Read Sangir PĚLAL᷊AHẸ 17 Bible Online

PĚLAL᷊AHẸ 17 - Sangir bible

PĚLAL᷊AHẸ 17

¹ Bọu e sěngkatau wọu tal᷊oarang malạekatẹ̌ pitu mạngumpaedẹ̌ bokorẹ̌ pitu e himaung su anuku ringangu nẹ̌bera, ”Boete, iạ e sarung měnodẹ si kau kereapa tahapẹ̌sundal᷊ẹ̌ gẹ̌guwạ ěndaị e sarung ihukung, mangal᷊ene soa ghẹ̌guwạ ěndaị e kụ nipětị su rěduhu manga sal᷊ụ.

² Mararatun dunia e němpẹ̌sundal᷊ẹ̌ dingange, kụ dal᷊ohon dunia e něngkiwukang ual᷊ingu němpanginung anggoru pẹ̌sasundal᷊e!”

³ Mase Rohkẹ̌ u Ruata e limohọ e su watangengku, kụ malạekatẹ̌ e nẹ̌bawa si siạ sol᷊ong kěhu l᷊inggi. Paise iạ nakasilo tau wawine sěngkatau mạiang su wowom binatang sěmbaụ awạe mahamụ maghurang, kụ napěpidu wohẹ u areng u tatongkeang su Mawu Ruata. Binatang ene e těmbọe pitu ringangu sungene mapul᷊o.

⁴ Tau wawine ene něluhen lakụ e kamumụ dingangu mahamụ maghurang, mase lai nilẹ̌gaheng u manga ral᷊ěgahẹ̌ bul᷊aeng, paramata, ringangu mutiara. Limane ipělẹ̌hěgo lainumang bul᷊aeng sěmběka napenẹ u katatingkaị dingangu karal᷊amuhụ, ual᷊ing pẹ̌sasasundal᷊e.

⁵Su rěhụ e piạ kạbawohẹ areng sěmbaụ kụ mangal᷊ene ute kai rahasia. Areng ene ute, ”Babel Masěllahẹ̌, inangu kěbị apan tahapẹ̌sundal᷊ẹ̌ dingangu taumata apan dal᷊akisẹ̌ su dunia.”

⁶Mase iạ nakasilo tau wawine ene niwukangu rahan taumata nipate ual᷊ingu masatia su Mawu Yesus. Piạ e iạ nakasilo wawine ene, iạ e měngkawe naherang-herang.

⁷Tangu malạekatẹ̌ e něhengetang si siạ, ”Kai unụe nakaherang si kau? Mapiawe iạ měhabarẹ̌ si kau rahasian bawine ene ringangu rahasiam binatang sẹ̌sakeěnge, kụ těmbọ e pitu ringangu sungene mapul᷊o.

⁸ Binatang ene kạngerẹ nạungbe wọu nẹ̌biahẹ̌, arawe orasẹ̌ ini e sen tawe saụ mẹ̌biahẹ̌ kạpia. I sie tawe mararěna e sarung suměpụ bọu tạgial᷊ụ u papate, kụ sarung makoạ sol᷊ong kawawinasa. Taumata apang měmpẹ̌bẹ̌biahẹ̌ su dunia, kụ arenge tawe nikarol᷊ẹ̌ su ral᷊ungu Bukẹ̌ u Taumata Wiahẹ̌, kal᷊amonang dunia e ren tawe nịdiadi sarung dumal᷊inaụ kereu makasilo binatang ene. Batụu binatang ene nạung kạngerẹ e reng bọu nẹ̌biahẹ̌. Arawe orasẹ̌ ini e seng tawe saụ mẹ̌biahẹ̌, kapia kaiso i sie saụbe suměpụ kapia.

⁹Ual᷊ingu ene ute kai hinong piạ kapelesa ringangu katatahuěnna. Kụ těmbọ pitu e ute kai wul᷊ude pitu; kụ kai manga wul᷊ude kẹ̌kaianengu tau wawine ene. Ringangu těmbọ pitu ene ute mal᷊aing mělẹ̌lahẹu Ratu i sire pitung katau:

¹⁰kụ l᷊imang katau wọu tal᷊oaran sire e seng něngkawatang, arawe sěngkatau ute wědangben tawe nạděnta.

¹¹Kụ binatang kạngerẹ nạung měbẹ̌biahẹ̌, arawe orasẹ̌ ini seng tawe nẹ̌biahẹ̌, ute kai ratu kaual᷊une. I sie ute mal᷊aing sěngkatau wọu ratu i sire pitu e, kụ orasẹ̌ ini e mětẹ̌timona kawawinasa.

¹² Sunge mapul᷊o kụ kinasilonu e ute kai ratu mapul᷊o kụ bẹ̌dang ta nẹ̌nětạ němpẹ̌parenta. Kaiso i sire sarungbe iapakawala mẹ̌parenta kere sěngkatau ratu sěngkapẹ̌parenta ringangu binatang ene sěngkaorasẹ̌ karěngụe.

¹³Tẹ̌gal᷊u ratu mapul᷊o ini e kěbị nạung piạ timonan e mẹ̌sul᷊ung; i sire kěbị e kai mạnarakangu katoghasẹ̌ dingangu kawasan sire su binatang e.

¹⁴I sire kai sarung mẹ̌sekẹ dumokạ Ahusu Domba e, Kaiso Ahusu Domba ringangu tumatol᷊ene masasatia e kụ seng nikuiangʼE ringangu pinilenʼE e sarung mamatạ manga ratu e, batụu kai i Sie Mawung kěbị manga mawu, dingangu Ratung kěbị mararatu e.”

¹⁵Malạekatẹ̌ ene mal᷊aing nẹ̌bera, ”Akẹ nạung kinasilonu e, piạ kẹ̌kaianengu wawine tahapẹ̌sundal᷊ẹ̌, ute kai manga umatẹ̌, kawanua, ringangu wansa, ringangu manga haghing bera.

¹⁶Sunge mapul᷊o kinasilonu e ringangu binatang e, i sire kai sarung měmpẹ̌binsịu taha pẹ̌sundal᷊ẹ̌ ene. I sire sarung měmpangaho kěbị apang tẹ̌taghuanenge, ringangu mapakatěntol᷊en sie. I sire sarung mahungkinạ gěsine ringangu maminasang putung si sie.

¹⁷Batụu Mawu Ruata e seng nanganoạ naung i sire baugu měmpěndal᷊engu antagu munaran Duata. Mawu Ruata e seng napẹ̌sěngkanaung i sire tadeạu manarakangu pěngangawasang sire su binatang ene, tadeạu binatang ene mẹ̌parenta sarạeweng karariading apang kụ nipěhengetang u Mawu Ruata.

¹⁸Bawine kụ kinasilonu e ute kai soa ghẹ̌guwạ, kụ měpẹ̌parenta mararatu e su dunia.”