Read Sangir PĚLAL᷊AHẸ 19 Bible Online

PĚLAL᷊AHẸ 19 - Sangir bible

PĚLAL᷊AHẸ 19

¹Samuring ene, iạ nakaringihẹ̌ tingihẹ̌ měgẹ̌gaghal᷊ědụ kere tingihu taumata mal᷊awọ bọu sorga kụ měmpěgẹ̌gio, ”Pẹ̌dalọ e Ruata! Duatang kitẹ e kai Ruata makasal᷊amatẹ̌; i Sie kai Ruata mawantugẹ̌ dingangu kawasa!

² PělahukungʼE kai adilẹ̌ dingangu pelesa! I Sie seng něnawong hukumange su tau wawine tahapẹ̌sundal᷊ẹ̌ gẹ̌guwạ, kụ seng nakagholang dunia e ual᷊ingu pẹ̌sasundal᷊e. Mawu Ruata e seng něhukungu tahapẹ̌sundal᷊ẹ̌ ene, batụu i sie němate manga ěllangu Mawu Ruata.”

³ Mase tingihu taumata l᷊awọ e němpẹ̌gioewe kapia, ”Pědalọ e Ruata! Tipung putung kụ něhěngisẹ̌ soa ghẹ̌guwạ ene sarung tumiwuạ tawẹ ědone!”

⁴Tangu manga těmbonange i sire ruam pul᷊o ěpạ dingangu riadikang ěpạ mạdal᷊ikụ su kaderang kawawantugẹ̌ e němpẹ̌těngkasumagẹ̌ kụ němpẹ̌suba Ruata e kụ mạiang su kaderang kawawantugẹ̌ e. Ungkuěng i sire, ”Aming! Pědalọ e Ruata!”

⁵ Mase piạ e tingihẹ̌ kinaringihẹ̌ bọu kaderang kawawantugẹ̌ e měbẹ̌bera u, ”Pěmpẹ̌dalọ e Ruata, ei patikụ ěllangu Mawu Ruata, ore kěbị taumata — ghaghuwạ darodọ — kụ měmpẹ̌sẹ̌suba Ruata e!”

⁶ Bọu ene iạ nakaringihẹ̌ al᷊ingkai tingihu ghapaěngu taumata kụ mal᷊awọ-l᷊awọ; tingihe mẹ̌sul᷊ungu tingihu wělladẹ̌ měgẹ̌gaghal᷊ěgehẹ̌ dingangu kere rěllụ měgẹ̌gaghal᷊ědụ. Iạ e nakaringihẹ̌ si sire měmpěbẹ̌bera u, ”Pědalọ e Ruata! Batụu Mawu, Ruatang kitẹ limembong kawasa ene orasẹ̌ ini měpẹ̌parenta!

⁷Mahịe i kitẹ mahul᷊uasẹ̌ dingangu mahul᷊iagẹ̌; mahịe i kitẹ mẹ̌dalo kawasane! Batụu seng tempone ěllong pẹ̌kakakawing kụ mạngumpaedẹ̌ areng Ahusu Domba e, ringangu kaghiangʼE seng sadia waugʼu pẹ̌kawingʼE.

⁸Pakeange leneng mal᷊endạ kụ seng nionggọ si sie ipakịluhe.” (Pakeang leneng e ute kai kakakoạ mapapia kụ kẹ̌koatengu kawanuan Duata.)

⁹ Mase malạekatẹ̌ e nẹ̌bera si siạ, ”Pěmohẹko ini: ’Kariangkamang taumata apang nihaěngang sol᷊ong sal᷊iwangu pẹ̌kakawingu Ahusu Domba e.’ ” Bọu ene malaekatẹ̌ e nẹ̌berako l᷊ai, ”Kai ini e wal᷊ong hengetang matěngadẹ̌ bọu Ruata.”

¹⁰Iạ e nẹ̌těngkasumagẹ̌ su těngon malạekatẹ̌ ene kụ mẹ̌suba, kutẹu i Sie kai nẹ̌bera si siạ, ”Kumbahang! Abe pẹ̌suba si siạ, pẹ̌subạ e Ruata. Batụu iạ e mal᷊aing ěllang mẹ̌sul᷊ungu i kau ringangu mẹ̌sul᷊ungu kěbị anạ u sěmbaụ u kụ apang mạngumpaedẹ̌ matoghasẹ̌ su sasahidin Mawu Yesus e!” Batụu kai sasahidin Yesus ene e lụl᷊oho su taumata apam měmpěnẹ̌něbal᷊ẹ̌ e.

