang! Soan Babelẹ̌ masaria e seng nawatang! I Sie seng nakakiwukang kěbị umatẹ̌ e ringangu akẹ u anggorʼu abul᷊ing pẹ̌sasundal᷊ʼe!”

⁹Malạekatewe katěllune nakatol᷊e malạekatẹ̌ darua e, kapạmokạen tingihe maihạ, ”Taumata apang kụ maněmba binatang e ringangu tul᷊adane, dingangu piạ tatialan binatang ene su rěhụ dingangu su l᷊imane,

¹⁰ taumata ene sarung manginung anggoru Ruata, mangal᷊ene anggoru ral᷊angehe kụ seng niral᷊ing su ral᷊ungu lainumange, tạ golọ e sarang kadodọ! I sire kěbị ene sarung sigẹ̌sakeng su ral᷊ungu putung dingangu malelang su těngon manga malạekatẹ̌ susi dingangu su těngon Ahusu Domba e.

¹¹ Tipun putung kụ manigěsạ si sire ene sarung hanesẹ̌ tụtiowol᷊ẹ̌ sarang karěngụ e. Ěllo hěbi tawẹ potọ e i sire mạpahang mangal᷊ene i sire apang kụ měmpẹ̌sẹ̌suba binatang ene ringangu tul᷊adane, kěbị taumata kụ piạ tatialane arengu binatang ene.”

¹²Su ral᷊ungu kakakoạ ini, kawanuan Duata kụ mararingihẹ̌ su kěbị hengetangu Ruata ringangu satia su Mawu Yesus, hinong pakakakědang.

¹³Mase iạ nakaringihe tingihẹ̌ bọu sorga nẹ̌bera u, ”Bohẹko ini: Manětạ bọu orasẹ̌ ini, kariangkamang taumata nate, kụ mẹ̌tate těntal᷊ang kapẹ̌tangkiange Mawu e!” ”Kahěngang!” ungkuěngu Rohkẹ̌ u Ruata e. ”I sire sarungbe mangědo wọu měhal᷊ẹ̌ mawěhạ, batụu pul᷊isu pẹ̌tatangkiang i sire sarung duměndingang si sire.”

¹⁴ Bọu e iạ timatingang, tangu sěngkakakělla e kai piạ binawa mawira. Su wowom binawa ene piạ sěngkatau mạiang kakěllaěng mạngawẹ taumata. Su těmbọʼE piạ makotane wul᷊aeng, dingangu su l᷊imanʼE piạ bawẹ̌base mahoro.

¹⁵ Bọu e malạekatẹ̌ sěngkatau wal᷊ine nasěbang bọu ral᷊ungu Wal᷊em Mawu. Dingangu tingihe maihạ, i sie nangoro su tau mạiang su wowon binawa ene. ”Bẹ̌baseng gaghambesu e kụ pěnsạ e, batụu kai seng tempone maměnsạ; dunia e seng maghurang, hakịu sembeng botonge pěnsakeng!”

¹⁶Tangu i anu kụkaiang su wowon binawa e nangambesu l᷊aambesʼE su dunia e, tangu dunia e napěnsạ.

¹⁷Bọu ene iạ nakasilọ e sěngkatau malạekatẹ̌ bal᷊ine sěngkatau simẹ̌bang bọu ral᷊ungu Wal᷊em Mawu su sorga. I sie mal᷊aing nangumbelẹ l᷊aambesẹ̌ mahoro sěmbua.

¹⁸Bọu ene, malạekatẹ̌ bal᷊ine sěngkatau e kụ piạ kawasane su putunge, riměntạ e wọu pananěmbaěnge. Kụ dingangken tingihe maihạ, i sie něngorọ e malạekatẹ̌ měngẹ̌ngumpaedẹ̌ l᷊aambesẹ̌ ene mahoro e angkuěng: ”Bẹ̌baseng l᷊aambesu e ringangu hěsạ e manga wuang kalung anggorẹ̌ e wọu pungene su dunia e, u manga wuane e seng masasasạ!”

¹⁹Tangu malạekatẹ̌ ene měngkate něngambesu l᷊aambese su dunia e kụ něhěsạ manga wuang anggorẹ̌ e wọu kalune, bọu ene niwahungke sol᷊ong tampạ u papěhasengu anggoru ral᷊angehu Ruata kụ sụsahoka e.

²⁰ Manga wuang anggorẹ̌ ene nipěha sul᷊ikudu soa, kụ bọu papěhaseng u anggorẹ̌ e tangu piạe raha nelehẹ̌ kụ kere laelehu sal᷊ụ, karaune ute těllu hasụ su kilo metere, ringangu karal᷊unge maraning dua meterẹ̌.