Read Sangir PĚLAL᷊AHẸ 16 Bible Online

PĚLAL᷊AHẸ 16 - Sangir bible

PĚLAL᷊AHẸ 16

¹Mase iạ nakaringihe tingihẹ̌ maihạ bọu ral᷊ungu Wal᷊en Duata e měbẹ̌bera su Malạekatẹ̌ pitu e, ”Dakọe ringangu wosọ e ral᷊ohon bokoru ral᷊angehu Mawu Ruata e, su dunia!”

² Malạekatẹ̌ humotong tangu rimal᷊engke kụ němosọen dal᷊ohoʼm bokorʼe ene su dunia. Tangu nilẹ̌toěngkem bisul᷊ẹ̌ gaghuwạ dingangu maghaghiadẹ̌ su kěbị taumata apang kụ piạ tatialam binatang e, ringangu taumata apam měmpěnẹ̌němba tul᷊adane.

³Bọu ene malạekatẹ̌ karuane němosọen dal᷊ohong bokorẹ̌ su l᷊audẹ̌. Tangu sasị e mal᷊aing nẹ̌bal᷊ui nakoạ kere rahan taumata nate, kụ něngkapatẹ e patikụ diadikang apam měbẹ̌biahẹ̌ su l᷊audẹ̌.

⁴ Bọu ene malạekatẹ̌ katěllune e němosọen dal᷊ohong bokorẹ̌ su manga sal᷊ụ dingangu manga simbul᷊u akẹ, hakịu kěbị manga akene e nakoạ daha.

⁵Iạ nakaringihẹ̌ malạekatẹ̌ měngangawasa akẹ e nẹ̌bera, ”Hukumang kụ seng nịpaponesu e, mambeng su kạadilẹ̌, Mawu Kasusiange, Duata kụ ene, ringangu seng těbe ene!

⁶I sire seng napatědọu rahang umatu Mawu e ringangu raham manga nabi; kụ orasẹ̌ ini e i Kau e seng napěnginung i sire raha. Kụ mambeng hinone kerene e waugʼi sire e!”

⁷Mase iạ nakaringihẹ̌ tingihẹ̌ bọu pananěmbaěnge nẹ̌bera, ”Mawu, Ruata Makawasa, kahěngang dingangu maadilẹ̌ manga putusang ninawonu e!”

⁸Bọu ene malạekatẹ̌ kaěpạ e němosọen dal᷊ohoʼm bokorʼe su matangěllo, tangu matangěllo e mal᷊aing niapakawala měhěngisẹ̌ taumata ringangu lěhabe tawẹ sihinge ene.

⁹Taumata e nahěngisu tětịe mal᷊uwahang e, dingangu i sire měmpẹ̌ngẹ̌ngane arengu Ruata, kụ kawasa su wowom patikụ haghing papahang ene. Manilaing seng kerene, i sire mang tawe mapulu mẹ̌tobatẹ̌ bọu manga rosan sire, ringangu tawe mapulu mẹ̌dalo kasěllahu Ruata.

¹⁰ Mase malạekatẹ̌ kal᷊imane e němosọen dal᷊ohoʼm bokorʼe sol᷊on tampạ kal᷊aianengu binatang ene. Tangu kasěllahu kararatuangu binatang ene, narěndungke, hakịu taumata e němpangikị e lilan sire e kahian katědụe.

¹¹Bọu ene i sire němpangane Mawu Ruata su sorga kahian katědụe ringangu kahian manga wisul᷊ʼi sire. Kaiso i sire mal᷊aing tawe měmpẹ̌tobatẹ̌ bọu kal᷊awọu kakanoạ i sire raral᷊akisẹ̌ e.

¹² Bọu ene malạekatẹ̌ kaěnnunge němosọen dal᷊ohoʼm bokorʼe su Sal᷊ụ u Efrat gẹ̌guwạ ene. Tangu sal᷊ụ ene nal᷊ěsạ e hakịu manga ratu wọu sěmběkang dakị e, nakaral᷊eng bọu e.

¹³Mase iạ nakasilo rohkẹ̌ dal᷊akisẹ̌ tatěllu kere luhudu tumpaheạ. Sěmbaụ-sěmbaụ tumpaheạ e sụsěbang bọu mohongu nagạ, bọu mohongu binatang, dingangu wọu mohongu mahang nabi.

¹⁴I sire ene ute kai manga rohkẹ̌ dal᷊akị kụ měmpẹ̌kẹ̌koạ karal᷊inaụ. Rohkẹ̌ tatěllu ene něngkakoạ sol᷊ong anung kal᷊awọu ratu su kạguwạu dunia ringangu němpěngomol᷊ʼi sire e mědeạu mẹ̌sekẹ su Ěllo masěllahẹ̌, mangal᷊ene Ěllon Duata Liungkawasa e.

¹⁵ ”Pẹ̌daringihẹ̌ko! Iạ e kai ruměnta kere tahatako! Kariangkamang i sain mělẹ̌lukadẹ̌ dingangu měsẹ̌sěmpị pakeange, hakịu i sie tawe rumal᷊eng těntol᷊e ringangu ipakamea su těngon lawọ.”

¹⁶ Bọu e manga rohkẹ̌ ene napẹ̌tampungu mararatu e su tampạ kụ su werang Ibrani e isẹ̌sẹ̌bạ Harmagedon.

¹⁷Bọu ene malạekatẹ̌ kapitune e němosọeng bokore sol᷊ong kinoaěng. Tangu kinaringihe tingihẹ̌ maihạ bọu kaderang kawantugẹ̌ e su Wal᷊en Duata, kụ nẹ̌bera, ”Seng naghanapẹ̌!”

¹⁸ Mase piạ e kilạ mědẹ̌dahenesang dingangu tingihu rěllụ měgẹ̌gaghal᷊ědụ dingangu ghụgal᷊ěgehẹ̌, apidu nělinuhẹ̌ kụ makạtatakụ. Bědawen ta nělẹ̌linuhẹ̌ kerene kaihạ e dokeng su pěndariadi taumata e. Seng ini e linuhẹ̌ kụ lembom makạtatakụ!

¹⁹ Soa ghẹ̌guwạ ene nạběka napahiạ tatěllu, ringangu naghoghahẹ̌ kěbị soa su kaguwạu dunia. Tangu Mawu Ruata e nakatahěndungke soan Babel gẹ̌guwạe. Tangu Mawu Ruata e napěnginung i sie anggorẹ̌ bọu bokoru anggorʼu Mawu — kụ kai anggoru ral᷊angehʼE kụ měkẹ̌kakalulu e.

²⁰ Patikụ tahanusa e měngkaparung dingangu patikụ bul᷊ude mal᷊aing masue miwu.

²¹ Tahiting eisẹ̌ gaghaghuwạ, kụ běhạ e pẹ̌taha limam pul᷊o su kilone, mạhondosẹ̌ bọu l᷊angị milịhino su kěbị taumata. Tangu i sire měmpẹ̌ngẹ̌ngane Mawu Ruata e, ual᷊ingu papahang u tahiti eisẹ̌ kụ makạtatakụ ene.