¹¹ Bọu e iạ nakasilo sorga e natope, mase nakasilo kawal᷊o uhisẹ̌ sěmbaụ. SumasakenʼE e isẹ̌sěbạ si Masatia ringangu si Matěngadẹ̌. I Sie kai adilẹ̌ měnawong hukumang dingangu su ral᷊ungu pẹ̌seketang kụ tẹ̌tal᷊udangʼE.

¹² MatanʼE e mẹ̌sul᷊ungu rěllịu putung dingangu su těmbọʼE ute napenẹ u makotane. Kutẹu su wadang e kai piạ areng sěmbaụ kạbawohẹ; kụ kětạbeng i Sie sẹ̌sane masingkạ u areng ene.

¹³Lakụ manandụ mạdal᷊uhe si Sie e seng bọu niuno su raha. Kụ i Sie isẹ̌sěbạ, ”Hengetangu Ruata”.

¹⁴Buntuangu mẹ̌sasekẹ u sorga e mạhuntol᷊e si Sie kụ mạhunsake kawal᷊o uhisẹ̌, dingangu pakeange leneng kụ mawira wurẹ̌si.

¹⁵ Bọu mohongʼE nisẹ̌bangengu warạ mahoro sěmbua, kụ dingangu warạ ene i Sie namatạ manga wansa, kụ i Sie sarung mẹ̌parenta si sire ringangu těking uase. I Sie sarung měměhasẹ̌ anggorẹ̌ e su ral᷊ungu pěmaměhasengu anggoru ral᷊angehu Ruata Limembong Kawasa.

¹⁶Su lakụʼE manandụ dingangʼu su palangʼE kạbawohẹ areng ini, ”Datun patikụ datu, ringangu Mawun patikụ Mawu.”

¹⁷ Mase iạ nakasilo malạekatẹ̌ sěngkatau rụdarisị su wowon matangěllo. Dingangken tingihe maihạ i sie kụkui kěbị manụ u winalangeng, kụ mạhuntěllạ su kinoaěng, ”Mahiko pěmpẹ̌komol᷊ẹ̌ kụ mitụko sal᷊iwang gẹ̌guwạ kụ niapakasěllahu Mawu Ruata!

¹⁸Mahịe mahungkinạ gěsing mararatu, gěsing manga těmbonangu sorodado, dingangu gěsing manga wawahani, mahiko pahungkinạ gěsing manga sumasake kawal᷊o, ringangu gěsing manga kawal᷊one ringangu ghěsing kěbị umatẹ̌, matatěllang arau reng dariọ, ěllang dingangu wal᷊ine ěllang!”

¹⁹Bọu e iạ nakasilo binatang ene, dingangu mararatun dunia e ringangkewelaing buntuangu mẹ̌sasekẹ i sire, němpẹ̌komol᷊ẹ̌ mědeạu mẹ̌sekẹ dumokạ si Sie kụ sụsake kawal᷊o uhisẹ̌ dingangkelaing buntuangʼu mẹ̌sasekẹʼE.

²⁰ Tangu binatang ene kinasamẹ e sěngkasamẹ dingangu mahang nabi kụ seng nẹ̌koạ hal᷊ẹ̌ makạl᷊aherang ene su těngon binatang ene. (Dingangkeweng manga hal᷊ẹ̌ makạl᷊aherang ene e tangu binatang ene nangakal᷊ẹ̌ taumatạewe apang piạ tatialan binatang ene, dingangu manga taumata kụ apang měmpạněmba tul᷊adang binatang ene.) Mase binatang ene ringangu mahang nabi ene nirěmmẹ biahẹ̌ sol᷊ong dal᷊ungu l᷊audu putung kụ mědẹ̌daripěllau ringangu malelang.

²¹Kụ buntuangʼu mẹ̌sasekẹ i sire nipateng barạ siměpụ bọu mohongu sumasake kawal᷊o uhisẹ̌ ene. Tangu manga manụ e nahunděntạ e kụ němpẹ̌kinạ gẹ̌sin sire nipate e kụ měngkate apa rimarakua.