Read Sangir PĚLAL᷊AHẸ 15 Bible Online

PĚLAL᷊AHẸ 15 - Sangir bible

PĚLAL᷊AHẸ 15

¹Bọu ene iạ nakasilo su l᷊angị piạ tanda makạl᷊aherang tawẹ sihinge kasěllahe. Tangu piạ malạekatẹ̌ pitung katau ringangu papahang kasamuriange kụ pitu haghine. Kụ seng ini e pangěnsueěngu tatompẹ u ral᷊angehu Mawu Ruata e.

²Mase iạ nakasilo apa kụ kakěllaěng mẹ̌sul᷊ungu l᷊audẹ̌ kasěnaěng nẹ̌dal᷊aụ u putung. Iạ e mal᷊aing nakasilo si sire apan seng nakawatạ binatang e ringangu tul᷊adane, ringangu nakawatạ taumata apang arenge nitialaěngu rekenang. I sire apan nakawatạ ene rụdarisị su wiwihu l᷊audu kaca, kạpangumbelẹ e kěcapi nionggọu Mawu Ruata e si sire.

³ Kụ i sire němpẹ̌kantarịeng kakantarị i Musa ěllangu Mawu e, ringangu kakantarị u Ahusu Domba e. Bawerane kere ini, ”Mawu, Ruata Limembong Kawasa, apạ e kasěllahẹ̌ dingangu makạdal᷊inaụ munaranʼU! Datung patikụ umatẹ̌,[7] apạ e kaadilẹ̌ dingangu katěngadẹ̌ kal᷊awọu kakanoạu e!

⁴ I sai tangú tawe matatakụ i Kau, Mawu? I sai tangú tawe mapulu měhabarʼu KasěllahʼU e? I Kau sẹ̌sanu e susi. Kal᷊awọu umatẹ̌ e sarung mahunděnta mẹ̌suba si Kau ual᷊ingʼu kal᷊awọu kakanoạʼU adilẹ̌ seng kinasilong kěbị taumata.”

⁵ Bọu ene iạ e nakasilo tenta pětẹ̌těngkal᷊ahẹkangu Mawu e natope, ringangu Tentaʼm Mawu e ene su ral᷊unge.

⁶Mase malạekatẹ̌ pitu e nẹ̌bawạ e hombang pitu ene simẹ̌bang bọu ral᷊ungu Wal᷊en Duata e. Pakeang i sire e wọu hekạ leneng burẹ̌si mal᷊endạ. Dingangu i sire kai měpẹ̌papẹ̌gongu papěgong bul᷊aeng su rokon sire.

⁷Bọu ene sěmbaụ bọu riadikang ěpạ ene e něngonggọu bokorẹ̌ bul᷊aeng pitum baụ si sire malạekatẹ̌ pitu e napenẹ u l᷊ohon dal᷊angehu Mawu Ruata e, — Duata e kụ biahẹ̌ sarang marěngụ-děngụ.

⁸ Tangu Bal᷊en Duata e, napenẹen tipung kawawantugẹ̌ dingangu kawasang Mawu Ruata. Kụ karěngụeweng hombang pitu e niwawan sire malạekatẹ̌ pitu e wẹ̌dang tawe napaghohẹ̌ e, tawẹu sarang sěngkatau kụ makasuẹ̌ su ral᷊ungu Wal᷊en Duata e.